O‘zbekiston respublikasi oliy va o‘rta maxsus ta’lim vazirligi a’zam xoliqov

Pedagogik texnikani egallash mahorati 
O‘qituvchi pedagogik faoliyatida pedagogik texnikaning ko‘nikma 
va malakalarini mukammal takomillashtirgan holda o‘z mahoratini oshi-
rish uchun quyidagi jarayonlarni bilishi lozim: 
1. O‘qituvchi o‘zlashtirishi lozim bo‘lgan pedagogik texnikaning 
muhim tarkibiy qismlaridan biri uning nutq texnikasidir (nutq tempi, dik-
siyasi, tovush ohangini baland, o‘rta, past qila olishi va hokazo). 
Dars jarayonida o‘quv materiallarini idrok qilishda o‘qituvchining 
nutqi muhim rol o‘ynaydi. Olimlarning fikricha, o‘quvchilar tomonidan 
1/2 foiz o‘quv materialini tafakkur orqali idrok qilish va o‘zlashtirish 
o‘qituvchilarning nutqiga va uning so‘zlarni to‘g‘ri talaffuz qilishiga 
bog‘liq. O‘quvchilar o‘qituvchining nutqini nihoyatda kuzatuvchanlik va 
qiziqish bilan tinglaydilar. Past ohangda gapiradigan o‘qituvchining darsi 
o‘quvchilar uchun zerikarli bo‘ladi, nihoyatda baland gapirish, oddiy 

---

171 
suhbat chog‘ida ovozni baland qilib so‘zlashish o‘quvchilarni darsdan 
bezdiradi va charchatadi. O‘quvchilarning bunday o‘qituvchi ta’limidan 
ko‘ngillari soviydi. Shuning uchun o‘qituvchi savodli gapirishi, o‘z nut-
qini chiroyli va tushunarli, ta’sirchan qilib bayon qilishi, o‘z fikr va his-
tuyg‘ularini so‘zda aniq ifodalash malakalariga ega bo‘lishi lozim. 
Chiroyli, savodli, ta’sirchan gapiruvchi o‘qituvchilarning nutqlari 
o‘quvchilar ongiga tez ta’sir etadi, o‘quv materiallarini oson o‘zlashtirib 
olishiga katta imkoniyat yaratadi, o‘quvchilar bunday o‘qituvchilarning 
darslarini toqatsizlik bilan kutadilar. O‘qituvchilar o‘z nutqlari ustida 
tinimsiz ishlashlari, so‘zlarning chiroyli, ma’noli, ta’sirchan bo‘lishi 
uchun mashq qilishlari, ovoz diapazonlarining kuchi, nutq tembrining ha-
rakatchanligi va diksiyasini doimo mashq qilib borishlari lozim. 
Ovoz diapazoni chegarasi baland yoki past gapirish toni bilan belgi-
lanadi. Diapazonning qisqarishi tovushning past tonligiga olib keladi. 
Past ohangda so‘zlashish o‘qituvchining idrokini bo‘shashtiradi va susay-
tiradi. 
O‘qituvchi tovush diapazonini, uning tembri bilan bog‘lab ishlatsa, 
gaplari chiroyli, mayin, jozibali chiqib, tinglovchilarni o‘ziga jalb etadi 
va o‘quv materiallari mazmuni yanada yaxshi idrok qilinadi. 
O‘qituvchining notiqlik texnikasi so‘zlarni aniq, to‘g‘ri, tiniq eshiti-
larli va tushunarli bayon qilishida namoyon bo‘ladi. To‘g‘ri va mukam-
mal ovoz diksiyasiga ega bo‘lgan o‘qituvchi so‘zlarni ifodali bayon 
qiladi. Ifodali gapirishda til, lab, kichik tilcha, pastki jag‘ ishtirok etadi. 
O‘qituvchi ifodali gapirishi, so‘zlarni talaffuz qilishi uchun yuqoridagi 
organlarni doimo mashq qildirishi lozim. Shunday qilib, pedagogik 
texnikada nutq malakalari muhim ahamiyat kashf etar ekan, o‘qituvchi 
doimo gapirish tempi, ritmi, diksiyasi, ovoz kuchi, diapazoni, harakat-
chanligi ustida mashq qilishi zarur, ushbu jarayon alohida bir faslda 
ko‘rib chiqiladi. 
2. Pedagogik texnika malakalarini mukammal egallash uchun avva-
lo, o‘qituvchi o‘z fanini, o‘qitadigan predmetining boshqa fanlar bilan 
o‘zaro aloqadorlikda bilishi, pedagogik va axborot texnologiyalarini, pe-
dagogika va psixologiya fanlari asoslarini davr taraqqiyoti darajasida 
bilishi, kasbiy jihatdan o‘z-o‘zini tarbiyalay oladigan bo‘lishi zarur. 
Chunki pedagogik texnika o‘qituvchilarning individual shaxsiy xusu-
siyatlariga ham bog‘liq. Har bir o‘qituvchi o‘z tafakkuriga, fikrlash qo-
biliyatiga, o‘zining kasbiy yo‘nalishi, kasbiy laboratoriyasiga ega bo‘lishi 
kerak. Bu yo‘nalish va laboratoriyani o‘qituvchilarning o‘zlari mustaqil 

