Alisher navoiy nomidagi toshkent davlat

Inverison-(almashtirish) axborotlarni turli tomondan o’rganish, o’rnini almashtirish xususiyatiga ega bo’lib, tafakkur (fikrlash) tizimini shakllantiradi.
Integrativ-(yaxlitlash) axborotlarni tashkil qiluvchi cheksiz ko’p kichik qismlarning o’zaro ajralmas bog’liqligi, ularning yaxlitligi, bir butunligi asosida yagona to’g’ri xulosani aniqlash.
Adaptiv-(moslashtirish) axborotlarni va ulardan foydalanish jarayonini o’rganish hamda o’rgatish uchun qulaylashtirish, moslashtirish asosida kutilgan natijaga erishish.
Inklyuziv-(tenglik) o’qituvchi bilan o’quvchining o’zaro munosabatlarida tenglik asosida ta’lim tarbiya jarayonini tashkil qilish. Shu bilan birga, imkoniyati cheklangan o’quvchilarning sog’lom o’quvchilar bilan birgalikda o’qishini tashkil qilish pedagogik texnologiyasi.
Pedagogik texnologiyaning asosiy yo’nalishlari hozirgi an’anaviy ta’limni turli yo’nalishlarda takomillashtirish maqsadlarida yaratilib, hozirda rivojlanib bormoqda. Turli fan o’qituvchilari tomonidan har bir o’quv fanining asosiy xususiyati, mazmunining tarkibi, amaliy, nazariy qismlarining nisbatiga muvofiq ravishda eng qulay pedagogik texnologiyalarning empirik, kognitiv, evristik, kreativ, inversion, integrativ ,adaptiv, inklyuziv va boshqa yo’nalishlarini to’g’ri tanlash jiddiy ahamiyatga ega.
Abdulla Qahhor ulug' rus yozuvchisi A.Chexovning “Qisqalik - iste'dod singlisi” degan iborasini juda e'zozlardilar. Suhbatlarning birida u “Bemor” hikoyasining birinchi jumlasini qanday yozganini, 30 da yaqin varaqni qoralab, nihoyat eng qisqa, eng aniq ifoda topganini aytib bergan edi: “Sotvoldining xotini og'rib qoldi”. Ustozning “Mahalla» hikoyasiga mening to'rt satr she'rim epigraf qilib olinganidan hali ham boshim osmonga yetadi” misralari kimning qalamiga mansubligini aniqlashni berdik.
Kuzatganimiz, bir qator adabiyot o‘qituvchilarining Abdulla Qahhor ijodini, uning “O‘g‘ri”, “Dahshat”, “Bemor” hikoyalarini o‘rganish yuzasidan tavsiya etayotgan metod va usullari rang-barangligi, keng qamrovliligi bilan “yarq” etib e’tiborimizni o‘ziga jalb qilsa-da, shakliy ustunlikning yuqoriligi, asosiy ob’ekt – asar matnidan uzoqlashish holatining yetakchiligi, tavsiya etilayotgan metodlar qo‘llanayotgan darslar ko‘proq sahna tomoshalarini eslatishi, darsning ilmiylik tamoyili biroz “parda ortida qolib”, usullar tovlanishining ustuvor bo‘lishi, o‘quvchilarning bilim va ko‘nikmalarini sinovdan o‘tkazish, darsni mustahkamlash, badiiy tafakkurini shakllantirish maqsadida berilayotgan savol va topshiriqlarning aksariyati faktologik xarakterga ega ekanligi, garchi adibning hikoyalari o‘rganilayotgan bo‘lsa ham biror o‘rinda o‘quvchilarga hikoya janri haqida nazariy bilimlar berishning ko‘zda tutilmagani kabi yetishmovchiliklarga (xato va kamchilik so‘zini qo‘llashni joiz topmadik) boyligi bilan e’tirozlarimizga sabab bo‘ladi. Albatta, dars - muqaddas jarayon. Uni tashkil etish, o‘quvchilarni qiziqtirish, maqsadga erishish oson kechmaydi. Bu borada o‘qituvchilarimizning tutgan yo‘llarini, qo‘llagan metod va usullarini e’tirof etib, amaliyotda keng qo‘llanishini
tavsiya etamiz, metodik tavsiyalar berayotgan o‘qituvchilarimizga hurmatimizni izhor qilamiz.
Bizningcha, dars jarayonida o‘quvchi va o‘qituvchi shaxsining o‘rni modulatsiya qilinib turiladi: o‘qituvchi – sub’ekt, o‘quvchi – ob’ekt, iste’molchi; o‘quvchi – sub’ekt, o‘qituvchi – kuzatuvchi, nazoratchi. Yangilangan pedagogik tafakkur o‘quvchi shaxsini ko‘proq sub’ekt, jarayonning faol ishtirokchisi, “kashfiyotchi”si sifatida bo‘y ko‘rsatishini; loqayd, beparvo, e’tiborsiz tinglovchisi bo‘lmasligini istaydi va bu yo‘lda qat’iy harakat qiladi.

