Kirish. “Jahon adabiyoti” fanining predmeti va mazmuni

Servantes (1547– 1616)

XVI asrning oxiri va XVII asrning boshlarida ijod etgan ispan Uyg’onish davri adabiyotining yirik vakili, realistik romanchilikka asos solgan gumanist yozuvchi Migel de Servantes Saavedra 1547-yilning 29-sentyabrida Ispaniyaning Alkala de Enares shaharchasida tug’ildi. Otasi Rodrigo de Servantes Saavedra tabiblik bilan kun kechirar,

shuning uchun ham u ko’p vaqt oilasi bilan shaharma-shahar kezib yurishga majbur bo’lar edi.

Migel de Servantes 1557– 1561-yillarda iyezuitlar maktabida o’qiydi. 1561 yilda oilasi Madridga ko’chib borganidan so’ng, o’qishini shu yerda davom ettiradi. O’spirin Migelda she’riyatga qiziqish tug’iladi. Filipp II ning xotini malika Isabella vafotiga bag’ishlangan sonetlari yosh Servantesning poeziya sohasidagi dastlabki she’rlari edi.

1569-yilda Servantes Rimga borib, papaning vakili Akvavia huzurida ishlaydi, 1570-yilning ikkinchi yarmida Italiyada joylashgan ispan qo’shiniga xizmatga kiradi, chunki muhtojlik uni o’z vatanini tashlab ketishga majbur etadi. 1571-yilning 7- oktyabrida Lepanto ko’rfazi yaqinida turklar bilan bo’lgan shiddatli dengiz jangida qatnashgan Servantes uch yeridan o’q yeydi. 1572-yilning aprel oyigacha Messina gospitalida davolanadi. 1574-yilning oxirigacha soldat sifatida yana bir qancha janglarda qatnashadi. 1575-yilda u harbiy xizmatdan bo’shab, ukasi Rodrigo bilan o’z vataniga jo’naydi.

1575-yilning 28-sentyabrida yo’lda qaroqchilar Servantesni asir qilib olib ketadilar, u o’zini va do’stlarini qutqazmoq uchun ko’p harakat qiladi, o’zi ham qochishga urinadi. Biroq bu urinish muvaffaqiyatsiz yakunlanadi. Servantesning ota- onasi pul to’plab, uni tutqunlikdan qutqarib olishga harakat qiladilar. Servantes 1580 yilning 19-sentyabridagina ozod etiladi va o’z vataniga qaytadi. Bu vaqtda uning oilasi juda qashshoqlashgan, ota-onasining bor-yo’g’i Rodrigo bilan Migelni qullikdan qutqarish uchun sarf qilingan edi. Qarib qolgan ota endi tabiblik kasbi bilan shug’ullanmas edi.

Servantes biror harbiy mansabga erishish niyatida Ispaniyaga qo’shib olingan Portugaliyaga boradi (1581). U yerda ham huzur-halovat ko’rmagan Servantes Madridga qaytadi. 1584-yilning dekabrida mayda dvoryan oilasidan chiqqan Katalina ismli qizga uylanadi. Otasi o’lgach (1585), ro’zg’or tebratish maqsadida turli moliya- xo’jalik ishlari bilan shug’ullanishga majbur bo’ladi. Natijada adabiy ishini uzoq vaqtgacha davom ettira olmaydi.

Oldin armiyaga oziq-ovqat tayyorlovchi intendant (1587– 94), so’ngra to’lanmagan boqimandalarni undiruvchi agent sifatida ishga kirgan Servantes ehtiyotsizligi oqibatida va boshqalarning aybi bilan ko’p mashaqqatlarni o’z boshidan kechiradi. 1592-yilda u to’plangan g’allani noto’g’ri sarflashda ayblanib, turmaga tashlanadi. Moliya ishlarida ham chalkashliklar kelib chiqadi. Seviliya shahrining bankiri Madridga o’tkaziladigan pulni yubormaydi, buning ustiga u sinadi, undirilmay qolgan mablag’lar uchun gunohkor deb hisoblangan Servantes 1597-yilda yana qamaladi. Keyinroq bu voqeaga doir janjal ikkinchi marta ko’tarilib, Servantes 1602- yilda uchinchi marta qamoqqa olinadi.

