XARİCİ TƏNƏFFÜSÜN FUNKSİONAL VƏZİYYƏTİNİN MÜAYİNƏSİ ÜÇÜN TƏTBİQ EDİLƏN SINAQLAR Ştanqe sınağı (nəfəs alma zamanı tənəffüsün saxlanılması). Müayinə edilən şəxs 5-7 dəq. oturduqdan sonra dərin nəfəs alıb-verir və sonra yenidən nəfəs alaraq tənəffüsü saxlayır. Bu zaman o, ağzını və burnunu mütləq tutmalıdır. Sağlam uşaqlar və 18 yaşına qədər gənclər tənəffüsü 16-55 san. saxlaya bilirlər. Məşq etməmiş kişilər dərin nəfəs aldıqdan sonra tənəffüsü 40-50 san, məşq etmiş idmançılar isə 60 san-dən – 2,5 dəq. müddətində saxlamaq qabiliyyətinə malikdirlər. İdmançı yorulmuş vəziyyətdə olduqda, qan dövranı və tənəffüs sistemlərinin xəstəliyində, həmçinin qan azlığında onun tənəffüsü saxlama müddəti qısalır.
Qençı sınağı (nəfəs vermə zamanı tənəffüsün saxlanılması). İdmançı dərin nəfəs verib-aldıqdan sonra yenidən dərin nəfəs verib tənəffüsü saxlamalıdır. Sağlam məşq etməmiş şəxslər bu vəziyyətdə 20-30 san, məşq etmiş idmançılar isə tənəffüsi 30-90 san. saxlamalıdırlar.