Abdulla Qahhor ijodini o‘rganish darslari o‘tmish bilan bugun o‘rtasidagi ko‘prik; hayot dinamikasining badiiy tasviri; so‘z qudratining yorqin ifodasi; hayot, yashash suratining asl oq-qora in’ikosi; fikrlar, mushohadalarga turtki beruvchi botiniy qudrat; bugunning shukronasini teran tuyish uchun ma’naviy ibrat, ma’rifiy ozuqa sifatida baholanishi, his etilishi, voqelanishi juda muhimdir. Buning uchun quyidagi bosqichlarni namuna sifatida havola qilamiz:

1. 
   O‘quvchilarni asar matni bilan atroflicha tanishtirish. Abdulla Qahhorning “Dahshat” hikoyasi umumta’lim maktablarining 7-sinfida o‘rganilib, o‘quvchi hikoya matni bilan tanishgach, u haqida ijodiy fikrlaydi. Hikoyadagi qahramonlar ruhiy holatini tushunishga, unda adib qo‘llagan tasvir usullarini tahlil etishga harakat qiladi.
   
2. 
   Matn mazmuni yuzasidan reja tuzish, muhimni nomuhimdan ajratish. Avvalo, o‘quvchi “Dahshat” hikoyasi mazmuniga mos reja tuzishi lozim. Reja quyidagicha bo‘lishi mumkin:
   

1. 
   Hikoyaning g‘oyaviy yo‘nalishi
   
2. 
   Olimbek dodxo xonadoni
   
3. 
   Hikoyadagi ayollar timsoli
   
4. 
   Yozuvchi mahoratining o‘ziga xosligi.
   

Asardagi muhim tasvirlardan biri bu – Unsunning qanday dahshatli ish bo‘lsa ham uni bajarib, ozodlikka erishish orzusidir. Shu yo‘lda jonini ham ayamagan qiz obrazi o‘ziga xos tarzda chizilgan.

3. 
   O‘z fikrini asoslash uchun matndan misollar keltira olish. O‘quvchi hikoyani o‘rganar ekan ifodalayotgan fikrlariga monand hikoya matnidan misollar keltira olishi lozim. Chunki fikr tasdig‘iga xizmat qiluvchi misollar bo‘lmasa ilgari surilayotgan mulohazalar asoslanmaydi.
   
4. 
   Topshiriqni bajarishda mavzuga aloqador qo‘shimcha manbalardan foydalanish. Qahhor ijodi yuzasidan ko‘pgina tadqiqotchilar izlanishlar olib borgan. Adibning ayrim asarlari haqida ko‘plab maqola, risola, monografiyalar e’lon qilingan. M.Qo‘shchonov, U.Normatov, S.Sodiq, R.Qo‘chqor va boshqa adabiyotshunoslarning tadqiqotlaridan foydalanish o‘quvchi ijodiy fikrini o‘sishiga yordam berishi shubhasizdir⁸.
   
5. 
   Tahlilda o‘rganilayotgan asarning janriy xususiyatlarini hisobga olish. O‘quvchi o‘rganayotgan asarining janrini hisobga olishi zarur. Chunki har bir janrning o‘ziga xos janriy xususiyatlari mavjud. Ma’lumki, hikoyada qahramon hayotining muayyan bir davri berilib, unda ko‘pincha xulosa kitobxonga havola qilinadi. Unda kam sonli qahramonlar ishtirok etadi. Qahhor hikoyalarini o‘rganishda shu janrga xos xususiyatlarni ham e’tiborga olish lozim. Qahhor hikoyalarini o‘rganishda tilining sodda, fikrning aniq va lo‘nda ifodalanishi, xalq maqol va iboralarining ko‘p qo‘llanilishiga e’tibor berish lozim.
   
