Лекция. TÁRbiyaNÍŃ ulíwma metodlarí Jobası

Shınıqtırıw metodı. Shınıqtırıw belgili bir háreketlerdi hám qılıqlardı bir neshe mártebe tákirarlawdı óz ishine aladı. Shınıqtırıw bala ushın sanalı hám dóretiwshilik jumıs. Shınıqtırıw nátiyjesinde oqıw hám kónlikpeler, minez-qulq-ádetleri jańa bilimler menen bayıtıladı. Oqıwshınıń aqılıy qábiliyati rawajlanadı, morallıq tájiriybesi keńeyedi hám bayıydı. Belgili, bekkem kónlikpeler hám ádetlerdi qáliplestiriw ushın muǵallim shınıqtırıwdı shólkemlestiriwde bir qatar qaǵıydalarǵa boysınǵanı maqul. Máselen, oqıwshılardıń biz tárbiyalamaqshı bolǵan sıpattıń mánisin hám áhmiyetin túsiniwlerine eriskenimiz, oqıwshılarǵa berilgen háreket kórinisin aytqanda, imkániyatı barınsha qısqa hám anıq qaǵıydalar menen súwretlep barǵanımız, hár bir waqıt bólegindegi qaǵıydalardı kemeytkenimiz, qoyılǵan talaptı sózsiz orınlatqanımız, kónlikpe hám ádetlerdi ózlestirip alıw ushın asıǵıslıqqa jol qoymaǵanımız durıs boladı.
Oqıwshıda bekkem kónlikpelerdiń, minez-qulıq-ádetleriniń qáliplesip barıwı ushın muǵallim úyretiwshi shınıǵıwlardı, balalardıń xızmetlerin pedagogikalıq jaqtan shólkemlestiriwde tómende kórsetilgen bir qatar qaǵıydalarǵa súyenedi;
- oqıwshı biz tárbiyalamaqshı bolǵan sıpatlardıń mazmunın hám áhmiyetin túsiniwleri tiyis;
- olardıń ne islew hám qalay islew kerekliginde bilip barǵanı maqul;
- kónlikpe hám minez-qulıq-ádetleriniń payda bolıwı ushın belgili waqıtlardıń talap etilgeni durıs boladı. Sebebi, usı waqıttan balalardıń jeke ózgeshelikleri hár tárepleme ǵárezli boladı.
Shınıqtırıw jumıslarında úyretiw isleri kóp qollanıladı.Úyretiw arqalı balalar belgili bir xızmetlerdi orınlawǵa ádetlenedi. Oqıwshılardıń pedagogikalıq xızmetlerin shólkemlestiriw hám ol arqalı oqıwshılarda belgili bir minez-qulıq-ádetlerin qáliplestiriw ushın muǵallim pedagogikalıq maqsetke baǵdarlanǵan qızıqlı oyınlardı, tapsırmalardı paydalanadı.
Tárbiyalıq islerde shınıqtırıw metodınıń xızmet, kúndelik rejim hám tapsırma beriw arqalı shınıqtırıwlar qollanıladı.
Xızmet arqalı shınıqtırıw - bul tiptegi shınıqtırıwda oqıwshılar minez-qulıq normaları hám qaǵıydalarına muwapıq háreket qıladı. Oqıtıwshı balalardı birinshi klassqa qabıl alǵannan keyin sol waqıttıń ózinde-aq jańa turmısqa úyrete baslaydı. Bul turmıstıń tiykarǵı mazmunın oqıw xızmeti quraydı. Tuwrı shólkemlestirilgen xızmettegi shınıqtırıw, alǵa maqset qoyıw, xızmetti operaciyalar yamasa birneshe buwınlarǵa bóliw, háreketlerdi hám olardıń orınlanıwın jobalastırıwdı óz ishine aladı. Sonlıqtan oqıwshılardıń xızmet etiw sheńberin keńeyter ekenbiz, biz bul xızmettiń jámiyetlik paydalı miynet xarakterinde bolıwın támiyinlep, olardıń qızıǵıwların qanaatlandırıwımız kerek.