Referat mavzu: "Markaziy asab tizimi " Bajardi: 401 -guruh G`aniyeva K. Tekshirdi: b f. n. Ismayilova M. A
Yüklə 107,29 Kb.
|
|
Keyingi miya.
Keyingi miya uzunchoq miya bilan Varolio ko’prigidan iborat. Uzunchoq miyaning asosiy funksiyalari unda hayot uchun muhim markazlarning borligidan kelib chiqadi. Bundan tashqari, orqa miyadan markazga intiluvchi yo’llar, shuningdek bosh miyaning yuqoridagi bo’limlaridan markazdan qochuvchi yo’llar keyingi miya orqali o’tadi. Uzunchoq miyadagi ba’zi nerv hujayralarining o’siqlari orqa miyaning turli bo’limlariga boradi va uzunchoq miya bilan orqa miyani bir- biriga bog’laydi. Boshqa nerv hujayralarining o’siqlari esa, uzunchoq miyadan kelib chiqib, bosh miya nervlarini hosil qiladi. Uzunchoq miyada nerv hujayralarining to’plamidan vujudga keladigan markazlar muhim reflektor aktlarni yuzaga chiqaradi. Yuqorida aytilganidek, uzunchoq miyada hayot uchun muhim bir qancha markazlar bor. Jumladan, nafas markazi, yurak faoliyati markazi, tomirlarni harakatlantiruvchi markaz, modda almashinuvini idora etadigan markaz uzunchoq miyadadir. Bu markazlarning fiziologiyasi darslikning tegishli boblarida mukammal bayon qilingan. Nafas markazida qo’zg’alish reflektor yo’l bilan, shuningdek qonning ximiyaviy tarkibining ta’siri tufayli kelib chiqadi. Adashgan nervning markazga intiluvchi tolalari orqali o’pkadan keluvchi impulslar nafas markazini refleks yo’li bilan uzluksiz qo’zg’ab turadi. Qondagi karbonat angidrid asosan ximiyaviy ta’sirlovchi ekanligini yuqorida aytilganlardan bilamiz. Shunday qilib, nafas markazining faoliyati refleks yo’l bilan ham, ximiyaviy yo’l bilan ham idora etiladi. Yurak faoliyatining markazi nerv hujayralarining to’plamidan iborat. Bu markazning asosiy ahamiyati yurakning ishini idora etishdan iborat. Nafas markazi kabi, yurak faoliyatining markazi ham refleks yo’l bilan va ximiyaviy moddalar ta’siri bilan qo’zg’aladi. Aorta yoyidan va umumiy uyqu arteriyasining tashqi hamda ichki uyqu arteriyalariga bo’linadigan joyidan boshlanuvchi reflekslar yurak faoliyati markazining refleks yo’l bilan qo’zg’alishiga misol bo’la oladi. Yurak-tomir tizimining boshqa ko’p qismlari kabi shu qismlarida ham qon bosimi oshganda yurak faoliyati refleks yo’li bilan tormozlanadi. Tomirlarni harakatlantiruvchi umumiy markaz ham reflektor va ximiyaviy ta’sirlar ostida bo’ladi. Bu markaz orqa miyadagi tomirlarni harakatlantiruvchi markazlarning faoliyatiga ta’sir etadi. Aorta yoyidan va uyqu arteriyasidan boshlanuvchi refleks (yuqoriga qaralsin) tomirlarni harakatlantiruvchi markazning faoliyatiga ta’sir etib, tomirlarni kengaytiradi. Simpatik nerv tizimi esa tomirlarni toraytiradi. Modda almashinuvi markazlari modda almashinuvini idora etadi. Uzunchoq miyaning muayyan qismlariga igna sanchilganda siydik bilan qand chiqa boshlaydi yoki suv va tuz almashinuvi buziladi. Ovqat hazm qilishga aloqador bo’lgan bir qancha reflekslarning markazlari ham uzunchoq miyadadir. So’rish, so’lak chiqarish, me’da osti bezi bilan me’da bezlaridan shira chiqarish, ovqatni chaynash, yutish uzunchoq miyadagi markazlarning reflektor faoliyatidan kelib chiqadi. Bu reflekslarning yuzaga chiqishida bosh miya nervlari qatnashadi. Hozir aytilgan reflekslarning yoylari bosh miya nervlaridan tashkil topadi. Masalan, ovqat chaynash refleksining yoyi til-halqum nervining markazga intiluvchi tolalaridan va uchlik nervining markazdan qochuvchi tolalaridan iborat. Uchlik nervining markazga intiluvchi tolalari va yuz nervi bilan til-osti nervlarining markazdan qochuvchi tolalari so’rish refleksining yoyiga qo’shiladi. Uzunchoq miyada ba’zi reflekslarning markazlari bor. Aksa urish, yo’talish, ko’zni yumib-ochish, ko’zdan yosh chiqarish va qusish markazlari shular jumlasidandir. Nihoyat, gavda vaziyatiga aloqador reflekslar va bo’yin muskullari bilan tana muskullari tonusining o’zgarishi uzunchoq miyaning faoliyatiga bog’liq. Quloqdagi vestibulyar apparatning labirintlarida kelib chiqadigan qo’zg’alish vestibulyar nerv orqali uzunchoq miyaga o’tib, bo’yin va tana muskullarining tonusini hamda gavda vaziyatini refleks yo’l bilan o’zgartiradi. Agar bosh miya uzunchoq miyaning yuqori chegarasi damidan qirqib qo’yilsa, muskullar tonusi, birinchi galda qo’l-oyoq va bo’yin muskullarining tonusi juda ham o’zgarib ketadi. Tanani rostlovchi muskullar va qo’l-oyoq muskullarining tonusi juda kuchayadi. Bunday hayvonning hamma muskullari tarang tortadi, old va orqa oyoqlari yozilganicha bukilmaydi, boshi orqasiga qayriladi. Stolbnyakka o’xshaydigan bunday holat ko’pincha bir kecha kunduzdan ortiq davom etadi. Ana shunday hayvon turg’izib qo’yilsa, old va orqa oyoqlarini bukmasdan soatlab turaveradi. O’rta miya bilan uzunchoq miyaning bog’lanishi uzilib qolganda, muskullar tonusi yuqorida tasvir etilganicha o’zgaradi. Tajribada o’rta miya uzunchoq miyadan ajralmay qolsa, muskullar tonusi bunday o’zgarmaydi. Uzunchoq miyadan ko’ra pastroqdan kesish tonusni hyech bir o’zgartirmaydi. Bu kuzatishlar shuni ko’rsatadiki, uzunchoq miya muskullar tonusiga juda kuchli ta’sir ko’rsatadi, lekin uning markazlari bu tonusni idora eta olmaydi. Muskullar tonusini idora etish vazifasini miyaning yuqoridagi bo’limlari, birinchi galda o’rta miya ado etadi. Yüklə 107,29 Kb. Dostları ilə paylaş:
|