Kasbiy psixologiya

H=E (Z–M)

Bunda H – hissiyotlar; E – ehtiyojlar; Z – ehtiyojni qondirish xulqini tashkil qilish uchun zarur hisoblangan axborot; M – mavjud bo‘lgan, ya’ni inson tasarrufidagi axborot.
Bizning mavzuga tatbiq etganda mazkur ifodani quyidagicha talqin etish mumkin. Agar ehtiyoj nolga teng bo‘lsa (masalan, u yoki bu voqea insonni aslo qiziqtirmasa), u holda shaxs axborotga muhtoj bo‘lmaydi va bu masalada hissiyotlar yuzaga kelmaydi. Binobarin, mish-mishlar yuzaga kelishi uchun ham asos bo‘lmaydi. Ehtiyojni qondirish uchun zarur deb hisoblangan axborot (Z) mavjud axborot (M)ga teng bo‘lganida ham ular yuzaga kelmaydi. Agar muayyan sababga ko‘ra odamlarning bunday axborot bilan to‘liq ta’minlangan jamoasiga tashqaridan mish-mishlar kirsa, bundan keyin ular tarqalmaydi, balki uning ichida barham topadi.
M nolga teng bo‘lganida, ya’ni inson o‘z xulqini tashkil qilish va dolzarb ehtiyojini qanoatlantirish uchun zarur bo‘lgan hech qanday axborotga ega bo‘lmasa, hissiyotlar maksimal ahamiyatga ega bo‘ladi, mish-mishlar uchun esa eng qulay zamin yuzaga keladi. Bir tomondan, ehtiyojlarni qondirish uchun harakat qilishdek keskin zarurat, ikkinchi tomondan, buning uchun kerakli har qanday axborotning yo‘qligi insonni axborot manbalarini baholashda ularning farqiga yetmaydigan qilib qo‘yadi.
Mish-mishlar nafaqat hech qanday rasmiy axborot bo‘lmagan sharoitda, balki bunday axborot odamlarning qiziqishlarini qondirmagan,
yetarlicha ishonchli bo‘lmagan yoki shubhali bo‘lgan hollarda ham yuzaga keladi va tarqaladi.
Inson unga kelayotgan axborotni beparvolik bilan qabul qilmaydi. U ushbu axborotni o‘z qarashlari va e’tiqodlari, yanglishuvlari va xurofotlari, mayl va xush ko‘rmasliklari bilan solishtiradi. Shaxs agar norasmiy yo‘llar bilan boshqa xabar olgan bo‘lsa, rasmiy axborotga tanqidiy munosabatda bo‘ladi. Bunday vaziyatda nafaqat axborot berish, balki qayta ishontirish talab etiladi. Bu esa yanglishayotgan odamning o‘zi uchun ham, uni qayta ishontirayotganlar uchun ham juda qiyin bo‘ladi.
Psixologiya fanida axborotni odamlar aynan o‘z ehtiyojlarini qondirish uchun tarqatadilar va o‘zlashtiradilar deb to‘g‘ri ta’kidlanadi¹. Ushbu ehtiyojlarni ularning mish-mishlar bilan qondirilishi nuqtai nazari bilan ko‘rib chiqamiz.
Utilitar effekt odamlar olingan ma’lumotlardan o‘z hayotiy muammolarini hal qilish uchun foydalanishlarida namoyon bo‘ladi. Bu rasmiy axborot tarqatilgan, ammo mish-mishlar ham muayyan, lekin o‘ziga xos ahamiyatga ega bo‘ladigan holatlarda eng yorqin ko‘zga tashlanadi. Masalan, Ikkinchi jahon urushi davomida ingliz razvedkasi Gitler Germaniyasining harbiy zavodlari ishini izdan chiqarish uchun portlovchi moddalar ishlab chiqarilayotgan shaharda sartaroshxonada sochi quritilayotgan zavod xodimalaridan birining boshi portlab uzilib ketgani, bu go‘yoki atmosferada porox changi haddan tashqari ko‘pligidan aholining sochlariga ilashib qolayotgani va sirli portlashning imkoniyatdagi xavfi yuzaga kelishi sababli kelib chiqqani haqida mish- mish tarqatdi. Inglizlarning aytishicha, bunday mish-mish ta’sirida ko‘pchilik zavod xodimalari shahardan qochib ketganlar va oqibatda qo‘yilgan maqsadga erishilgan.
Obro‘ samarasi axborot insonning yoki shaxs o‘zini mansub deb hisoblayotgan guruhning obro‘sini oshirishidan qoniqish hosil qilishida namoyon bo‘ladi. Bu hodisa odamlar ichki jihatdan qabul qilgan maqsad va qadriyatlarni tasdiqlovchi axborot (jumladan mish-mishlar)ni jon deb qabul qilishi va oson o‘zlashtirishiga asoslanadi. Bizni qiziqtirayotgan muammo nuqtai nazaridan, masalan, axloqiy jihatdan yetuk bo‘lmagan





