Гядим дювр вя орта ясрляр Тарих вя онун проблемляри, №4 2010 8 təsadüfi deyildi. Moğollların ilk hərbi dəstələri isə Qəndəhara dörd aydan sonra gəlib çatmışdı (5,173,
174; 4,43). “Abbasnamə”də göstərilir ki, Şah müharibəyə hazırlıq işlərindən sonra Məşhədə ziyarətə
gedib əlli gün burada qalmış və bu müddətdə qoşunun cirə və məvacibinin ödənilməsi haqqında
fərman vermişdi. Şah Xorasan əyanları, oba, tayfa böyüklərinə verdiyi fərmana əsasən onlar qoşunu
ərzaq, sursat və avadanlıqlarını daşımaq üçün yük heyvanları ilə təmin etməli idilər. Bütün bu işlərə
nəzarət vəzir Xəlifə Soltana tapşırılmışdı. Qeyd edilən mənbənin verdiyi məlumata görə II Şah Abbas
zəruri hazırlıq işlərini başa çatdırdıqdan sonra Murtuzqulu xan və digər hakimlərə Qəndəhara hərəkət
etmələri barədə əmr vermişdi. Qələndər sultana da qoşunun ardınca topların gətirilməsi tapşırılmışdı.
Cam-Qurqan yolu ilə gedən qoşun Heratda çox dayanmayıb sürətlə Qəndəhar istiqamətində hərəkət
edir. Bu zaman Fərahda Murtuzaqulu xanın qoşununa rəsmi baxış təşkil edilmişdi (4, 43).
Heratda Rüstəm xanın oğlu Vəliməhəmməd xan və Herat hakimi Abbasqulu xanın da hərbi
alayları əsas qoşunla birləşdilər. 1648-ci ilin zolhəcce ayının 12-də II Şah Abbas Qəndəhar qalası
ətrafındakı Abbasabad bağına çatdı və iqamətgah burada yerləşdirildi. Qalanın mühasirəsi barədə əmr
verildi. Tüfəngçiağası Qələndər sultan 5 top gətirməli idi ki, artıq onlardan ikisi Bosta, üçü isə
Qəndəhara çatdırılmışdı. Hələ Herat hərbi müşavirəsində şahın buyruğu ilə çox mühüm hərbi-strateji
əhəmiyyətə malik olan Bost qalasının alınması Astrabad hakimi Mehrab xan və Cəmşid xan Pornaka
tapşırıldı. Bost qalasının divarları həm hündür, həm də çox möhkəm olduğuna görə qalaya ilk
zərbənin top atəşi ilə vurulması tapşırılmışdı. Top atəşinə tab gətirməyən mühafizəçilər və qala hakimi
Pərdal xan iç qalaya sığındılar. Nəhayət Bost qalası mühasirəyə tab gətirməyib təslim oldu. Elə ilk
alınan qala da Bost oldu. Bost qalasının hakimi Pərdal xan, xeyli əsgər, döyüş texnikası, iki fil və bir
çox başqa qənimətlər ələ keçirildi. Zəmindavəri Sarı xanın qızılbaş alayı mühasirəyə almış, onların ilk
cəhdləri uğursuz olsa da, sonrakı hücumlarda Zəmindavər hakimi Əsədulla xan aman verilməsini
xahiş edib II Şah Abbasa yazdığı məktubu Xorasan qoşunun sərdarı Sarı xana çatdırdı. Sarı xan onun
məktubunu dərhal Şaha göndərir. Seyid Əsədulla xan xahiş edirdi ki, Zəmindavərin Qəndəhardan
sonra təslim edilməsinə icazə verilsin. O, məktubda həm də Səfəvi Şahına qulluğunu və itaətkarlığını
ifadə edirdi. Qala rəisi Seyid Əsdulla xana cavab olaraq qərara alındı ki, Sarı xan atəşi dayandırıb
qalanı mühasirədə saxlasın və heç kimin qalaya girib-çıxmasına icazə verilməsin, növbəti əmrə qədər
qərar tutduqları yerlərdə dayansınlar (3, 106, 107; 4, 45-47). Məhəmməd Tahir Vəhid yazır ki, II Şah
Abbas əvvəl verdiyi fərmanın əksinə olaraq əmr etdi ki, Qəndəhar qalasının bürc və divarlarını top
atəşi ilə dağıtmasınlar. Qızılbaş ordusu bir neçə döyüşdən sonra qalanı hər tərəfdən mühasirəyə aldı.
Şah məktub yazıb yasovul Məhəmməd bəylə Qəndəhar hakimi Dövlət xana göndərib onu Bost
qalasının dağıdıldığından, tutulmasından xəbərdar edir. Həm də qalanın təslim ediləcəyi halda,
sakinlərinə və buradakı Moğol qoşununa aman veriləcəyini bildirdi. Dövlət xan üç gün möhlət istədi
və üçüncü gün qalanı təslim etdi. Dövlət xan və onun qoşun başçıları Şahın Abbasabaddakı
iqamətgahına gəldilər. Onunla eyni vaxtda Zəmindavər hakimi Seyid Əsədulla xanı da Sarı xan
Abbasabada Şahın hüzuruna yola salır (4,47). Beləliklə Dövlət xan iki ay müqavimət göstərsə də,
təslim oldu (1649 fevral ayı). O, təslim olanda, 7 min əsgəri, kifayət qədər də azuqəsi vardı. Qəndəhar
qalasındakı Moğol əmirləri qaladan çıxıb II Şah Abbasın qarşısında baş əyib təslim oldular. Qalanın
cümə məscidində II Şah Abbasın adına xütbə oxundu və sikkə zərb edildi. Qəndəhar və Zəmindavərin
hakimləri, əmirləri azad edilərək qoşunları ilə ölkələrinə getmələrinə icazə verildi. Qəzneynə qədər
Səfəvi dövlətinin tərkibinə daxil edildi və qızılbaşlara tapşırıldı ki, bu bölgələrin əhalisinə zərər
vurmasınlar. Qəndəhar Astrabad hakimi Mehrab xana, Zəmindavər isə Dostəli sultan Zənginəyə
tapşırıldı. II Şah Abbas Qəndəhar məsələsini uğurla həll edib sərhədlərin möhkəmləndirilməsi
tədbirlərini həyata keçirdi (3,108-109; 5,173-174; 4, 47). Məhəmməd Tahir Vəhid yazır ki, II Şah
Abbas qələbəyə xeyir-dua verdikdən sonra Abbasabadda bütün əmirlərin iştirakı ilə qələbə münasibəti
ilə şənliklər keçirildi. Elə bu zaman İsa bəy Hindistana elçi göndərilir.Şah bir az sonra iki dövlət
arasında sülh və dostluq əlaqələrini ifadə edən məktubunu elçisi Şahverdi bəylə Qəndəhardan
Hindistana göndərib hücum və uğurları haqqında Şah Cahana izahat verib, ümidvar olduğunu söylədi
ki, bu hadisə dostluq əlaqələrinə kölgə salmayacaq. Şahverdi bəy 1649-cu il iyul ayında Moğol
sarayına çatanda, Şah Cahan da Kabilə yaxınlaşmışdı. Səfiri yüksək səviyyədə qarşılasalar da, ona Şah