---

172 
fikr yuritishlari, mustaqil bilim olishlari, pedagogik mahoratini oshirib 
borishlari orqali qo‘lga kiritadilar va mohir o‘qituvchiga xos fazilatlarni 
tarbiyalaydilar hamda kasbiy ideal sari harakat qiladilar. 
3. Pedagogik texnika sirlarini mukammal bilish o‘qituvchining 
tashkiliy - metodik malakalarni egallashiga ham bog‘liq. Bu malakalar 
zarur bilimlar bo‘yicha ma’ruzalarni tinglash, maxsus adabiyotlarni 
o‘qish orqali qo‘lga kiritiladi. Tashkiliy-metodik malakalar aytilgan yo‘l-
yo‘riqlar, ko‘rsatmalarni o‘zining individual kasbiy tajribasida sinab, 
ko‘nikma hosil qilsa maqsadga muvofiq bo‘ladi.
Tashkiliy-metodik malakalarning individual xususiyatlari, jamoa va 
guruh bo‘lib ishlash, o‘qish, faoliyat ko‘rsatish asosida qurilgani ma’qul. 
Chunki guruh yoki jamoa bo‘lib o‘qish, ishlash har bir o‘qituvchiga ref-
leksiv qobiliyatlari asosida, o‘zini boshqalar ko‘zi bilan ko‘rishni va baho 
berishni, faoliyatidagi nuqsonlarni seza bilishni, muomala va xulq-
atvorning yangi shakllarini izlab topish va sinash imkoniyatini beradi. Bu 
esa o‘z-o‘zini bilish, o‘z-o‘zini tarbiyalash uchun asos bo‘ladi va peda-
gogik vazifalarning yangi usullarini tekshirib ko‘rish, nazariy masala-
larini hal qilish uchun tajriba maydonini tashkil qilishga zamin yaratadi. 
Demak, tashkiliy - metodik malakalarni egallashda guruh, jamoa fao-
liyati, mashg‘ulotlar pedagogik texnika asoslarini egallash imkoniyatini 
beradi. 
4. Pedagogik texnikani bir maromda egallashda, har bir o‘qituv-
chining o‘z individual dasturini ishlab chiqishi muhim ahamiyat kasb 
etadi. Bunday dasturni tuzishdan oldin o‘qituvchi o‘zida pedagogik tex-
nika malakalarini shakllanganligining boshlang‘ich darajasini aniqlab 
olish zarur. Ya’ni, o‘qituvchining dastlabki o‘quv-tarbiya ishlaridagi na-
tijalarida, nutq madaniyatining to‘g‘ri yoki noto‘g‘ri qo‘yilishida, hara-
katidagi mimik va pantomimik holatlarda ro‘y beradigan nuqsonlar e’ti-
rof etiladi. Bunda natija yaxshi bo‘lsa, kelajakda pedagogik texnikani 
egallash ancha oson bo‘ladi.
Ushbu faoliyat natijasida ko‘nikma va malakalar yanada rivojlan-
tiriladi. Individual dastur pedagogik texnika malakalarining yetishmaydi-
gan jihatlarini to‘ldirish uchun xizmat qiladi. Bu dastur ma’lum mashqlar 
yoki mashqlar majmuini o‘z ichiga oladi. 
5. Shuni ham unutmaslik lozimki, pedagogik texnikani namoyish 
etishda o‘qituvchining umumiy madaniyati, ma’naviy va estetik dunyo-
qarashi muhim o‘rin tutadi. Agar o‘qituvchining tashqi ko‘rinishi qash-
shoq, so‘zlarni talaffuz qilish qobiliyati past, estetik jihatdan omi, bo‘lar-

