İxtisasın adı: Tərəvəz ustası (Tərəvəzçilik mütəxəssisi) 116
Kultivasiya - Alaqları kəsmək, torpağı yumşaltmaq və qismən qarışdırmaq məqsədilə
aparılır. Becərmənin məqsədindən asılı olaraq kultivasiya 8-12 sm dərinlikdə aparılır.
Malalama - Torpağın yumşaldılması, qarışdırılması, səthinin hamarlanması və alaq
cücərtilərinin məhv edilməsi zamanı tətbiq olunur.
Şaxmala - Şumlanmış sahələrdə kəsəkləri xırdalamaq, tirə və şırımları düzəltməklə
torpağın səthini hamarlamaq üçün aparılır.
Quraq iqlim şəraitində torpaqda nəmliyi saxlamaq üçün şumlama ilə eyni vaxtda və
yaxud şumdan dərhal sonra sahəyə şaxmala çəkilir. Şaxmala, eni 25-30 sm, qalınlığı 10-15 sm
olmaqla hər iki ucu ilə traktora qoşulan 3-4 metr uzunluğunda taxta və yaxud dəmirdir.
Şaxmalanın ölçüsü torpağın tipinə və sahənin vəziyyətinə görə müəyyən olunur.
Torpağın qranulometrik tərkibi nə qədər ağır olarsa, şaxmalanın çəkisi də nisbətən
artırılmalıdır.
Vərdənələmə (Tapanlama) torpağı sıxlaşdırmaq, iri
kəltənləri xırdalamaq və torpaq səthini qismən hamarlamaq
məqsədi ilə aparılır.
Torpağı tapanlamaq üçün vərdənələrdən
istifadə olunur.
Tapanlama həmçinin səpin zamanı toxumun bərabər dərinliyə basdırılmasını və
toxumun torpağın bərk fazası ilə əlaqəsinin yaxşılaşdırılmasını təmin edir. Vərdənə səthinin
formasından asılı olaraq dişli və hamar olur.
Tapanlamanı ilk yaz müddətində dişli, səpinqabağı dövrdə isə hamar vərdənələrlə aparmaq lazımdır. Tapanlama ilə kipləşdirilmiş torpağın su-hava və istilik rejimi yaxşılaşdığına görə,
mədəni bitkilərin toxumlarının tez cücərməsinə və normal inkişaf etməsinə əlverişli şərait
yaranır. Torpağın səpinə hazırlanması qaydası, tarlanın mövcud vəziyyəti nəzərə alınmaqla
müəyyən olunur. Müxtəlif torpaq-iqlim şəraitinə malik olan ərazilərdə torpağın səpinə
hazırlanması fərqli xüsusiyyətlərə malikdir.
Quraq iqlim şəraitində torpağın səpinqabağı becərilməsi az təkrarlanmalı və dayaz
aparılmalıdır. Kifayət qədər nəmli şəraitdə torpaq, quraq iqlim şəraitindəkinə nisbətən dərin
və tez-tez becərilir.
Torpağın səpinqabağı axırıncı becərilməsi səpinə 1-2 gün qalmış aparılmalıdır.
Son vaxtlar kombinə edilmiş aqreqatlardan istifadə etməklə torpağın səpinə
hazırlanması (kultivasiya, hamarlama və tapanlama) səpinlə eyni vaxtda aparılır (Şəkil 3.1).