6. 
   O‘quv topshirig‘idan ko‘zlangan maqsadni to‘g‘ri anglab yetish, mustaqil xulosa chiqarish. O‘quvchi o‘quv topshirig‘ida berilgan maqsadni to‘g‘ri tushunishi, undan muayyan xulosalarga kelishi lozim. “Dahshat” hikoyasidan kelib chiqadigan xulosa insonni erkin va ozod yashashi hamma narsadan ustun turadi.
   

⁸ Qarang: Abdulla Qahhor: shaxs va ijodkor. : maqolalar to’plami. – T.: Tamaddun, 2013

3. 
   O‘z fikrlarini yozma va og‘zaki tarzda ravon bayon qilish. O‘quvchi nafaqat fikrini yozma ifoda etishi, balki yozgan fikrlarini og‘zaki ham aytib bera olishi lozim. Anashundagina ularda ijodiy fikrlash ko‘nikmalari hosil bo‘ladi.
   

Adabiy ta’limda o‘quvchini, Abdulla Qahhor asarlarini (bu o‘rinda ta’kidlash joizki, o‘rganishga tavsiya etilayotgan barcha adiblarimiz asarlarini) o‘rganishga kirishar ekan, har bir gap birikma so‘z qatiga yashiringan sirdan voqif bo‘lishga, uni idrok qilishga; hissiy ta’sirlanishga, mushohada yuritishga o‘rgatish asosiy vazifalardandir.
“Bemor” hikoyasi tahliliga kirishilar ekan birinchi jumlaning o‘ziyoq o‘quvchi tafakkuriga turtki berishi lozim – Sotiboldining xotini og‘rib qoldi. Hamma narsa, voqea shundan boshlandi. Sotiboldining xotinini og‘rib qolishi – bu oila tanazzulining muqarrarligi, bu o‘zi halovatsiz o‘tayotayotgan kunlarning yanada faysiz, halovatsiz bo‘lishi; ruhiy azoblarning avjga minishi; “Osmonning yiroq, erning qattiq bo‘lishi”; adoqsiz ma’naviy qiynoqlar, moddiy tahqirlanishlarning yanada palak otishi. O‘quvchilar agar shu birgina jumla ortida shuncha “yuk” borligi his qilsalar, idrok qila bilsalar, muhimi, undan zaruriy xulosalar yasay olsalar shubhasiz, katta yutuq qo‘lga kiritilgan bo‘ladi. O‘quvchi asar yakunida o‘zi uchun zaruriy sanalgan talablar tizimini ishlab chiqadi: doimo sog‘lom bo‘lishga intilish kerak, sog‘lom turmush tarzi – farovonlik garovi, sport bilan shug‘ullanish zarur; zararli odatlarga (ichish, chekish) ko‘nikma hosil qilmaslik kerak, sog‘ligim- boyligim, uni avaylab-asrash o‘z qo‘limizda.
Taniqli adabiyotshunos olim Ibrohim Haqqul “Tafakkur” jurnalining 2007 yil 4-sonida “Abdulla Qahhor jasorati” nomli esseni e`lon ettirdi. Abdulla Qahhor asarlari bir mo‘jiza ekanini ko‘pchilik e’tirof etgan. Jumladan, atoqli adib Shukur Xolmirzaev «O‘zbek adabiyotida ana shunday mo‘jizalarni yaratib, qoldirib ketgan insonga topinish mumkin», deydi. Men, deb yozadi adabiyotshunos olim Ibrohim Haqqul, aqlimni taniganimdan buyon Abdulla Qahhorning shaxsini ham, asarlarini ham yaxshi ko‘rganman. Qolaversa, chinakam buyuk adibga topinishning nimasi ayb? Lekin hozir boshqa bir gapni aytishim lozim deb o‘ylayman. Yetmishinchi yillarning oxirlarida Abdulla Qahhorga mening munosabatim bir oz o‘zgargan edi.
