viruslar qoʻzgʻatadigan, kelib chiqishi bir-biriga oʻxshash oʻtkir infeksion kasalliklarning umumiy nomi. Nafas yoʻllari (burun, hiqildoq, kekirdak, bronxlar) shilliq pardalari, koʻz shilliq pardasi — konʼyunktivaga zarar yetishi bilan kechadi. Oʻtkir respirator kasalliklarning qoʻzgʻatuvchilariga adenoviruslar, paragripp viruslari, rinoviruslar va boshqalar kiradi. Oʻtkir respirator kasalliklark.ning ayrim (sporadik) guruhlari koʻproq kuzatiladi, lekin ular aholining butun bir guruhini ham qamrab olishi mumkin.
Har qanday virusli infeksiya bemordan havo-tomchi (gaplashganda, aksirganda, yoʻtalganda) yoʻli orqali yuqadi. Kasallik qoʻzgʻatuvchi viruslar yuqori nafas yoʻllariga (burun, hiqildoqqa) tushadi, shilliq parda (epiteliy)ning tashqi qavatidagi hujayralarga kirib, ularni yemiradi, bunda qoʻzgʻatuvchilarning bir qismi nobud boʻlib, zaharli modda (endotoksin) ajratadi va organizmni zaharlaydi (intoksikatsiya). Virus saqlovchi poʻrsildoq hujayralar koʻchib tushadi va bemor gaplashganda, yoʻtalganda, aksa urganda tupuk, burun shilligʻi va balgʻam bilan havoga tushib, atrofdagilarga yuqadi. Kasallik uy anjomlari (idish-tovoq, sochiq, oʻyinchoqlar va h.k.)dan ham yuqishi mumkin. Oʻtkir respirator kasalliklarni shartli ravishda mavsumiy kasalliklar deb atash mumkin, chunki bu guruh kasalliklar kech kuz va qishda koʻproq kuzatiladi.
