Seçmə aşıq şeirləri
90
LALƏ
Yarın qanlı köynəyitək,
Qızarır yol üstə lalə.
Xançobanı gətir dilə,
Bir şirin can istə, lalə.
Dərdim dönüb hekayətə,
Canım dözmür bu zillətə.
Yar məzarın ziyarətə
Gəlib dəstə-dəstə lalə.
Hara getsən gələrəm mən,
Ahu kimi mələrəm mən.
Bəsti deyər: ölərəm mən,
Bu dağlardan getsə lalə.
91
DAĞLAR
Dağ üstündən çəkdin dağı,
De, nəydi günahım, dağlar,
Sən mənə kəsildin yağı,
Tutsun səni ahım, dağlar.
Qara gəlibdi dövranım,
Əl vurma, tökülər qanım,
Hanı mənim Xan Çobanım,
Oydu qibləgahım, dağlar.
Niyə belə yazdı fələk? –
Ayrılığa dözmür ürək,
Bəsti kimi sən də qal tək,
Olmasın pənahın, dağlar.
|
