«İnşaat» fakültəsi «Bina və qurğuların istismarı və rekonstruksiyası» kafedrası

Zədələnmə dərəcəsi – tikinti konstruksiyasının layihə yükgötürmə qabiliyyətinin azalmasının faizlə ifadəsi.


Yükdaşıyan konstruksiyalar – istismar yükləri və təsirlərinə davam gətirəcək binaların möhkəmlik və dayanıqlığını təmin edən tikinti konstruksiyaları.


Normal istismar – normalarda və ya layihədə nəzərdə tutulan texnoloji və ya məişət şəraitlərinə uyğun qaydada həyata keçirilən konstruksiya və ya binaların istismarı.
Binalara istismar göstəriciləri – binanın istismar keyfiyyətini xarakterizə edən texniki, həcm-planla dırma, sanitar-gigiyena, iqtisadi və estetik xüsusiyyətlərin məcmuəsi.


Binanın cari təmiri – bina elementlərində mövcud olan qüsurların aradan qaldırılması və istismar göstəricilərinin normal səviyyədə saxlanması məqsədi ilə həyata keçirilən kompleks tikinti tədbirləri.


Binanın əsaslı təmiri – zəruri hallarda ayrı-ayrı konstruktiv elementlərin və mühəndis avadanlığı sistemlərinin dəyişdirilməsi də daxil olmaqla, bina və qurğuların əsas texniki-iqtisadi göstəricilərinin dəyişdirilməsini nəzərdə tutmayan fiziki və mənəvi köhnəlmənin aradan qaldırılması üzrə tikinti və təşkilati-texniki tədbirlər kompleksi.


Binanın rekonstruksiyası (yenidən qurulması) – müvafiq layihə əsasında yükdaşıyan konstruksiyaların dəyişdirilməsi, gücləndirilməsi, binanın təyinatı dəyişdirilərkən yeni konstruksiyaların tətbiq edilməsi ilə bağlı inşaat işləri.


Binanın müasirləşdirilməsi – mövcud normalarla istismar şəraitinə dair irəli sürülən yeni tələblərə uyğun olaraq, köhnə binaların və mənəvi cəhətdən köhnəlmiş avadanlığın dəyişdirilməsi ilə bağlı həcmi-planlaşdırma və memarlıq həllərinin yeniləşdirilməsini nəzərdə tutan xüsusi rekonstruksiya halı.


Binanın mənəvi köhnəlməsi – bina və qurğuların əsas istismar göstəricilərinin müasir texniki tələblər səviyyəsindən tədricən (zamanla) azalması.

Binanın fiziki köhnəlməsi – obyektiv səbəblər ucbatından binaların texniki və bununla bağlı istismar göstəricilərinin də tələblərə cavab verməməsi.

Bərpa – fiziki aşınmaya məruz qalmış və müxtəlif səbəblərdən zədə almış konstruksiyaların işlək vəziyyətini təmin edərək ilkin səviyyəsinə çatdıracaq tədbirlər.


Gücləndirmə – bütövlüklə tikinti konstruksiyasının və ya bina və qurğunun yükgötürmə qabiliyyəti və istismar göstəricilərinin, mövcud vəziyyəti və ya layihədə verilənlərlə müqayisədə yüksədilməsini təmin edən tədbirlər kompleksi.