¹ Qarang: Социальная психология: Краткий очерк / Под общ. рад. Г. П. Предвечного и Ю. А. Шерковина. – М., 1995. – С. 192–196.
xodimlari uning shuhratparastligini xushomad bilan ko‘klarga ko‘taradigan, o‘ziga bino qo‘ygan boshliqning xatti-harakatida yorqin namoyon bo‘ladi.
Mish-mishlar taraflardan biriga boshqasiga qarshi qo‘shimcha dalillar bergan hollarda pozitsiya (mavqe)ni kuchaytirishi effektini yuzaga keltiradi. Bu kabi misollar mamlakatga qarshi olib borilayotgan psixologik urushlarda xohlagancha topiladi.
Pozitsiyalarning kuchaytirishga mo‘ljallangan mish-mishlar ba’zan, afsuski, bizning mehnat jamoalarimizda ham yuzaga keladi. Masalan, axloqan buzuq insonning hamkasblariga nisbatan shaxsiy adovati ba’zan halol odamlarning yaxshi nomiga dog‘ tushirishiga olib keladi. Turli idora va tashkilotlarga kelib tushayotgan anonim xatlar tahlili ana shundan dalolat beradi. Epistolyar janrning bu turi ko‘pincha o‘ziga yoqmagan odamlarning mavqeini boshqalarning qo‘li bilan susaytirish, oqibatida o‘z mavqeini mustahkamlash maqsadiga ega bo‘lgan mualliflarning eshitgan va o‘ylab topgan mish-mishlaridan iborat bo‘ladi.
Mish-mishlar darajasida bilishga bo‘lgan qiziqishlarni qanoat- lantirish effekti haddan tashqari qiziquvchan odamlarga xosdir. Bu yerda ham qanoatlanish, albatta, xom-xayol, qiziqishlarning o‘zi ham arzimas va axloqiy jihatdan umidsizdir. Shunga qaramay, bu jamoani qo‘zg‘atuvchi mish-mishlar yuzaga kelishi va tarqalishining psixologik sabablaridan biri hisoblanadi.
Bu hodisaning boshqa tomoni ham mavjud. Agar, masalan, shaharda kunduzi odamlar mavzelardan biri uzra ko‘tarilayotgan quyuq tutunni ko‘rgan bo‘lsalar, nima bo‘lganini bilishga intilishning yuzaga kelishi tabiiydir. Agar odamlarning qiziqishi vakolatli organlarning rasmiy axboroti bilan qanoatlantirilmasa, aqlga to‘g‘ri kelmaydigan mish-mish gaplar yuzaga kelishi muqarrar. Binobarin, odamlarda tushunmaslikdan berilgan savol yuzaga kelsa, bunday savol qanchalik nozik va achchiq bo‘lmasin, undan qo‘l siltab ketish mumkin emas. Xodimlar jamoalarida ham bunday zarurat yuzaga keladi. Qo‘l ostidagi xodimlarning bilishga oid qiziqishining bahs mavzuiga aylangan muammolarni o‘rganmaydigan, ular yuzasidan rasmiy izoh berish zarur deb hisoblamaydigan rahbar bu bilan nosog‘lom mish-mishlar yuzaga kelishiga sharoit yaratadi.
Mish-mishlardan kelib chiqadigan hissiy effekt ijobiy modallikni o‘tkir his etish xususiyatiga ega bo‘lishi mumkin. Hissiyotlar axboroti nazariyasidan kelib chiqadigan bo‘lsak, inson his qilayotgan qoniqish, lazzat mish-mishlardagi xabar (garchi yolg‘on, voqelikka mos kelmaydigan, ammo rostga o‘xshab ketadigan bo‘lsa ham) kutilganidan ortiq axborot berganidagina mavjud bo‘ladi. Qandaydir (moddiy yoki ma’naviy) qadriyatlarga ega bo‘lishga intilgan hollarda axborotning bunday o‘ziga xos ko‘pligi zavq, xursandchilikni yuzaga keltiradi. Masalan, amalga oshish ehtimoli juda kamdek tuyulgan azaliy orzu kutilmaganda ushalganini ta’kidlovchi mish-mishning oqibati ana shunday. Ushbu holda hissiy zavqlanishga (razradkaga) bo‘lgan ehtiyoj qanoatlantiriladi, holbuki, albatta, mish-mish bunday maqsadga o‘ziga xos tarzda, inson xabarning chin yoki chin emasligini bilmagan baxtli holatda bo‘ladigan davr mobaynidagina erishadi.
