Лекция. TÁRbiyaNÍŃ ulíwma metodlarí Jobası

Oqıwshılar jıynalısın ótkeriw. Bul-oqıwshılardı tárbiyalawdıń hám olardı jámáátke biriktiriwdiń massalıq forması. Jıynalısta eń aktual`, ózlerin qızıqtırıp júrgen máseleler boyınsha balalar kollektiviniń pikiri payda boladı. Jıynalısta mektep ishindegi tártip hám basqa da máseleler qaraladı.. Baslawısh klasslarda oqıwshılar jıynalısın muǵallim, al, joqarı klasslarda oqıwshılardıń ózleride ótkeredi. Jıynalısta eń tiykarǵı máselelerden úlgeriw hám klasstaǵı tártip máselesi, klass jámáátin bekkemlew máseleleri sóz etiledi. Jıynalıstıń tabıslı bolıwı ushın onı durıs basqarıw hám tiyisli qararlardı tez orın orınlarına qoyıw ayrıqsha orındı iyeleydi.
Klass saatların ótkeriw. Bul tárbiyalıq jumıslardı shólkemlestiriwdiń frontal` forması. Klass saatı aldın ala kestede belgilenedi. Biraq bunı qosımsha saat dep túsiniwge bolmaydı. Klass saatınıń dawam etiw waqtı sheklenbeydi, ol geyde qısqa waqıt bolsa, geyde uzaqqa sozılıwıda múmkin. Klass saatınıń uzaq hám qısqa bolıwı oqıwshılardıń jas ayırmashılıǵına baylanıslı boladı. Klass saatınıń tematikası aldın-ala klass muǵalliminiń tárbiyalıq jobasında belgilenedi. Klass saatında ótken háptege juwmaq jasawǵa, úlgeriw isin kóriwge, ádep-ikramlılıq minez-qulıqlarına baha beriwge boladı. Biraq klass saatın tek kemshiliklerdi saplastırıwǵa baǵıshlamaw kerek. Eń tiykarǵısı, klass saatı waqtında oqıwshı óziniń tárbiyalanıp atırǵanlıqların bilmewi kerek.
Diywalı gazetalardı shıǵarıwdı shólkemlestiriw. Mektep hám klass diywalı gazetaları jámááttiń jámiyetlik pikirin paydalanıw, ayırım oqıwshılardıń minez-qulqındaǵı kemshiliklerdi joyıwǵa, unamlı qásiyetlerdi rawajlandırıwǵa járdem beredi. Diywalı gazeta-oqıwshılarǵa tek ǵana óziniń mazmunı menen tásir etip qoymaydı. Oqıwshılar redaktor, redkollegiya aǵzaları, xabarshı xızmetlerin atqarıw arqalı principiallıqqa, tuwrılıqqa, óz pikirinde turaqlılıq penen turıwǵa tárbiyalanadı. Oqıwshılar diywalı gazeta arqalı birewdi kritikalamaqshı bolsa, aldın ala ózleriniń minez-qulqın dúzetiwge háreket etedi.
Oqıwshılardıń xat alısıwına imkaniyat jaratıp beriw. Oqıwshılar xat alısıw arqalı qońsılas rayon hám qalalarda, oblastlarda, hátteki, shet ellerde jasawshı dosları menende pikir alısıw imkániyatına iye boladı. Olar óz xatlarında klasındaǵı jetiskenliklerdi, awılı yamasa qaladaǵı ózgerislerdi xabarlaydı. Oqıwshılardıń xat alısıwı - xalqımızdıń parawan turmısı, onıń paraxatshılıqqa hám basqa xalıqlar menen doslasıwǵa bolǵan umtılıwları haqqında haqıyqat, shın maǵlıwmat beriwdiń tiykarı bola aladı.