Şəxsiyyətin sosiallaşması obyektiv hadisə olub hər bir insanın həyatında müşahidə olunur. Şəxsiyyətin sosiallaşması çoxtərəfli hadisədir və sosiologiya, kulturologiya, etnoqrafiya, psixologiya, pedaqogika və b.elmlər tərəfindən öyrənilir.
Yaş dövrlərinin müəyyən edilməsi uşaqların bilik səviyyələri ilə əlaqədar meydana gəlmişdir. Həm xalq pedaqogikasında, həm də görkəmli filosoflar, pedaqoqlar uşaqların yaş və fərdi xüsusiyyətlərinin nəzərə alınmasını vacib hesab etmişlər. Çünki hər bir yaş dövrü üçün uşaqların fiziki, psixoloji və sosial inkişafının özünəməxsus səviyyəsi vardır.
Qədim yunan filosofu Platon 30 yaşa qədər olan dövrləri səciyyələndirmişdir: 3-6 yaşlı uşaqlar (oynamalı), 7-12 yaşlı (dövlət məktəbinə getməli), 12-16 yaşlı palestra (güləşmə) davam etməli, 16-18 yaşlı hesab, həndəsə, astronomiya öyrənməli, 18-21 yaşlı hərbi və mülki təcrübə keçməli, mücərrəd zehni fəaliyyətə həvəs göstərənlər 30 yaşa qədər oxumalı idilər.