Ko‘rib turganimizdek, mish-mishlarga qarshi kurash – oson ish emas, bu maqsadda turli-tuman usullardan foydalaniladi. Ammo, aso- siysi – odamlarda mish-mishlarga qarshi ma’naviy-ruhiy barqarorlikni shakllantirish. Bunga esa butun mafkuraviy ishlar tizimi bilan erishiladi.
Mish-mishlar o‘zi mohiyatiga ko‘ra ma’lum ma’noda tasdiqlagan yoki hech kim tomonidan tasdiqlanmagan xabar (ma’lum ma’noda) vazifasini bajaradi, shuning uchun ham ba’zi shaxslar hayotida va jami- yatda ma’lum bir ijtimoiy psixologik muammolarni yuzaga keltiradi. Natijada jamiyatni, insonlar turmush tarzini o‘zgartirib yuborish xususiyatiga ega.
Shu nuqtai nazardan mish-mishlar ijtimoiy psixologik xususiyatga ega bo‘lib, jamoatchilik ongiga salbiy ta’sir ko‘rsatadi va jamiyatga zid bo‘lgan ommaviy tartibbuzarliklarni keltirib chiqaradi. Bu esa ichki ishlar idoralari xodimlari faoliyatini yanada murakkablashtiradi.
Ko‘p hollarda mish-mishlarning kelib chiqishi va tarqalishining asosiy sabablaridan biri shaxslarda kerakli ma’lumotlarning yetishmas- ligidir. Buning natijasida shaxslarning ma’lum muammo, voqea- hodisaga nisbatan talab, ehtiyoj va qiziqishlari qondirilmaydi. Bu esa, o‘z navbatida, xabarlarni tarqatishda unlarga emotsional tus beradi, ularni bo‘rttirish va boyitishga olib keladi. Mish-mishlar ma’lum maqsad va manfaatlarga qaratilib, ijtimoiy, iqtisodiy, madaniy-maishiy yo‘nalish- larda namoyon bo‘ladi. Ular g‘arazli niyatlarda tarqatiladi.
Mish-mishlarni tarqatuvchi shaxslarning psixologik xususiyatiga nazar tashlaydigan bo‘lsak, ular hamisha xabarlarini ishonchli manba- lardan olingan deb aytishadi va insonlarga o‘zlarini bilag‘on qilib ko‘rsatishga harakat qiladilar. Bunday shaxslar insonlardagi hayajonni ko‘rib, voqealarga yanada ko‘proq emotsional tus berishga intilishadi.
Albatta, ba’zan mish-mishlarning kuchi haqiqiy axborotdan ham kuchli bo‘lishi mumkin va ayrim hollarda ma’lum vaqt xuddi shunday bo‘ladi.
Ko‘p hollarda mish-mishlar hududdagi operativ vaziyatga ham o‘z ta’sirini ko‘rsatadi. Masalan, narx-navoning ko‘tarilishi, pulning alma- shishi borasidagi mish-mishlar inson ruhiyatiga kuchli ta’sir ko‘rsatadi va bu ko‘pchilik holatlarda insonlarning hissiy zo‘riqishiga sabab bo‘ladi, natijada ular xatti-harakatlarining izdan chiqishiga olib keladi.
Ko‘pchilik holatlarda mish-mishlarning tarqalishi va e’tirozli holatlarning paydo bo‘lishiga manfaatli shaxslarning xatti-harakatlari va xabarlari sabab bo‘lishi mumkin. Masalan, 2004 – 2005-yillarda shunday mish-mishlar tarqaladi, go‘yoki yosh bolalarni o‘g‘irlaydigan manyak paydo bo‘lgan va u bolalarning tana a’zolarini transplantatsiya qilishi haqi- dagi mish-mish gaplar insonlar ruhiyatida qo‘rquv hissini paydo qilgan.
Bunday paytlarda ichki ishlar idoralari xodimlari ma’lum vaqtgacha xabarning o‘zagini topishga qiynalishadi, oxir oqibat shaharda kuchay- tirilgan operativ vaziyat yuzaga keladi.
Demak, mish-mishlar ma’lum bir voqea, hodisalar haqidagi xabar bo‘lib, bir kishi tomonidan ikkinchi bir kishiga yetkaziladigan og‘zaki xabardir. Mish-mishlar ba’zi shaxslar tomonidan o‘ylab topilgan bo‘lishi ham mumkin.
Mish-mishlarni quyidagicha tavsiflash maqsadga muvofiqdir:

