Aktiv hesablarda ilk qalıq və artma debetdə, azalma kreditdə, passiv hesablarda isə ilk qalıq və artma kreditdə, azalma isə debetdə göstərir. Deməli debet və kredit terminləri aktiv və passiv hesablar üçün əks məna kəsb edir. Aktiv hesablar açılarkən ilk qalıq balansın aktivindən götürülərək hesabın debetində yazılır. Bu hesablar üzrə artma və ya daxil olma hesabın debetində, azalma (məxaric) və ya təsərrüfatdan çıxma isə kreditdə əks etdirilir. Hər bir hesabat dövrünün sonunda hesablarda əks etdirilmiş əməliyyatların məbləğlərinin yekunu, yəni dövriyyələr müəyyən edilir. Dövriyyə müəyyən edilərkən ilk qalıq (S1) nəzərə alınmır. Aktiv hesab üzrə son qalıq (S2) müəyyən edilərkən ilk qalığın, yəni debet qalığının üzərinə (S1) debet dövriyyəsini (Dd) gəlib, ondan kredit dövriyyəsini (Kd) çıxmaq lazımdır. Aktiv hesablar ancaq debet saldosuna (qalığına) malik ola bilər, ya da qalıq sıfra bərabər ola bilər. Qeyd edilənləri düstur şəklində belə ifadə etmək olar:
