Əşyaların sayının onların ölçüsündən,tutduğu sahədən və formasından asılı olmadığının göstərilməsi. Uşaqları 5-ə qədər bütün ədədlərlə tanış etdikdən sonra onlara göstərirlər ki, neçə sualına cavab vermək üçün sayın hansı istiqamətdə aparılmasının əhəmiyyəti yoxdur. Onlar eyni əşyaları müxtəlif istiqamətdə soldan sağa və sağdan sola, yuxarıdan aşağıya və aşağıdan yuxarıya saymaqla buna əmin olurlar.
Eyni əşyaları müxtəlif üsullarla saymaq uşaqları inandırır ki, istənilən əşyadan başlayaraq və istənilən istiqamətdə saymaq olar, ancaq bu zaman heç bir əşyanı buraxmaq və heç bir əşyanı iki dəfə saymaq olmaz.Tərbiyəçi uşaqlara hansı əşyadan saymağa başladıqlarını yadda saxlamağın vacib olduğunu izah edir.
Çoxluqların elementləri saylarının bərabərliyinin müəyyən edilməsi. Böyük qrupda bərabər sayda əşyalardan ibarət çoxluqların tərtib ediməsinə aid çalışmalara böyük yer verilir. Bu qrupda uşaqlar hər bir növdən onların neçə oyuncaqları olduğunu danışmağı və ümumiləşdirmə aparmağı bacarmalıdırlar. Onlar öz cavablarında xüsusini və ümumini əks etdirmək bacarığına dərhal yiyələnmirlər. Əvvəlcə tərbiyəçi onlara təklif edir ki, müxtəlif əşyaların hər birindən neçəsi olduğunu söyləsinlər. Məs.”Mənim üst zolaqda 4 matryoşka, orta zolaqda 4 yolka, alt zolaqda isə 4 göbələk varımdır.” “Düzdür, səndə müxtəlif oyuncaqların hər birindən 4 oyuncaqvar.”-deyə tərbiyəçi ümumiləşdirməni təkrar edir. Uşaqlar tədriclə hər qrupda neçə əşya olduğunu müstəqil təsvir etməyi və ümumiləşdirməyi öyrənirlər.
Həm konkretləşdirmə, həm də ümumiləşdirmə tələb edən sualları müxtəlif şəkildə vermək faydalıdır: “Sizin neçə sıra əşyanız var? Hər sırada neçə əşya var? Müxtəlif əşyaların hərəsindən neçəsi var? Bütün sıralardakı əşyaların sayı haqqında nə demək olar?” və s. Tərbiyəçi tədriclə tapşırıqların materialının xarakterini müxtəlifləşdirir. Məs. Uşaqlar üzərində göstərilən sayda əşyalar təsvir edimiş şəkilləri seçirlər. Onlar görürlər ki, istənilən əşyalar bərabər ola bilərlər.
