Mashg‘ulotni o‘tkazish metodikasi. Tarbiyachi mashg‘ulotni boshlashda bolalardan qaysi uy parrandalarini bilishlarini so‘raydi, ularga ana shu parrandalarning rasmlarini qanday chizishganini eslashni tavsiya etadi, bolalarning qushlar tuzilishining xarakterli xususiyatlari va harakatlari to‘rrisidagi bilimlarini aniqlaydi. So‘ng qaysi parrandalarni yasashlari, ularning tanasi, boshi, bo‘ynining uzunligi, oyoqlari holati qanday bo‘lishi, ularni qanday usullar bilan yasash ma’qulligi haqida o‘ylab ko‘rishni taklif qiladi. Bunda bolalarga predmet tasvirlangach, angoblar qo‘yilgan stolga o‘tish va yasalgan qushchani bo‘yash mumkinligini aytish kerak. Bolalar ishga kirishganlaridan keyin tarbiyachi ularning yoniga borib, nimalarni yasayotganliklarini aniqlaydi, o‘z maslahatlari va savollari bilan ularni mavzuni to‘g‘ri hal qilishga yo‘naltiradi.
