İdman təbabəTİ VƏ GİGİyena

2.3. Su vasitəsi ilə bədənin möhkəmləndirilməsi. Bu prosedurlarda bədən qızarıncaya qədər yaş dəsmalla silinir. Bu zaman 30-32⁰C hərarətli sudan istifadə edilir və hər 2-3 gündən bir suyun hərarəti 1-2⁰ aşağı salınır.

Su vannalarının qəbulunun bədənin möhkəmləndirilməsi üçün böyük əhəmiyyəti vardır. Erkən uşaq yaşlarında 35⁰C, məktəbə qədər uşaq yaşlarında 33⁰C, məktəb yaşlarında 28⁰C hərarətli su vannalarından istifadə edilməsi məsləhətdir.

Ayaq vannalarının qəbul edilməsinin də bədənin möhkəmlən-dirilməsində böyük əhəmiyyəti vardır. 2-3 yaşından başlayaraq hər gün ayaqları isti suya qoyurlar, hər iki gündən bir suyun hərarətini 1⁰ aşağı salırlar. Bədənin fərdi reaksiyasını nəzərə alaraq suyun hərarətini 18⁰C-yə, hətta 14⁰C-yə qədər salmaq olar.

Bədəni möhkəmlətmək üçün duşdan istifadəyə ancaq böyük yaşlı uşaqlara icazə verilir. Bu zaman suyun hərarəti 20⁰C-dən aşağı duş qəbul edilməsi müddəti isə 1 dəqiqədən çox olmamalıdır.

Uşaqların və yeniyetmələrin bədəninin möhkəmləndirilməsində ən yaxşı üsullardan biri təbii su hövzələrindən istifadə edilməsidir. Bu zaman su hava və günəş şüaları bədənə birlikdə təsir göstərir. Çayda, göldə, dənizdə suyun hərarəti təxminən 20-22⁰C, havanın hərarəti 24⁰C olduqda çimmək məsləhət görülür. Çimmək müddəti kiçik yaşlı məktəb uşaqları üçün 5-15 dəqiqə, orta və böyük yaşlı uşaqlar üçün 20-25 dəqiqə artıq olmamalıdır. Suyun hərarəti 16⁰C-dən aşağı olduqda çimmək mövsümü qurtarmalıdır.