Servantesning «Don Kixot» romani ustida ishlay boshlashi hayotining shu og’ir va mashaqqatli davriga to’g’ri keladi. 1604-yilda qirollikning yangi poytaxti deb atalgan Valya-dolidga kelganidan keyin uning adabiy faoliyati ravnaq topadi va shu yerda «Don Kixot» romanining birinchi qismi nashr etiladi (1605). So’ngra o’n to’rt hikoyani o’z ichiga olgan «Ibratli novellalar» to’plami (1613), adabiy satira– «Parnasga sayohat» (1614) poemasi bosiladi. 1615 yilda «Don Kixot»ning ikkinchi qismi bosilib chiqadi. Shu

yili uning «Sakkiz komediya va sakkiz intermediya» nomli pesalar to’plami ham yuzaga keladi. Servantesning so’nggi asari «Persiles va Sixizmunda sayohati» romani yozuvchining o’limidan so’ng nashr qilinadi.

Antik klassik va Uyg’onish davri adabiyoti bilan yaqindan tanishish, harbiy xizmat va urushlarda qatnashish, Jazoirdagi besh yillik tutqunlik hamda boshqa ko’p muhtojlik va mashaqqatlar Servantes dunyoqarashining gumanistik xarakterda shakllanishiga va uning yirik realist yozuvchi bo’lib yetishishiga ta’sir qildi. Servantesning adabiy dahosi uning «Don Kixot» asarida yorqin ifodalangan. «Don Kixot» romanining yaratilishi ispan «Lamanchlik Don Kixot» madaniy hayotida juda katta voqea bo’ladi. Asarning muqaddimasida Servantes «ritsar romanlarini sidirg’asiga fosh etish» va ularning

«qulay deb turgan istehkomini ag’darish»ni asosiy g’oyaviy maqsad qilib qo’yadi.

«Don Kixot», garchi o’rta asr ritsar romanlariga parodiya sifatida yaratilsa ham, lekin uning mazmuni nihoyatda keng bo’lib, butun feodal jamiyati va uning urf- odatlariga qaqshatqich zarba bergan ochiq satiraga aylanadi.

Pol Lafarg hamma romanistlar ichida Servantes bilan Balzakni yuqori baholagan.

«Don Kixot»da esa u o’lib borayotgan ritsarlik eposini ko’rgan.

Rus tanqidchisi V.G.Belinskiy o’lmas «Don Kixot»ning avtoriga yuqori baho berib,

«u romanning ideal yo’nalishiga qat’iy zarba berdi va uni voqelik tomon burdi», deb ko’rsatdi. Yuqorida keltirilgan qimmatli fikrlar Servantes asarining to’la mohiyatini ochishda, shubhasiz, katta xizmat qiladi.

Asarning bosh qahramoni Lamanch qishlog’ida istiqomat qiluvchi kam yerlik, yoshi elliklarga yaqinlashib qolgan baland bo’yli, baquvvat, lekin ozg’in, ovni yaxshi ko’radigan bir kambag’al dvoryan bo’lib, familiyasi Kexona edi. Bu dvoryan ritsar romanlarini shunday berilib o’qiy boshlaydiki, natijada ovchilikka ham, o’z xo’jaligiga ham qaramay qo’yadi. yerining ko’p qismini sotib, uning puliga romanlar sotib oladi va uzluksiz mutolaaga berilib ketadi. Ertayu kech kitobdan bosh ko’tarmagani va uxlamagani uchun miyasi aynib qoladi. Uning ko’z oldidan ritsar romanlarida o’qigan jodugarlar, devlar, jahongashta ritsarlar o’ta boshlaydi. Uning uchun xayoliy narsalar haqiqatdek ko’rinadi, haqiqat esa o’z ma’nosini yo’qotadi. Uning qalbida ham ritsar bo’lish va ularga o’xshab adolatsizliklarga qarshi kurashish orzusi tug’iladi.

U ritsar romanlaridagi qoidalarga amal qilib darhol ishga kirishadi: ota-bobosidan qolgan temir-tersaklar ichidan qurol-yarog’larni ajratib, ularni tuzatadi. Temir qalpoq ham topadi, so’ngra u oriq, oksoq otini ko’zdan kechiradi. Otga ritsar romanlarida bo’lgani kabi jarangdor, dabdabali Rosinant degan nom qo’yadi. O’ziga esa bir hafta o’ylab, nihoyat, Don Kixot degan jarangdor ism qo’yadi. O’tmish ritsarlariga o’xshash, endi o’zining kaysi joydan chiqqanini ko’rsatadigan alomat ham bo’lishi kerak edi. Shuning uchun u o’zi tug’ilgan qishlog’ining nomini ham qo’shib, lamanchlik Don Kixot deb atashga qaror qiladi. Jahongashta ritsarning, albatta sevgi va sevgilisi bo’lishi kerak. U Toboso qishlog’ilik cho’chqaboqar qiz Aldonso Loresoni o’z orzulariga mos jonona deb tanlaydi va unga ham Dulsineya Toboso deb malikalarga qo’yiladigan dabdabali nom beradi.