Bunga Toshkentga kelib yashay boshlaganimdan keyin ayrim adabiy davra va suhbatlarda Qahhor haqida murosasizlik ila aytilgan tanqidiy mulohazalarni eshitishim ham sabab bo‘lgandir. Endi Qahhorga muxolif kayfiyatdagi yosh ijodkorlarga ham duch kelish mumkin edi. Ulardan ba’zilari Qahhorni «sochidan tirnog‘igacha sho‘ro yozuvchisi» ekani uchun qoralasa, boshqa birlari uning Cho‘lpon to‘g‘risida aytgan ikki jumla gapini dastak qilib aybnoma to‘qir edi. Xullas, Qahhorning hatto hikoyanavislikdagi yutuqlari ham nazarga ilinmas, uning eng sara, eng o‘qishli hikoyalari ham past baholanardi. Kunlardan bir kun ikki-uch yaxshi hikoyasi bilan tanilib qolgan yozuvchi birodarlarimizdan biri bunday degan edi: «Abdulla Qahhor hikoya yaratmaydi — to‘qiydi. Hikoya yasaydi. O‘tmish mavzuidagi hikoyalari esa tarixni ayblash, tarixga qora chaplash uchun qilingan ishlardir...» Oxirgi, o‘tmishga tegishli jumlalar menda ham e’tiroz tug‘dirmagan. Chunki Qahhorning asarlarini o‘qib, tarixdan faxrlanolmaysiz, tarixga suyanolmaysiz, tarixdan ruhiy madad ololmaysiz. Ularning deyarli barchasida moziy juda nursiz, surursiz va qop-qora bo‘yoqlarda – qalbni g‘am-g‘ussaga chulg‘aydigan manzaralarda namoyon bo‘ladi.
Abdulla Qahhorning o‘ttizinchi yillarda yozilgan «Bemor», «O‘g‘ri», «Anor»,
«Millatchilar» kabi hikoyalari menga yoqqan. Ularni o‘qib, «Xayriyat, shafqatsiz, adolatsiz, o‘sha tengsizlik zamonlari barham topgan. Xayriyat, xalqimiz o‘sha kulfat, musibat, son- sanoqsiz baxtsizliklardan xalos bo‘lgan», deb o‘ylaganman. Ammo bir kun kelib, «Nainki, ho‘kizidan ayrilgan musibatdiyda bir mo‘ysafidga hech kim rahm qilmasa, axir amaldor ham odam-ku!.. Nainki, bemor xotinga go‘dakning saharlari qiladigan duosidan boshqa davo topilmasa; nainki, sog‘- salomat yigit boshqorong‘i xotiniga ikki donagina anor olib berolmasa...» qabilidagi e’tirozlar menda ham paydo bo‘lishini o‘ylamaganman. Ammo shunda ham negadir Qahhorni o‘qishdan o‘zimni to‘xtatolmaganman. Hikoyalarini bo‘lmasa, qissalarini, qissalarini bo‘lmasa, boshqa asarlarini qayta-qayta o‘qiyverganman. Shuni ham aytishim kerakki, men qahhorshunos bo‘laman, shu sohada biror ilmiy tadqiqot yarataman deb Abdulla Qahhor ijodiyotiga bog‘lanib qolganim yo‘q. Ammo Abdulla Qahhor ijodiyoti sir-asrorlaridan voqif bo‘lish niyatida ko‘p olimlarning,
xususan, Ozod Sharafiddinov, Matyoqub Qo‘shjonov, Umarali Normatov kabi adabiyotshunoslarning tadqiqotlari bilan ham tanishganman. Abdulla Qahhorni saksoninchi yillarda o‘zimcha yangidan kashf qildim desam xato bo‘lmas.
«Sarob»da Saidiyning «Muvaffaqiyatli chiqqan bir hikoyadagi tipni mamlakatning har burchidan yuzlab, minglab topish mumkin» degan fikri bor. Qizig‘i shundaki, bunday tiplar ko‘p uchrashidan tashqari, ularning umri ham uzoq bo‘larkan. Zamon, makon, vaqt tushunchalarini ular ko‘pda tan olavermas ekan. Men ana shunda
