Buxgalteriya hisobi. Har bir xo‘jalik yurituvchi subyekt o‘z faoliyatini ro‘yxatdan o‘tgan, tasdiqlangan Nizom asosida olib borish uchun javobgardir, o‘z navbatida, mulkning to‘liqligi, joylanishi va tashkil topishini o‘z nazoratiga oladi. Bu vazifaning bajarilishi mulk egasiga tegishli mablag‘lar holatini o‘rganish uchun asos yaratadi.
Xo‘jalik yurituvchi subyektlar faoliyatida mablag‘larning bir turdan ikkinchi bir turga o‘tishi, ularga bo‘lgan ehtiyojning qondirilishini doimiy nazorat qilishni talab qiladi. Yuqoridagi vazifalarni bajarishda mulkdor shunday hisob tizimini talab qiladiki, u hisob turi, birinchidan, mablag‘lar harakati to‘g‘risida mulkdorga o‘z vaqtida yetarli ma’lumot beradi, ikkinchidan, xo‘jalik operatsiyalarining muntazam to‘g‘riligini nazorat qiladi, uchinchidan, mahsulot tannarxini aniqlash imkoniyati yaratiladi. Bu hisob turi buxgalteriya hisobi hisoblanadi.