Shundan so’ng Don Kixotning sarguzashtlari boshlanadi. Adolat uchun kurashib qahramonlik ko’rsatmoqchi bo’lgan Don Kixot har qadamda muvaffaqiyatsizlikka

uchraydi. Iyul oyining issiq kunlaridan birida Don Kixot jangovar hozirliklar ko’rib, yarog’-aslahalarini taqib, Dulsineyani diliga jo qilib, «tulpor» Rosinantga minib, birinchi marta safarga jo’naydi. Biroq eshikdan chiqishi bilan mushkul bir xayol uning fikrini qurshab oladi: hali u ritsarlikka fatvo olmagan, shuning uchun ritsar qoidalari bo’yicha bironta ritsar bilan jang qilishga haqsiz. Endi u opqaga qaytishi kerak, lekin undagi tentaklik, hamma mulohazalaridan ustun chiqadi va yo’lda birinchi uchragan kishisining fatvosi bilan ritsar nomini olmoqchi bo’ladi.

Don Kixot shu kuni kechga tomon yetib borgan joyi – karvon saroyni hashamatli qasr deb tasavvur qiladi, u yerdagi xotinlar esa go’zal malikalar bo’lib ko’rinadi, cho’chqaboqarning chiqargan hushtak ovozi go’yo uni kutib olish sharafiga chalinayotgan kuydek tuyuladi.

Don Kixotning «dushman» bilan dastlabki to’qnashishi shu karvon saroy molxonasi yonida ro’y beradi. «Muqaddas joy» deb bilgan saroyni kechasi bilan uxlamay qo’riqlab chiqadi. SHu vaqtda molini sug’ormoqchi bo’lib kelgan kishini

«dushman» deb, unga qarshi hujum qiladi. Don Kixot zarar ko’rgan molboqar sheriklarining toshbo’roni ostida qoladi.

Karvon saroy egasining Don Kixotning ritsarligiga «fatvo» berishga oshiqqanining sababi undan tez qutulish edi. Endi «haqiqiy» ritsar sifatida yo’lga chiqqan Don Kixot xo’jayini tomonidan kaltaklanayotgan podachi bolaga duch keladi va uni azobdan qutqarib yuboradi. Don Kixot qilgan ishidan benixoya xursand, chunki u go’yo juda katta adolatsizlikka chek qo’ygan edi. Lekin bolaning bundan keyingi taqdiri uning xayoliga ham kelmaydi.

Toledo savdogarlari bilan to’qnashish ham ko’ngilsiz voqea bilan tugaydi. Don Kixot ularni jahongashta ritsarlar deb yo’lini to’sib, dunyodagi barcha malikalardan ko’ra o’zining Dulsineyasini go’zal malika deb tan olishga majbur etadi. O’jarlik bilan ularga hujum boshlagan va qattiq kaltaklanib o’rnidan turishga majoli qolmagan Don Kixot qayg’urmaydi, chunki jahongashta ritsar bilan bunday voqealarning yuz berib turishi, uningcha, tabiiy bir xol edi.

Servantesning asar muqaddimasida «ritsar romanlarining qulay deb turgan istehkomini ag’darish» ta’kidlangan asosiy fikri Don Kixotning birinchi safari tasvirlangan yuqoridagi epizodlardayoq ochiq ko’rinadi. Ritsarlikning halokatli ta’siriga qarshi dadil va uzluksiz kurash olib borish g’oyasi butun voqealar davomida yozuvchining diqqat markazida turadi.

Don Kixot ritsar sarguzashtidan qaytgan va qattiq shikastlanib yotgan vaqtida uning kutubxonasini ko’zdan kechirgan do’stlari, jiyani va xizmatchi ayol «quruq til bilan yozilgan dag’al va bema’ni», zarardan boshqa narsa keltirmaydigan kitoblar haqida: «Bir to’da qilib yig’ib, kuydirib tashlash kerak», «Ularni to’ppa-to’g’ri tashqariga uloqtirmoq zarur», deydilar. Bu yozuvchining ritsar romanlariga nisbatan kuchli nafratining ifodasi edi.