«O‘g‘ri» hikoyasidagi Qobil bobo bizdan ancha olis davrlarda yashab, o‘tib ketgan bo‘lsa-da, «qobilbobochilik» o‘ziga xos tarzda davom qilayotganini angladim. Abdulla Qahhorning o‘ndan ortiq hikoyasini bitta nom — «Boshsiz odam» nomi ostida birlashtirish mumkin... To‘liq ma’noda Faxriddinga monand, uningdek laqma, irodasiz, mustaqil fikrdan mahrum go‘l kimsani, ehtimol, hayotda uchratish qiyindir. Ammo atrofga sinchkovlik bilan ko‘z tashlab, mushohada etilsa-chi? Hayronlar qolasiz... Beixtiyor, «boshsiz odam» buncha ko‘p-a, deysiz. Abdulla Qahhor o‘tmish mavzuiga bejiz qiziqmagan ekan. Moziyning zamon bilan doimo bog‘lanadigan nozik rishta va halqalarini topib, faqat tarix bag‘rida qolib ketmaydigan hayot haqiqatlari va fojialarini kuyib-yonib tasvirlagan ekan. Abdulla Qahhor ijodidagi shafqatsiz realizmning tub ildizi ham balki ana shundadir. Co‘nggi yillarda ayrim yozuvchi, olim jo‘ralarimiz bilan Abdulla Qahhor to‘g‘risida ko‘p gurunglashib, fikr almashdik. Endi o‘ylasam, «Abdulla Qahhor nainki adabiyotning, yurt va millatning ham vijdoni» degan mohiyatga men alohida urg‘u bergan ekanman. Darvoqe, marhum adibimiz O‘lmas Umarbekov ham ustozni millat vijdonini tamsil etgan yozuvchilardan deb ta’riflagan. Ha, Abdulla Qahhor bosib o‘tgan hayot yo‘li ham, ijod yo‘li ham vijdon yo‘li edi. U so‘nggi nafasigacha millat dardi bilan yashadi. Shuning uchun ham unga og‘ir bo‘lgan. Mamlakatda toza fikrlaydigan odamlar kamayib ketgani, shular ham iqtidorini yangi haqiqat izlashga emas, eskilarini takrorlashga sarf aylaganiga qaramay, Abdulla Qahhor doimo ozod fikr, yangi haqiqatlar uchun kurashgan — yolg‘izlanish, tanqidu ta’qiblarni pisand qilmasdan kurashgan. Abdulla Qahhorning ijodiy nafasidan nomardlik, har qanday g‘irromlik titragan, tubanlik o‘zini panaga tortgan. Unga tish qayraganlar esa
yuzlariga niqob tortishga majbur bo‘lishgan. Uning borligi millatning ham davlati, ham sarvati, ham shavkati bo‘lgan. Mubolag‘asiz shunday! Konstantin Stanislavskiyning «San’atdagi hayotim» kitobida L. Tolstoy haqida aytilgan bunday bir gap bor: «Uning hayotligida biz «Tolstoy bilan bir zamonda yashash qanday baxt!» der edik. Yuragimiz g‘am-g‘ussaga to‘lib-toshganda, hayotda qiynalganda yoki kishilar ko‘zimizga yirtqich bo‘lib ko‘ringanda «Yasnaya Polyanada Tolstoy bor-ku!» degan fikr bilan o‘zimizga tasalli berardik...» Xuddi shu kabi, Abdulla Qahhor tirikligida o‘zbek ziyolilarida ham shunday bir qanoat va tasalli bor edi. Lekin, ishonchim komilki, «Bizning Abdulla Qahhordek benazir yozuvchimiz bo‘lgan, u o‘zining boqiy asarlari va o‘lmas jasorati ila doimo biz bilan birga yashayotir...» degan g‘urur-iftixor tuyg‘usi bugun ham ijod ahlining mahzun qalbiga umid va jasorat bag‘ishlab turadi.
Iste’dodli ijodkor iste’dodsizlik bilan aslo chiqisha olmaydi. Chunki haqiqiy iste’dod — adabiyotning sergak posboni. Adabiyotni iste’dodsizlar xurujidan iste’dod sohiblari muhofaza etmasa, boshqa hech kim himoya qilolmaydi. Bizning nazarimizda, o‘tgan asrda yashab ijod qilgan hech bir o‘zbek ijodkori adabiyotimizning taqdiri, tozaligi va daxlsizligi uchun Abdulla Qahhor kabi qat’iyat bilan kurashmagan, bu yo‘lda Abdulla Qahhorchalik aziyat ham chekmagan. Insof yuzasidan buni tan olish lozim. Abdulla Qahhorning borligi — tirikligining o‘zi o‘rtamiyonachilik, iste’dodsizlik, kitobxonni nazar-pisand etmaslikka qarshi bir qalqon bo‘lgan. Faqat yaxshi asar yozishni emas, g‘oyaviy nochor, badiiy yaroqsiz asarlarga yo‘l bermaslikni u o‘zining muqaddas burchi deb hisoblagan. Unga ko‘ra, yozuvchi adabiyotga ikki xil yo‘l bilan — biri tutab, ikkinchisi yashnab kirib keladi.
