Təhsil müəssisəsinin rəhbəri bütün pedaqoji kollektivin işini təşkil edən əsas və məsuliyyətli şəxsdir. Onun davranış manerası, iddialı olması, intellekti, ardıcıllığı və məqsədyönlü olması məktəbin fəaliyyət tərzinə, onun ictimaiyyət arasında və valideynlərin nəzərində nüfuzuna, kollektivin əxlaqi-psixoloji durumuna böyük təsir göstərir.
Pedaqoji kollektivə rəhbərliyin bir sıra səmərəlilik şərtləri vardır:
dominantlıq – tabeliyində olanlara təsir etmək bacarığı;
özünə inam – bu keyfiyyətə malik rəhbərin olduğu kollektiv sabahkı gün barədə narahatlıq keçirmir, psixoloji baxımdan hamı rahatdır. Məhz bu hal da vəzifələrin icrası üçün yüksək motivasiya yaradır;
kreativlik ( məsələləri yaradıcılıqla həll edə bilmək bacarığı);
hər hansı məsələnin həllində son sözü özünün (rəhbərin) deməsi;
səmərəli rəhbərlik stili – avtoritar və demokratik idarəetmə. Bu rəhbərlik tərzlərinin hər ikisi şəraitə uyğun, yerində və düzgün tətbiq edilərsə, uğurlu ola bilir.
Yoxlama sual və tapşırıqları “İşgüzar ünsiyyət etikası” anlayışına tərif verin. Ünsiyyətin ümumi etik prinsipləri hansılardır?
İşgüzar ünsiyyətin “üfiqi” qaydasını necə başa düşürsünüz? Bir-birinə əks olan ünsiyyət növləri hansılardır?
Pedaqoji kollektivdə ünsiyyətə təsir edən və onu çətinləşdirən hadisələr hansılardır?
Pedaqoji kollektivdə pozucu konfliktləri hansı amillər yaradır? Müəllimin konfliktli situasiyanın iştirakçısı olması əxlaqi-etik baxımdan düzgündürmü? Konfliktin qarşısını hər zaman almaq olarmı?
Müasir təhsil müəssisəsi rəhbərinin hansı xarakterik keyfiyyətləri olmalıdır? Məktəb direktoru müəllim kollektivində sağlam psixoloji mühit yaratmaq üçün hansı etik normalara əməl etməlidir?