Don Kixot navbatdagi safarga chiqishi oldidan Sancho Pansa degan bir sodda dexqonni topib, o’ziga yordamchi – yaroqbardor qilib oladi va bu xizmatlari evaziga uni qo’lga kiritadigan orollaridan biriga gubernator qilib tayinlamoqchi bo’ladi. Yo’lda uzoqdan ko’ringan shamol tegirmonlar unga dushman devlar bo’lib tuyuladi.

Don Kixot birinchi duch kelgan tegirmonning parragiga nayza sanchadi. Harakatlangan parraklar uni oti bilan ilib ko’tarib ketadi, so’ngra yerga uloqtirib tashlaydi. Sancho Pansa og’ir ahvolda yotgan xo’jayinga bu fojia uning so’zlariga ishonmaganligidan kelib chiqqanini afsus bilan bildiradi. Don Kixot esa kitoblari bilan birga uyini xam o’g’irlab ketgan ashaddiy dushmani jodugar Freston devlarni shamol tegirmonlariga aylantirib qo’yganini, lekin, baribir, uning makkorligi Don Kixot qilichi kuchiga bardosh berolmasligini aytib, o’z fikridak qaytmaydi.

Ikkinchi kuni Don Kixot va Sancho yo’lda ikki monax va ularning xizmatchilariga duch keladi. Ulardan orqaroqda karetada biskaylik ayol ham ketayotgan edi. Bu yo’lovchilar Don Kixotga «malika»ni olib qochib ketayotgan jodugarlar bo’lib ko’rinadi. U xonimni ozod etish uchun hujum qiladi. Sancho Pansani esa faqat bir narsa – yerda cho’zilib yotgan, «engilgan» kishining narsalarini o’lja qilib olishgina qiziqtirar edi. Biroq har ikkala qahramon – ritsar va uning yarog’bardori ham yo’lovchilarning qattiq zarbasiga uchraydilar,

Shu singari ko’ngilsiz voqealar Sancho Pansani umidsizlikka tushiradi va u qishlog’iga qaytib, xo’jalik ishlari bilan shug’ullanmoqchi bo’ladi. Biroq Don Kixot unga g’alaba kuni yaqinlashib qolganini, bardam bo’lish kerakligini uqtirgandan so’ng, u Don Kixotni tashlab ketolmaydi.

Don Kixotning xizmatkoridan g’amgin qiyofadagi ritsar laqabini olishi bejiz emas. Uning o’zi ham o’tmishdagi ritsarlar misolida shunday nomga tezroq erishishni istab, qalqoniga xafaqon bashara surati soldirmoqchi bo’lganida, Sancho Pansa unga e’tiroz bildirib, bu narsaga vaqt va pul sarf qilib o’tirishning sira hojati yo’qligini, u betidagi niqobini ochib basharasini ko’rsatsa, shuning o’zi kifoya qilishini, chunki ochlikdan va jag’ tishlaridan ajralganligidan aft-angori ancha xunuklashib, g’amgin va ayanchli tus olganini aytadi. Sanchoning jiddiy so’zi hazildek tuyulsa ham, lekin u ko’p masalalarga to’g’ri baho berar edi.

Ritsar romanlariga berilish Don Kixotni tentaksimon holga tushirsa ham, lekin uning qalbi pok va intilishlari beg’arazdir. Bu fikrni romandagi bir epizod yaxshi tasdiqlaydi. «Haqoratlangan va mulkdorlar tomonidan tahqirlanganlarni qo’llash uchun qasam ichgan» Don Kixot yo’lda qo’llari kishanlangan mahbuslarga duch kelib, ularni qutqarishga urinadi. Tabiat tomonidan erkin yaratilgan kishilarni qul holiga keltirish katta adolatsizlik, deb ularni bo’shatib yuborishlarini talab etadi. Biroq soqchilar uning talablarini bajarmaydilar. Bundan g’azablangan Don Kixot hujum qilib, otryad boshlig’ini holsizlantiradi, so’ngra yaxshi qurollanmagan soqchilarga zarba berib, mahbuslarni kishandan qutqaradi.