«Tutab kirgan yozuvchi uzoq tutaydi, ko‘nglidan chiqarib emas, qornidan chiqarib asar yozadi, yozuvchilik umrining oxirigacha tutaydi... Yozuvchilikka cho‘g‘day yashnab kirgan ijodkor asardan-asarga yashnay beradi, oxirda abadiy so‘nmas o‘tga aylanadi». Yana bir toifa qalamkashlar bo‘ladiki, ular adabiyotga «o‘g‘ri mushukday tuynukdan» tushadi. Bular uchun adabiyot san’at emas — kasb, tirikchilik manbai. Adabiyotga tutab yoki o‘g‘ri mushukday tuynukdan kiradigan yozuvchilarning eng oliy a’moli mahalliy va «mahalla klassiklari» bo‘lishdir. Adabiyot shularning
dastidan jabr ko‘radi. Shular badiiy so‘z, obrazli fikr zavqidan kitobxonni benasib etish bilan mashg‘ul bo‘ladi. Olamning o‘zgarishi — odamning o‘zgarishiga bog‘liq. Odamning ongi, fikr-qarashlari yangilanmas ekan, hech qachon olam yangilanmaydi. Abdulla Qahhor mustabid xonlar, sultonlar hukmronlik qilgan eski zamon insonning qo‘l-oyog‘i bilan birga ongi, aqli va qalbini ham kishanlab tashlaganini bolaligidayoq ko‘rgan, o‘sha chirkin qullik muhitida yashab ulg‘aygan edi. Abdulla Qahhorning o‘nlab asarlari, xususan, «O‘tmishdan ertaklar» qissasida tasvirlangan voqea-hodisa va ijtimoiy manzaralar — asrlar mobaynida xalqni yanchib, ta’qib etib kelgan musibat, g‘am-anduh va fojialarning o‘ziga xos haqqoniy talqinidir. «Xalqning ko‘zi bog‘lansa, qulog‘iga qo‘rg‘oshin quyilsa, taqdir hukmi o‘limdek haq, degan aqidani uning zehniga singdirish osonroq bo‘ladi». Bu fikr — xalqning ko‘zi bog‘lanib, qulog‘iga qo‘rg‘oshin quyilganda uning og‘ir alam va sitamlarga yo‘liqishiga bevosita guvoh bo‘lgan, bu hayotda inson tasavvuriga sig‘maydigan balo-qazolar qo‘pishini o‘z ko‘zi bilan ko‘rgan, ko‘nglidan o‘tkazgan yozuvchining, ya’ni Abdulla Qahhorning fikri. To‘g‘ri, adib oktyabr inqilobi xalqimizning ko‘zini, qulog‘i va ongini ochadi, endi taqdir hukmiga o‘limga ishongandek ishonishlar barham topadi, deb umid qilgan, davlat va partiya belgilagan mafkuraviy chiziqlardan chetga chiqmaslik niyati bilan yashab, ijod etgan. Shu ma’noda Abdulla Qahhorni ayblashga yoki qoralashga dalil bo‘ladigan fikr-mulohazalarni uning asarlaridan ko‘chirma olib, qatorlashtirish qiyin emas. Ammo buning bilan Abdulla Qahhorning asl badiiy olami, yozuvchilik qiyofasi xiralashib qolmaganidek, san’atkorlik maqomi ham pasaymaydi. Abdulla Qahhor bir suhbatida «Men adabiyotga uning mohiyatini bilmasdan, adabiyot propaganda quroli ekanini yuzaki, juda ham yuzaki tushunib kirganman», deydi. Tavalludiga oltmish yil to‘lganda esa «Men qirq yillik ijodiy faoliyatim davomida ko‘p ish qilganim yo‘q, chunki bu qirq yilning ko‘pini tajriba orttirishga sarf qildim», degan edi. Tabiiyki, adabiyotning mohiyatini bilmasdan qilingan ish — adabiyot namunasi sifatida yashay olmaydi. Abdulla Qahhor bunday asarlarini ko‘p jildligiga kiritmagan. Va bu ishi bilan haqiqiy yozuvchi nainki boshqalarning, balki o‘zining ijodiga ham tanqidchi ko‘zi bilan xolisona qarashga qodirligini isbotlagan.
