Partov (bo‘z) yerlar - bu oldin haydalma yer bo‘lib, keyin kuzdan boshlab bir yildan ko‘p
qishloq xo‘jalik ekinlarini ekish uchun foydalanilmagan va toza shudgor (par) uchun
qoldirilmagan yer uchastkalaridir.
Pichanzorlar - doimiy pichan o‘rish uchun foydalaniladigan yer turlaridir. Pichanzorlar
davlat standartlariga asosan suv bilan qoplanadigan, quruq, zaxlashgan, tubdan yaxshilangan,
toza, har xil darajada chakalaklar, o‘rmon da-raxtlari va do‘ngliklar bilan qoplangan bo‘lishi
mumkin.
Yaylovlar - doimiy chorva mollarini boqish uchun (bunday foydalanish asosiy
hisoblanadi) foydalaniladigan hamda mollarni boqish uchun yaroqli, pichan o‘rish uchun
foydalanilmaydigan va partov (bo‘z) yerlar hisoblanmagan yer turlaridir.
Yer turlarini transformatsiyalash - yer turlarining mavjud tarkibidan loyihaviy tarkibiga
o‘tish yerlarni transformatsiyalash - yerlarni bir turdan ikkinchisiga o‘tkazish yo‘li bilan amalga
oshiriladi. Transformatsiya bir martalik akt bo‘lmasdan, balki ko‘p qirrali va uzoq jarayondir;
tashkiliy-xo‘jalik, texnik va huquqiy jixatlardan bu yer tuzishning eng ahamiyatli masalalaridan
biridir. Yerlarni transformatsiyalashning injenerlik-texnik mazmuni yer turlarini tubdan va
yuzaki yaxshilash asosida, bir turdan ikkinchisiga o‘tkazishni ta’minlovchi kompleks meliorativ,
madaniy-texnik va agrotexnik tadbirlarni ishlab chiqishdan iborat bo‘ladi.
Yer turlarini madaniylashtirish - yer uchastkalarini tabiiy holatdan madaniy holatga
o‘tkazishni bildiradi, ya’ni tabiiy yaylovlar, pichanzorlarni yoki noqishloq xo‘jalik yerlarini
haydalma yerlarga, madaniy yaylovlar va pichanzorlarga kompleks melioratsiyalash va
agrotexnik tadbirlar yordamida transformatsiyalashdir.
Tuproqlarni madaniylashtirish - bu xududiy tuproq unumdorligini to‘plashning uzoq
jarayoni bo‘lib, u yerlarni transformatsiyalash bilan bog‘liq bo‘lmasligi ham mumkin.
