Korxona bilan umumiy tartibda tanishish va amaliyot rahbarini tayinlash. Bu bo’limda talaba korxonaga amaliyot o’tash uchun tashrif buyuradi va korxonaning umumiy bo’limlari va amaliyot rahbari bilan tanishadi. Korxonadagi asosiy ishlab chiqarish (xizmat ko’rsatish) faoliyati bilan tanishib, bitiruv oldi amaliyotini amalga oshirishni o’zi uchun alohida tartibda rejalashtirib oladi. Bitiruv malakaviy ishi yuzasidan kerakli ma’lumotlar va tadqiqotlar bo’yicha ob’ektdagi amaliyot rahbari bilan maslahatlashib shaxsiy reja ham ishlab chiqishi mumkin.
.
Xomashyo va material resurslar ta’minoti bilan tanishish va tahlil qilish.Bu bo’limda talaba xomashyo va material resurslarning tarkibi, mol yetkazib beruvchilar (kommunal tizim ham kiradi), ular bilan tuzilgan shartnomalar va ularning shartlarini o’rganadi. SHuningdek, xomashyoni izlash va narxlarini kelishish borasida korxona mutaxassislari tomonidan amalga oshiriladigan usullarni o’rganadi va kundaligida aks ettiradi, ta’minot jarayonida qo’llaniladigan me’yoriy-huquqiy xujjatlarni tahlil qiladi. Har bir huquqiy hujjatni amaliyotdagi aksini va uni bajarishda yuritiladigan korxona hujjatlari bilan tanishadi, statistik ma’lumotlarini tahlil qiladi.
Ishlab chiqarish korxonasining barcha tsexlari bilan tanishish va ularning texnologik asoslarini o’rganish. Bu bo’lim orqali talaba korxonaning asosiy ishlab chiqarishi (xizmat ko’rsatishi, ishlarni bajarishi) bilan tanishadi. Ishlab chiqarish (xizmat ko’rsatish, ishlarni bajarish) jarayonining ketma-ketligi, xomashyoni omborga kelib tushishidan boshlab, uni sotish va texnik xizmatlar ko’rsatish jarayoni bilan chuqur tanishadi, ishlab chiqarishning texnologik jarayonlarini o’rganadi. Bunda foydalaniladigan davlat va xalqaro standartlar, texnik shartlar bilan tanishadi. Ishchilarning mehnat talablariga rioya qilishlarini va texnologik karta bo’yicha bajaradigan operatsiyalarini tahlil qiladi. Bu jarayonda ishchini usta (master), brigadir, uchastka boshliqlari tomonidan boshqarilishini o’rganadi, tahlil qiladi va muammolarini izlaydi. Ishlab chiqarishning ketma-ket joylashuvi bo’yicha xaritani tuzadi.