Demoqchimizki, agar Abdulla Qahhorning sho‘ro davlati va kommunistik partiyaga munosabati oddiy odamlar ishonchidan farq qilmasa edi, o‘zini siyosat va adabiyot rahnamosi deb bilgan «dohiy» va «dohiycha»larni vahimaga solgan o‘sha mashhur fikrni u hech vaqt aytmagan bo‘lardi. Ustoz Ozod Sharafiddinov bunday hikoya qiladi: «Ba’zan do‘stlarim — deydi Abdulla Qahhor yubiley kechasidagi nutqida, menga ta’na qilib, «katta»larga chest berib turmaysan, deyishadi. Men chest berolmayman. Chunki men partiyaning oddiy soldati emas, ongli a’zosiman». Avvalo shuni aytish kerakki, bu gaplar birdan, majlis vaqtidayoq yozuvchining esiga kelib qolgan, hayajon ichida og‘zidan chiqib ketgan gaplar emas, Abdulla Qahhor besh kun avval ikki-uch shogirdiga tantanali kechada gapiradigan gapini o‘qib bergan edi. Shunda shogirdlari yuqoridagi iborani aytmaslikni, agar bu ibora aytiladigan bo‘lsa, adabiy muhitga yomon ta’sir qilishini ta’kidlashdi...» Shogirdlar ham oddiy kishilar bo‘lmagan, albatta. Ularning har biri el-yurtga tanilgan, hayotning past-balandini yaxshi bilguvchi iste’dod sohiblari edi. Shunga qaramasdan, Abdulla Qahhor shogirdlarining fikrini olmasdan, gapirishi shart deb o‘ylagan gapini aytgan. Unga munosabat keskin o‘zgarishini bilsa-da, «Men partiyaning oddiy soldati emas, ongli a’zosiman» deyishdan o‘zini cheklay olmagan. Chunki zamonasozlik, xushomadgo‘ylik, madhiyabozlik avj olgan va partiyaga yaltoqlanish, uning har bir da’vatiga «labbay» deya javob qaytarish umumiy udumga aylangan muhitda «ongli a’zolik» huquqi ham katta gap hisoblangan. Ongli a’zo bo‘lmoq — hech bir narsaga ko‘r-ko‘rona sig‘inmaslik, bo‘lar-bo‘lmasga sadoqat izhoriga berilmaslik, har qanday vaziyatda ham o‘zining aql-idroki va salohiyatiga suyana bilish deganidir. Ong va fikr mustaqilligiga erishgan kishi — qalbi va ruhoniyati hur inson bo‘ladi. Faqat shunday insongina umumiy betamizlik, hech kimdan hisob talab etilavermaydigan «ulgurji» riyokorlikka bosh qo‘shmaydi. Abdulla Qahhor odamning Odam bo‘lib kun kechirishini, inson o‘z ahvolini bilishda adashmasligini, tosh chaynasa ham haqiqatga xiyonat qilmasligini istagan. Agar o‘tmishda qullik, qaramlik, zabunlik hukm surgan bo‘lsa, kelajakda erkinlik, tenglik, baxtiyorlik qaror topadi, deb umid qilgan Abdulla Qahhor. Agar moziyda mehnatkash xalq ko‘zidan qonli yoshlar oqib, ajdodlarimizning boshi musibat va
kulfatdan chiqmagan bo‘lsa, sho‘ro zamonida yig‘i — shodlikka, kulfat — quvonch va xotirjamlikka o‘rin bo‘shatar deb ishongan Abdulla Qahhor. Vaqt o‘tishi bilan buyuk adib bu ishonch aslida ulkan adashish, aldanish ekanini bilgan, shirin orzu va umidlar bag‘ridan umidsizlik va dilni cho‘ktirguvchi ishtibohlar ulg‘ayayotganiga iqror bo‘lgan.
O‘quvchilarning hikoyalarni tahlil qilishida kreativ yondashuvini ta’minlash o‘qituvchi tanlagan uslublarga bog‘liq ekanini isbotladik.