Rəyçilər: Yeganə Qəhrəmanova

Qeyd: Korporativ sözü korporativ ünsiyyət, korporativ işgüzar rabitə, korporativ idarəetmə və s. ifadələrdə işlənir. Məsələn, korporativ idarəetmə biznesin təşkilati-hüquqi formasının idarə olunması, təşkilati strukturların optimallaşdırılması, qəbul olunmuş məqsədlərə müvafiq olaraq kompaniyanın firmalararası və firmadaxili münasibətlərinin qurulmasıdır.
Korporativ idarəetməni xüsusi tip kimi ayırsaq, başlıca xüsusiyyətləri korporasiyanın spesifikliyi ilə şərtlənən idarəetmə obyekti olaraq onu müəyyənləşdirir: “Səhmdarların prioritet maraqları və onların korporasiyanın inkişafındakı rolu üzərində qurulan idarəetmə, səhmdarların qarşılıqlı təsirini nəzərdə tutan mülkiyyət hüquqlarının reallaşdırılmasını hesaba alan idarəetmə və sonda korporativ mədəniyyəti doğuran idarəetmə, başqa sözlə, ümumi ənənələr kompleksi, nizamnamələr, davranışlar prinsipi kimi başa düşülür”.

Korporativ işgüzar rabitə başqa bir işgüzar qarşılıqlı əlaqə kimi şərti məhdudiyyətlərə məruz qalır.Yəni ünsiyyət hüquqi, sosial normalara, daxili qaydalara, təşkilatçılıq ənənələrinə və s. riayət etməyi tələb edir. Bununla birlikdə, işgüzar (korporativ) ünsiyyət “rəsmi ünsiyyət” anlayışından daha geniş bir məfhumdur. Həm muzdlu işçilərin, həm də mülkiyyətçi işəgötürənlərin yalnız təşkilatlarda deyil, həm də müxtəlif işgüzar qəbullarda, seminarlarda, sərgilərdə və s. yerlərdəki fəaliyyətidir. Buna görə də korporativ ünsiyyətin aşağıdakı prinsiplərini ayırd etmək olar:

• fərdin yaradıcılıq potensialının və peşə biliklərinin üzə çıxarılması üçün şərait yaratmaq prinsipi;
• səlahiyyət və məsuliyyət prinsipi;
• təşviq və cəza prinsipi;
• iş vaxtından səmərəli istifadə prinsipi.
Bu prinsiplərə uyğun istifadə edilmədən peşə yararlılığının əsas meyarı mümkün deyildir. Məsələn, effektiv işgüzar ünsiyyət zamanı menecer aşağıdakılara əməl etməlidir:
• öz bacarıqlarına, texnikasına, taktikasına və ünsiyyət strategiyasına malik olmaq;
• ünsiyyəti təşkil edə bilmək;
• ünsiyyətin məqsəd və vəzifələrini formalaşdıra bilmək;
• şikayət və müraciətləri həll etmək;
• danışıqlar aparmaq, işgüzar görüşü idarə etmək;
• münaqişələrin qarşısını almağa və onları həll etməyə hazır olmaq;
• sübut edə və əsaslandıra, mübahisə edə və inandıra, razılığa gələ, söhbət, müzakirə, dialoq, mübahisə edə bilmək;
• psixoterapiya aparmaq, stresdən azad olmaq, həmsöhbətdəki qorxu hissi, davranışına nəzarət etmək bacarığına sahib olmaq.