BIRIKKEN RÁWIShLER-sózlerdiń birigiwinen jasalıp, qospa ráwishtiń basqa túrlerine qaraǵanda onsha ónimli emes. Ola eki atlıq, atlıq+kelbetlik, sanlıq, ráwish (jayparaxat, baspúkil, awızeki, tańata, tańerteń), kelbetli+atlıq (jalańayaq, jalańbas), sanlıq+atlıq, kelbetlik, almasıq, rawish (birqatar, birneshe, biraz, birtalay, birjola, birotala, birsıpıra), ráwish+janapay (azǵana, azmaz, qayqurlım, keshqurın, eleberin), sonday-aq awızeki sóylew tilinde sol, bul, ol, ana, mına siltew almasıqlarına geypara kem mánili hám kómekshi sózlerdiń birigiwinen (oyaqta, buyaqta, soyaqta, bulkarada, anakarada, minakarada, bulmanda, solmanda, usımanda) túrinde jasaladı
BIRIKKEN TOPONIMLER -leksikalıq hám grammatikalıq mánisi boyınsha qosılıp, bir obekttiń atın bildiriwshi sózler. Mısalı: Mayjap, Tasbóget, Xanjap, Qamısarıq, Qusxana.
BiRIKPEGEN TOPONIMLER -keminde eki hám onnan da kóp sózden quralıp, belgili bir obekttiń atın bildiretuǵın toponimler. Mısalı: Aral teńizi, Kegeyli kanalı, Qızketken kanalı, Dáwkempir kóli, Mamiydiń dalası.
BUWÍN – sóylewde sózdi bólip - bólip aytıw múmkinshiligine iye eń kishi bólekshe.
VOKALİZM- [lat.vocalis - dawıslı sesler]- tildegi dawıslı fonemalardıń hámmesi, dawıslılar sisteması.
GÁP - semantikaliq, intonatsiyaliq pútinlikke iye bolǵan, tamamlanǵan bir pútin oydı bildiretuǵın sintaksislik birlik. Ol grammatikaliq dúzilisine qaray jay gáp hám qospa gáplerge bólinedi.
GÁP AǴZALARÍ – belgili bir sintaksislik qatnaslardı bildirip, óz-ara belgili bir sintaksislik baylanısta bolatuǵın mánili sózler.
GRAMMATIKA-[gr.grammatike - hárip oqıw hám jazıw óneri]-til iliminiń konkret materiyallıq mániden bólek sóz ózgertiw formaların, sóz dizbegi formaların hám gáp tiplerin izertleytuǵın bólimi.
GRAMMATİKALIQ QURAL – grammatikalıq mánilerdi bildiretuǵın qurallar (affiksler, kómekshi sózler, orın tártip, intonatsiya).
|
