IV. Sınığın yerləşdiyi nahiyəyə görə: epifizar, metafizar və
diafizar sınıqlar. Epifizar sınıqlarda sınıq xətti epifizdə yerləşir, bəzən
sınıq oynaqdaxili olur. Belə hallarda çıxıq-sınıqlara da təsadüf edilir.
Cavanlarda çox vaxt epifiz epifizar xətt boyu sümükdən qopur və
epifizeoliz baş verir ki, bu zaman müalicə daha da çətinləşir.
Ümumiyyətlə, sağalma prosesləri üçün bu nahiyədəki sınıqlar böyük
çətinliklər törədirlər.
Metafizar sınıqlar zamanı sınıq sümüyün metafizində olur. Belə
sınıqlar əksər hallarda pərçimlənmiş formada meydana çıxırlar və buna
görə də sümüyün sınmasını göstərən əlamətləri aşkarlamaq çox çətin olur.
Diafizar sınıqlar diafizdə - uzun borulu sümüklərin orta hissəsində
baş verən sınıqlardır. Diafizar sınıqlar ən çox rast gəlinən sınıqlardır və
bu zaman sınmış sümük ucları – fraqmentlər, əksər hallarda, öz yerlərini
dəyişirlər.