---

173 
bo‘lmas voqealarga nisbatan o‘z hissiyotiga erk beradigan bo‘lsa, tarbi-
yalanuvchilarning e’tiqodiga, aql-idrokiga, bilish va anglash tafakkuriga 
salbiy ta’sir ko‘rsatadi. Demak, o‘qituvchi o‘zidagi ana shu nuqsonlarni 
qayta tarbiyalashi lozim.
Ta’kidlash joizki, pedagogik texnikaning ko‘nikma va malakalarini 
egallash yo‘llari to‘g‘risida bildirilgan fikrlarga e’tibor bermaslik, peda-
gogik faoliyat jarayonida ularning beqiyos ahamiyatiga yetarlicha baho 
bermaslik, shuningdek, pedagogik texnika malakalarini tanqidiy, har bir 
o‘qituvchining individual xususiyatlarini hisobga olmay ish yuritish pe-
dagogik mahoratni egallashga salbiy ta’sir ko‘rsatadi va o‘quv-tarbiyaviy 
jarayonda o‘qituvchilarning ta’lim-tarbiyaviy faoliyatida nuqsonlarning 
ko‘payishiga olib keladi. 
Pedagogik texnikani egallashning asosiy yo‘llari o‘qituvchining ma-
laka oshirish kurslariga ishtiroki, ustoz murabbiylar rahbarligidagi mash-
g‘ulotlar (ulardan pedagogik texnika sirlarini o‘rganish) va mustaqil 
(kasbiy jihatdan o‘z-o‘zini tarbiyalash) ishlashdir. Pedagogik texnika 
ko‘nikma va malakalarini egallash individual-shaxsiy salohiyat ekanli-
gini hisobga olib, pedagogik texnikani egallashda va uni takomillash-
tirishda kasbiy jihatdan o‘z-o‘zini tarbiyalash, ya’ni talabalik yillarida 
o‘zida tajribali o‘qituvchilarning shaxsiy fazilatlarini va kasbiy mala-
kalarini shakllantirishga qaratilgan faoliyat yetakchi rol o‘ynaydi, deb ay-
tish mumkin. Kasbiy ideal sari intilishda bu harakat pedagogik texnikani 
egallashda muhim rol o‘ynaydi. 
Tashkiliy-metodik jihatdan pedagogik texnika mashg‘ulotlari indi-
vidual, guruh yoki ketma-ketlikda o‘tkaziladi. Masalan, zarur bilimlar 
ma’ruzalarda yoki tegishli adabiyotlarni mustaqil o‘qish asosida, integ-
ratsion bilimlarni egallash, portal, kompyuter texnologiyalari yordamida 
egallanishi mumkin. Avtomatlashtirishga doir ayrim oddiy harakatlar 
(turli artikulyatsiya, fonatsion nafas olish usullari, relaksatsiya usullari va 
shu kabilar) o‘qituvchi tomonidan muntazam mashg‘ulotlar asosida egal-
lanadi. Tegishli ko‘nikmalarni ishlab chiqish, individual ishlashni dastlab 
o‘qituvchining nazorati va rahbarligida, keyin esa mustaqil ishlash talab 
qiladi. 
Pedagogik texnika malakalarini shakllantirishda o‘qituvchining ja-
moada faoliyat olib borishi va mashg‘ulotlarda o‘z-o‘zini nazorat qilishi 
alohida rol o‘ynaydi. Pedagogik texnika mashg‘ulotlarining bu shaklini 
ancha batafsilroq ochib berish maqsadga muvofiqdir, chunki u hozirga 
qadar o‘qituvchilar uchun mo‘ljallangan o‘quv va metodik adabiyotlarda 
ma’lum darajada ko‘rsatib berilmagan.

---

174 
Har qanday jamoada, xoh o‘qituvchilar, xoh o‘quvchilar jamoasi 
bo‘lsin, o‘qituvchi ular oldida o‘zini boshqa kishilar ko‘zi bilan ko‘rishi, 
hulq-atvor va muomalaning yangi shakllarini izlab topishi va sinab ko‘ri-
shi, o‘zining jamoa bilan birga bajaradigan ishi xususiyatlarini anglashi 
lozim. Shundagina pedagogik faoliyatning individual uslublarini ongli
 
