Rəyçilər: Yeganə Qəhrəmanova

Qeyd: İyerarxiya sözü yunan mənşəli sözdür. Bu söz hieros (“müqəddəs”) və arche (“hakimiyyət” // “idarəetmə”) sözlərinin birləşməsindən əmələ gəlmişdir. İyerarxiya bir şeyin hissələrinin və ya elementlərinin ən yüksəyindən, ən alçağına qədər, ardıcıllıqla düzülməsidir. Aşağı həlqələrin yuxarı həlqələrə tabeçilik qaydasıdır. Mərkəzləşdirilmiş strukturların idarəetmə prinsipidir.
İyerarxiya sözü ikinci mənada vəzifələrin bir-birinə tabe olunmuş halında düzülməsidir.


Effektiv işgüzar ünsiyyət. Effektiv işgüzar ünsiyyət üçün əsas şərt motivasiyadır. İşgüzar ünsiyyətdə bir şəxs hər hansı bir təşkilatın nümayəndəsi kimi çıxış edir. Fəaliyyət prosesində şəxsi ehtiyaclar təmin edilmirsə və ya insanın öz düşüncə və davranış tərzi qrupla üst-üstə düşmürsə, onda qarşıdurma yarana bilir (daxili, şəxsiyyətarası) və işə marağın azalması baş verir. İşgüzar ünsiyyətdə tətbiq olunan effektivliklə əlaqədar olaraq, işgüzar ünsiyyətin bütün iştirakçılarının həm son nəticəyə çatmasında, həm də şəxsi niyyətlərinin həyata keçirilməsində qarşılıqlı asılılıq diqqət mərkəzində olmalıdır.
Birgə fəaliyyət zamanı fərdi idrak proseslərinin dinamikasının tənzimlənməsinin xüsusi mexanizmləri, problemlərin həlli üçün birgə strategiyalar, qrup üçün ümumi fəaliyyət tərzi formalaşa bilir. Bu zaman fərdi keyfiyyətlər mübadiləsi aparılır, məqsəd və hərəkətləri hədəflərlə əlaqələndirmək bacarığı, istəyi inkişaf etdirilir və digər insanların hərəkətləri nəzarətə götürülür. Bütün bunlar informasiya məkanının genişlənməsinə öz töhfəsini verir, problemin həll olunmasını və necə həll olunmasını görməyə imkan verir. Bu qarşılıqlı əlaqənin nəticəsi iştirakçılar arasında bir növ fikirlərin birləşməsidir. Uyğunluq ortaq fəaliyyət iştirakçıları arasında iş birliyidir. Buna görə effektiv işgüzar ünsiyyətin başqa bir prinsipi birgə fəaliyyət zamanı komanda üzvlərinin uyğunluğu və harmoniyasıdır.
Effektiv işgüzar ünsiyyətin əhəmiyyətli bir hissəsi rəsmi ünsiyyətdir. Yəni iş saatları ərzində təşkilat daxilində insanların qarşılıqlı əlaqəsidir. Bu növ işgüzar qarşılıqlı əlaqə korporativ ünsiyyət adlanır və özünəməxsus xüsusiyyətlərə malikdir. Beləliklə, məsələn, işgüzar korporativ ünsiyyətdə bir tərəfdaşla əlaqəni dayandırmaq mümkün deyil (ən azı hər iki tərəf üçün itkisiz). Buna görə də bəyənmələrindən və bəyənməmələrindən (xarici görkəmi, boy-buxunu, geyimi və s.) asılı olmayaraq, ünsiyyət iştirakçılarının təmasları tələb olunur.