Aylanib yurib shug’ullanish usuli – darsning ma'lum bir vaqtida o’quvchilar 4-8 kishilik bir necha guruhga bo’linib, o’qituvchi ko’rsatmasiga binoan turli snaryad yoniga yoki mashg’ulot joyiga boradilar va o’qituvchining signali bo’yicha mashqlarni mustaqil bajara boshlaydilar. Ma'lum bir vaqt o’tgach (30-40 sek), o’qituvchi yangi signal beradi va o’quvchilar boshqa snaryad yoki mashg’ulot o’rniga uyushgan holda o’tadilar. Barcha o’quvchilar dars rejasida ko’zda tutilgan hamma mashqlar bilan shug’ullanib bo’lmagunlaricha shu tarzda davom etaveradi. O’quvchilar bir snaryaddan ikkinchisiga o’tib va barcha mashqlarni bajarib, go’yo mashqlar doirasini tugallaganlari uchun bu aylanma usul deyiladi. Bu usulni shuning uchun xam mashg’ulot deb ataydilarki, uning asosiy maqsadga yo’nalganligi shug’ullanuvchilarning jismoniy sifatlari rivojlanish darajasini oshirish va organizmning funksional imkoniyatlarini takomillashtirishdan iboratdir. Bunga mashqlarni muayyan izchillikda, ixtiyoriy yoki berilgan sur'atda, muayyan vaqtda yoki ma'lum miqdorda ko’p martalab takrorlash orqali erishiladi.
Darsda o’quvchilar faoliyatini tashkil qilish usullari qo’yilgan vazifalar, sharoit, o’quvchilar soni va ularning tayyorgarligiga bog’liq. Bundan tashqari, turli usullarning qo’llanishi o’quvchilarning darsga bo’lgan qiziqishini va darsning samaradorligini oshiradi.
