Hüquq mürəkkəb və çoxcəhətli anlayışlardan biridir. “Hüquq” sözünün özü çox müxtəlif mənalarda işlədilir. Bir qayda olaraq, “hüquq” dedikdə, biz birincisi, hüquq normalarının məcmusu və sistemi başa düşürük. O hüquq normalarının ki, bu normalar ictimai həyatın təşkilində, insanların davranışlarının tənzimlənməsində, kollektivlərin (müəssisələrin, təşkilatların, idarələrin və digər qurumların) fəaliyyətini qaydaya və nizama salınmasında mühüm rol oynayır. Hüquq zahirən ayrı-ayrı, müxtəlif rəsmi dövlət sənədlərində ifadə olunur. Rəsmi dövlət sənədləri dedikdə, qanunlar, prezident fərmanları, hükumət qərarları və digər sənədlər başa düşülür. Onlara dövlətin hüquqi aktları deyilir. Bu aktlarda hüquq normaları möhkəmləndirilir. Digər tərəfdən həmin aktlar hamı üçün məcburi olub, bir dəfə deyil, dəfələrlə tətbiq olunmaq üçün nəzərdə tutulur.
