Microsoft Word axloq odob hadis ziyouz com doc

www.ziyouz.com kutubxonasi 
28
384.
(Boshqa) odamlarning xotinlariga nisbatan iffatli bo’linglar, shunda sizlarning xotinlaringizga 
nisbatan ham odamlar iffatli bo’lurlar. Ota-onalaringizga qanday yaxshi muomalada bo’lsangiz, 
farzandlaringiz ham sizlarga shunday muomalada bo’ladilar. Kimning oldiga uzilishib ketgan birodari 
uzr so’rab kelsa, u xoh haq bo’lsin, xoh nohaq bo’lsin, uzrini qabul etsin. Agar qabul etmasa, 
jannatdagi Kavsar havzi suvidan mahrum bo’lur. 
385.
Har bir mo’min kishiga sadaqa qilishlik vojibdir. Agar sadaqaga narsa topolmasa, ishlab o’ziga 
va sadaqaga narsa topsin. Unga ham qurbi yetmasa, muhtojlarga yordam bersin. Uni ham qilolmasa, 
odamlarni yaxshi yo’lga yo’llasin. Uni ham qilolmasa, odamlarni yomonliklardan qaytarsin, shu bilan 
sadaqa qilganning savobini topaveradi. 
386.
Bolalaringni suzishga va o’q otishga o’rgatinglar. Qiz farzandlaringiz uyda tikish-bichish ishlari 
bilan shug’ullangani yaxshi. Agar ota-ona birdaniga chaqirib qolishsa, avval onaga javob qil! 
387.
Bilganlaringizni boshqalarga ham bildiringlar. Dinni oson qilib ko’rsatinglar, qiyin qilib 
yubormanglar. Odamlarni suyuntiradigan gaplardan gapiringlar, ularni turli tahdidlar bilan qo’rqitib, 
bezdirib qo’ymanglar! G’azabingiz xuruj qilsa, sukut saqlanglar! 
388.
Odamlarning qo’lidagi narsadan umid qilma. Tamagirlikdan saqlan, chunki u faqirlikning naqd 
o’zidir. Namozlaringni xuddi vidolashayotgan odamdek o’qinglar. Qilgilikni qilib qo’yib, so’ng uzr 
so’raladigan ishdan saqlaninglar. 
389.
Odamlar bilan xushmuomala bo’linglar. Odamlarga qattiqqo’llik qilib behayo so’zlamanglar! 
390.
Har bir ishda o’rtahollik lozimdir. Hatto dinda ham ibodatlarga qattiq berilib ketgan odam oxiri 
o’zi mag’lub bo’ladi. 
391.
Ilm ibodatdan afzaldir, taqvo dinni tutib turuvchi (ustun)dir. 
392.
Ilm ikki xildir: biri qalbdagi ilm bo’lib, u foydalidir. Ikkinchisi tildagi ilm bo’lib, u Tangri huzurida 
banda zarariga dalil bo’ladi. 
393.
Eshikni taqillatayotgan odam o’zining kimligini ham bildirsin. “Kimsiz?” desa, otini aytmay 
“Men”, deb javob berishlikni Rasululloh yoqtirmas edi. 
394.
Folchilik, irm-sirim butparastlik bilan barobardir. 
395.
Yo’lda yotgan tikan shoxlarini olib tashlagan odamning oldingi-yu keyingi gunohlarini Tangri 
kechiradi. 
396.
Bir fohisha ayol chuqur quduq boshida chanqab o’lay deb turgan itga oyoqlaridagi etigini 
yechib, unga ro’molini bog’lab quduqdan suv chiqarib berib, uni o’limdan qutqarib qolibdi. Bu ishi 
evaziga Tangri uning gunohidan kechibdi. 
397.
Odamlarni chalg’itib nohaq yo’lga boshlovchi imomlar dajjoldan
43
ham xavflidirlar. 
398.
Yonayotgan o’t o’tinni qanday kemirsa, birovlarni ko’rolmaslik va hasadgo’ylik savoblarni ham 
shunday qiyratadi. 
43
Dajjol – qiyomatga yaqin chiqib, odamlarni yo’ldan adashtiradigan bir inson. 

---

Axloq-odobga oid hadis namunalari