1. 
   hodisalarni tasvirlash;
   
2. 
   emotsional ton (tus) berish, izohlash;
   
3. 
   mish-mish gaplarni ta’sir kuchidan foydalanish.
   

Mish-mishlar o‘z ma’no mohiyatiga ko‘ra uch turga bo‘linadi:

1. 
   umuman haqiqatga to‘g‘ri kelmaydigan mish-mish gaplar;
   
2. 
   ma’lum ma’noda tasdiqlangan (haqiqat bor) mish-mish gaplar;
   
3. 
   to‘liq ma’noda haqiqatga ega bo‘lgan mish-mish gaplar. Umuman, mish-mishlar o‘z xarakteriga ko‘ra to‘g‘ri, aynan haqi-
   

qatning o‘zini tashkil qilmaydi, sababi mish-mishlar bir shaxsdan ikkin-
chi shaxsga yoki bir guruhdan ikkinchi guruhga o‘tishda qandaydir qo‘shimcha o‘zgarish bo‘ladi, ya’ni «mish» qo‘shiladi.
Mish-mishlar agressiv (ashaddiy) bo‘lishi mumkin (1992-yildagi talabalar shaharchasida bo‘lgan voqeani ko‘z oldingizga keltiring). Bunday vaziyatlarda odamlar hech narsaga ishonmaydigan bo‘lib qoladi, bu holatlar ayniqsa kichik-kichik guruhlardagi odamlar orasida ko‘p uchraydi. Mish-mishlar o‘z xususiyatiga ko‘ra maxsus tashkil etiladi va birdan yuzaga kelishi mumkin.
Maxsus tashkil etilgan mish-mishlardan ko‘zlangan maqsad yashirin motivlar, g‘arazli niyatlar bilan amalga oshiriladi.
Mish-mish gaplar shaxslar ongiga quyidagicha ta’sir ko‘rsatadi:

1. 
   shu muammo bo‘yicha ongda ma’lum tasavvur yuzaga keladi;
   
2. 
   aholi orasida guruh-guruh bo‘lib yurishib, jamiyatdagi mavjud tartibni buzish yuzaga keladi.
   

Shuningdek, yer qimirlash, tabiiy ofatlar, terrorchilik aktlari haqi- dagi mish-mishlar insonlar ongida qo‘rquv hissini paydo qiladi.
Mish-mish gaplarga qarshi kurashish uchun:

• 
  ommaviy axborot vositalaridan keng foydalanish va mish-mishlar haqidagi ma’lumotlarga aniqlik kiritish hamda mazmun-mohiyatini ochib berish;
  
• 
  mish-mishlarning tarqalish hududini kuzatish va o‘sha hududda profilaktik ishlarni tashkil etish;
  
• 
  jamoatchilikka mish-mishlar bilan bog‘liq masalalarni to‘g‘ri tushuntirish va aniq axborotlar berish;
  
• 
  mish-mishlarning oldini olish va unga qarshi kurashishda jamoatchilik kuchlaridan foydalanish lozim.
  

Yuqoridagi fikrlardan kelib chiqib, shunday xulosalarga kelish mumkin:

1. 
   mish-mishlar ijtimoiy-psixologik hodisa bo‘lib, ichki ishlar idoralari xodimlari ishini qiyinlashtiradi, jamoatchilik ongiga salbiy ta’sir ko‘rsatadi;
   
2. 
   mish-mishlar tasdiqlanmagan xabar bo‘lib, o‘z kuchi, mazmuni, xarakteridan kelib chiqqan holda odamlarda emotsional hislarni yuzaga keltiradi;
   
3. 
   mish-mishlar tarqatishning asosiy sabablari shaxslarning guruh- lar, jamoalar, odamlar orasida o‘zini ko‘rsatishi, mish-mishlarni qayoqdan kelishini bilgan holda boshqalarni sodir etilishi mumkin
   

bo‘lgan voqealardan xabardor qilish, o‘zlaridagi mavjud zo‘riqishni tushirishdir.

3.