Лекция. TÁRbiyaNÍŃ ulíwma metodlarí Jobası

Lekciyalardı shólkemlestiriw. Bul tiykarınan joqarı klass oqıwshıları ushın ótkeriledi. Lektor sıpatında muǵallim, ata-ana, ilimpazlar, ádebiyat, kórkem óner ǵayratkerleri hám oqıwshılardıń ózleri de shıǵıp sóylewi múmkin. Bunıń ushın mektepte lektorlar gruppası dúziledi. Lektorlar gruppasınıń hár bir aǵzasına bir jılǵa bir yamasa eki tema beriledi. Berilgen temalar tiyisli máseleni hár tárepleme úyreniwge, tiyisli ádebiyatlar menen puxta tanısıwǵa, sonday-aq lekciya barısında paydalanıw ushın kórsetpe qurallar tayarlawǵa da múmkinshilikler beredi.
Disputlardı shólkemlestiriw hám ótkeriw. Bul joqarı klass oqıwshıların tárbiyalawdıń bir turi. Disput latın tilinen alınǵan bolıp, bizińshe básekelesemen degen maǵananı ańlatadı. Disput - bul quramalı, sonıń menen birge oqıwshılarǵa milliy-ruwxıylıq hám ádep-ikramlıq tárbiyasın beriwde tez tásir etetuǵın formalardan biri. Disput hár qıylı temalarda ótkeriledi. Tema boyınsha sorawlar aldın-ala jazıp qoyıladı. Oqıwshılar sorawlarǵa ózinshe tayarlanıp bolǵannan keyin belgilengen kúni disput ótkeriledi. Disputtı bir yamasa eki oqıwshı basqaradı. Disputtı juwmaqlar waqtında nadurıs kóz-qaraslarǵa toqtalıp ótiledi hám durıs túsinikler tolıqtırıladı.
Oqıwshılar konferenciyasın shólkemlestiriw. Konferenciya maqseti hám mazmunına qarap usınıs, juwmaqlawshı hám tematikalıq siyaqlı úsh túrge bólinedi.
Usınıs turi. Bunda oqıwshılar oqıǵan kitapları boyınsha qısqasha bayanlamalar yamasa doklad jasaydı. Oqıwshılar konferenciyasınıń usınıs túriniń maqseti oqıwshılardı belgili bir ádebiy shıǵarmaǵa qızıqtırıwdan ibarat.
Juwmaqlawshı túri. Bul sherektiń yamasa jıldıń axırında ótkeriledi. Bunda oqıwshılardıń oqıǵan shıǵarmaları talıqlanadı. Oqıwshılar konferenciyasınıń usınıs túri kóbinese ayrım jazıwshı yamasa shayırlardıń ómiri hám dóretiwshilik xızmetlerine baǵıshlanıp ótkeriledi.
Tematikalıq turi. Bul belgili bir mashqalaǵa baǵıshlanǵan kitaplar boyınsha ótkeriledi. Konferenciya dáslep gúrriń túrinde muǵallimniń kiris sózi menen baslanadı. Sońınan oqıwshılar ózleri oqıǵan kitaplar boyınsha pikir ayta baslaydı. Konferenciyanı ótkeriw metodikasıda disputqa uqsas, geyde konferenciyanıń keyni disputqa da aylanıp ketedi.