ravishda shakllantirish imkoniyati paydo bo‘ladi. Jamoa shaxsning o‘z-
o‘zini bilishi va o‘z-o‘zini tarbiyalash laboratoriyasi, pedagogik vazifa-
larni hal qilishning yangi usullarini tekshirib ko‘radigan, nazariy va 
amaliy masalalar, turli muammolar muhokama qilinadigan tajriba may-
doni bo‘lib qolishi mumkin. 
Psixologlar pedagogik texnikaning keng imkoniyatlarini jamoa bo‘-
lib o‘rganishni, o‘qituvchilar orasida bunday jamoalarning eng qulay 
miqdorini 10–14 kishidan iborat etib belgilashni ta’kidlab o‘tadilar. Qat-
nashchilarning xuddi shunday miqdori ulardan har birining boshqa o‘qi-
tuvchilar bilan birga faoliyat olib borishda individual psixologik muam-
molarini juda to‘liq ravishda aniqlab hal etish, refleksiv va empatik dara-
jasini jiddiy oshirish, kasbiy pedagogik fahm-farosatini rivojlantirish, 
boshqalarga ta’sir etish vositalarining kengaytirish imkoniyatlarini ochib 
beradi. 
Shu narsa muhimki, guruh qatnashchilari, bo‘lajak o‘qituvchilar kas-
biy hamkorlik jihatidan birga ishlash malakalarini egallashga faol inti-
lishlari, o‘z-o‘zini bilish va kasbiy jihatdan o‘z-o‘zini tarbiyalash bo‘yi-
cha muvaffaqiyatli faoliyat olib borishga psixologik jihatdan tayyor bo‘-
lishlari kerak. 
Barcha hollarda ham individual, ham guruhiy mashg‘ulotlar boshla-
nishidan oldin pedagogik texnikani egallashning individual dasturi tuzib 
chiqilishi lozim. Bunday dasturni tuzish uchun avvalo pedagogik texnika 
malakalarini shakllantirishning boshlang‘ich darajasini aniqlab olish za-
rur. Biroq, tajribalarning ko‘rsatishicha, odatda, mazkur bosqichda faqat 
malakalar haqidagina emas, shu bilan birga dastlab avtomatlashtirilgan 
(ta’limni boshlash vaqtiga kelib) ko‘nikmalar haqida ham mulohazalar 
olib borish mumkin. Masalan, nafas olish va ovozning tabiiy bir holatga 
qo‘yilishi, so‘zlarni to‘g‘ri talaffuz qilish, bundan oldingi tarbiyaviy 
metodlarning natijasi bo‘lgan savodli, ifodali nutq, mimik va pantomimik 
harakatlar bo‘lishi mumkin.
Bunday ko‘nikma va malakalarning mavjudligi pedagogik texnika 
imkoniyatlarini mukammal shakllantirishni ancha osonlashtiradi. Shunga 
qaramasdan barcha hollarda ana shu ko‘nikmalarni tegishli malakalar 

---

175 
tarkibiga kiritish yuzasidan muayyan faoliyat olib borilishi zarur. Peda-
gogik texnika malakalarini shakllantirishning boshlang‘ich darajasiga 
qarab uni egallashning individual dasturi yetishmaydigan malakalarni 
shakllantirishga qaratilgan ayrim mashqlarni yoki ularning to‘liq 
majmuasini ishlab chiqish lozim. 
Pedagog va psixolog olimlar tomonidan olib borilgan tadqiqotlar-
ning ko‘rsatishicha, o‘z faoliyatini endigina boshlayotgan o‘qituvchilar 
duch keladigan qiyinchiliklarning asosiy sababi aynan pedagogik tex-
nikaga oid ma’lumotlarni bilmasligi oqibatida sodir bo‘lmoqda. Peda-
gogik texnika to‘g‘risida yuqorida aytib o‘tilgan fikr va mulohazalarga 
e’tibor qilmaslik, pedagogik faoliyatda nazariy va amaliy tajribalarning 
yo‘qligi, o‘z faoliyatiga tanqidiy nazar bilan baho berolmaslik oqibatida 
hamda o‘qituvchida individual pedagogik texnikani rivojlantirish, tahlil 
qilish va uni takomillashtirish yuzasidan aniq maqsadga qaratilgan peda-
gogik faoliyatning yo‘qligi mazkur qiyinchiliklarning asosiy sabablaridan 
biri ekanligini unutmaslik kerak. 
Pedagogika oliy ta’lim muassasalaridagi kasbiy tayyorgarlik jarayo-
nida pedagogik texnikani egallash bo‘lajak o‘qituvchiga o‘zining kasbiy 
yo‘nalishining boshlanishidayoq ko‘pgina xatolardan holi bo‘lishda, 
talabalarga ta’lim-tarbiya berishning yuksak samaradorligiga erishishda 
yordam beradi.