Sotsiologiyaa

Sotsial – demografik munosabatlar
Sotsiologiyada jamiyat ijtimoiy tarkibiy tuzilishida ijtimoiy-demografik munosabatlar ham muhim o’rin tu­tadi. Bu munosabatlar asosan, aholining jinsiy tuzilishi, yoshi, oilaviy va genetik jihatlarini o’z ichiga oladi.
Har qanday davlat ijtimoiy siyosatining tarkibiga demografik siyosat ham kiradi. Demografik munosabatlarga mamlakat aholisining barcha qatlamlari mansub. Ijtimoiy-demografik tarkibga statistik jihatdan o’rganiladigan aholi o’rtasidagi tug’ilish, o’lim, nikoh, oila­viy qo’ydi-chiqdilar, shahar va qishloq aholisining migratsiyasi, hududiy migratsiya kabilar kiradi.
O’zbekiston ijtimoiy-demografik jihatdan nihoyatda murakkab tuzilishga egadir. Bugungi kunda mamlakatimizda yoshlar jami 27,5 mln. aholimizning 64 foizini tashkil etmoqda (I.A.Karimov asarlari. T.16.-234-b.). Tub aholining 51 foizi xotin-qizlar, 9,6 mln. nafari 16 yoshgacha bo’lgan bolalar va o’smirlardan iborat. Farg’ona vodiysi aholisining zichligi juda katta. Andijonda har bir kvadrat kilometr maydonga 485 nafar odam tug’ri keladi. Bunday demografik holat jamiyat hayotining boshqa barcha sohalarida ham turli muammolarni keltirib chiqarishi tabiiy.
Aholining yosh jihatdan tarkibiy tuzilishini o’rganish mamlakatning nafaqat mehnat va ishlab chiqarish potentsialini aniqlashga, balki uning rivojlanish dinamikasini ham aniqlashga xizmat qiladi. Bu jihatdan O’zbekiston ba`zi Evropa va Yaponiya mamlakatlariga nisbatan «yosh» mamlakat hisoblanadi.
Aholi tarkibiiing jinsiy tuzilishini o’rganish ham muhim ahamiyatga ega. Bu mamlakat ishlab chiqarishini tashkil etish, ayollar uchun qulay mehnat turlarini tashkil qilish va ish bilan ta`minlashda muhim ahamiyat kasb etadi. Xotin-qizlar ijtimoiy ahvolining o’ziga xos xususiyatlari ularning mehnat bilan bandligi, mehnat turi, oilaviy, turmush sharoiti va shu kabilarda ko’rinadi. Ularni og’ir jismoniy mehnatdan xalos etish masalasi hozirda eng muhim masalalardandir. Sobiq sho’ro davrida o’zbek xotin-qizlari qishloq xo’jaligida ayovsiz ekspluatatsiya qilindi. Natijada, ularning salomatligi keskin yomonlashdi. Kasalmand, nimjon onalardan hech qachon sog’lom farzand dunyoga kelmaydi. O’zbek yoshlarining har uchtadan bittasi, hatto harbiy xizmatga qodir bo’lmay qolgan edi. Prezident I. A. Karimov tashabbusi bilan ilgari surilayotgan «Sog’lom avlod davlat dasturi»ni hayotga tadbiq etish uchun kurashish millat kelajagini ta`minlashning eng muhim masalasidir.
Aholining oilaviy tarkibi oila soni, moddiy turmush darajasi, daromadi, oilaviy munosabatlarni va shu kabi masalalarni o’z ichiga oladi. Oilani oziq-ovqat va iste`mol mollari bilan ta`minlash muammolari davlat ijtimoiy siyosatining asosiy maqsadini ifoda etadi. Oila tarkibini Sotsiologiyaning maxsus sohasi – «Mikrosotsiolagiya»da ham chuqur tadqiq qilish maqsadga muvofiqdir. Unda uning iqtisodiy, psixologik jihatlarini e`tiborda tutish zarur. Nikoh munosabatlari, yolg’iz yashovchilarni, oilaviy buzilish sabablarini o’rganish jamiyat hayoti ijtimoiy tarkibini ijobiy rivojlantirishda katta ahamiyatga ega.
Oddiy bir misol: diniy munosabatlarda ilgari nikoh muqaddas sanalar edi. Sobiq sho’ro tuzumi davrida dinning ijtimoiy hayotdagi mavqeyga putur etkazilishi va dahriylikning kuchayishi oqibatida nikoh munosabatlariga muqaddas deb qaralmay qo’yildi. Nikoh shunchaki rasmiy ro’yxatga olishdan iborat bo’lib qoldi. Natijada, oila muqaddasligi yo’qolib, qo’ydi-chiqdilar ko’paydi. Bu esa jamiyatning nafaqat iqtisodiyotiga, balki ma`naviy-axloqiy, psixologik munosabatlarning barqarorligiga ham salbiy ta`sir ko’rsata boshladi, o’z navbatida, noaxloqiy tendentsiyalarning kuchayishiga olib kelib, yosh avlod tarbiyasiga zarar etkazildi. Jamiyatda tirik etimlar soni ko’paydi. Davlat etimxonalarining soni ortdi. Moddiy va boshqa jihatdan etarlicha ta`minlanganligiga qaramay ularda tarbiya topgan bolalar oilada, o’z ota-onalari bag’rida voyaga etgan bolalardan farq qila boshladi.
Sotsiologiyada aholining genetik tarkibini o’rganish borgan sari moddiy ahamiyatga ega bo’lmoqda. Unga aholining tabiiy va migratsiya harakati kiradi. O’zbek millati boshqa millatlarga nisbatan o’z tug’ilib o’sgan joyiga ko’proq bog’langan bo’ladi. Ayniqsa, Farg’ona vodiysi aholisida bunday xususiyat kuchli. SHuning uchun ham vodiyda aholi zichligi boshqa hududlardagiga nisbatan ancha yuqori darajada.
O’zbekistonda genetik tarkibni o’rganishga hozircha etarli e`tibor berilmagan. Ta`kidlash joizki, bu holatning ijtimoiy-demografik munosabatlardagi ahamiyati juda kattadir.
Ijtimoiy-demografik munosabatlarni aniqlashda mam­lakat miqyosida o’tkaziladigan aholini ro’yxatga olish mu­him o’rin tutadi. Aholining ro’yxatga olinishi, ayniqsa, hozirgi bozor munosabatlariga o’tish davrida yuzaga kelayotgan ko’plab ijtimoiy-iqtisodiy, maishiy turmush sohalaridagi muammolarni hal etishda juda katta rol o’ynaydi. Ayniqsa, uning shahar muammolarini hal etishdagi ahamiyati katta.
Qishloq aholisining ijtimoiy tarkibi jamiyat ijtimoiy tarkibining muayyan bo’lagi hisoblanadi. Qishloq aho­lisi ijtimoiy munosabatlarining muhim belgilari: yagona mehnat, er, mulkiy boshqaruv munosabatlari va boshqa shu kabilar. Hozirda qishloq aholisining tarkibida ham tabaqalashuv jarayoni kuchaymoqda. Ayniqsa, qishloqqa sanoatning kirib kelishi, qishloq hayotining mahalliylashuvi (lokalizatsiyalashuvi), savdo-sotiqning rivojlanishi va boshqa omillar oqibatida qishloq aholisi turli guruhlardan ibo­rat bo’lgan ijtimoiy birlik sifatida rivojlanmoqda.