16.6. İdman qurğularının ventilyasiyası Mənzillərdə, ictimai binalarda, idman qurğularında daim adam olduğu üçün onun havası dəyişir. Göstərilən binaların havasının bakteriyalarla çirklənməsi gigiyenik nöqteyi-nəzərdən daha qorxulu sayılır. Mikroorqanizmlər havaya xəstələrin, batsilgəzdirənlərin ifrazatı ilə düşərək hava-damcı infeksiyalarını (difteriya, qızılca, göyöskürək və s.) yayır. Otağın havası vərəm və qrip xəstəliklərinin yayılmasında da müəyyən rol oynayır. Odur ki, yaşayış binaları və idman qurğularının havasının dəyişməsinə daim fikir verilməlidir.
