Təhsil haqqında azərbaycan respublikasinin qanunu

Maddə 4. Təhsilin əsas məqsədi
4.0. Azərbaycan Respublikasında təhsilin əsas məqsədi aşağıdakılardır:
4.0.1. Azərbaycan dövləti qarşısında öz məsuliyyətini dərk edən, xalqının milli 
ənənələrinə və demokratiya prinsiplərinə, insan hüquqları və azadlıqlarına hörmət 
edən, vətənpərvərlik və azərbaycançılıq ideyalarına sadiq olan, müstəqil və yaradıcı 
düşünən vətəndaş və şəxsiyyət yetişdirmək;
4.0.2. milli-mənəvi və ümumbəşəri dəyərləri qoruyan və inkişaf etdirən, geniş 
dünyagörüşünə malik olan, təşəbbüsləri və yenilikləri qiymətləndirməyi bacaran, 
nəzəri və praktiki biliklərə yiyələnən, müasir təfəkkürlü və rəqabət qabiliyyətli 
mütəxəssis-kadrlar hazırlamaq;
4.0.3. sistemləşdirilmiş bilik, bacarıq və vərdişlərin mənimsənilməsini və ixtisasın 
daim artırılmasını təmin etmək, təhsilalanları ictimai həyata və səmərəli əmək 
fəaliyyətinə hazırlamaq.

---

 
Maddə 5. Təhsil hüququna dövlət təminatı
5.1. Dövlət hər bir vətəndaşın təhsil alması üçün müvafiq şəraitin yaradılmasına 
təminat verir və təhsilin hər hansı pilləsindən, səviyyəsindən və formasından məhrum 
edilməsinə yol vermir.
5.2. Dövlət cinsindən, irqindən, dilindən, dinindən, siyasi əqidəsindən, 
milliyyətindən, sosial vəziyyətindən, mənşəyindən, sağlamlıq imkanlarından asılı 
olmayaraq, hər bir vətəndaşa təhsil almaq imkanı yaradılmasına və ayrı-seçkiliyə yol 
verilməməsinə təminat verir.
5.3. Dövlət mülkiyyət formasından asılı olmayaraq, bütün təhsil müəssisələrinə işə 
qəbulda, vəzifələrə təyin olunmada və ya seçilmədə, əməyin stimullaşdırılmasında, 
təhsil müəssisələrinə qəbul olunmada, təhsilalanların təqaüdlə təmin edilməsində, 
ixtisasların seçilməsində, biliyin qiymətləndirilməsində, məzunların işlə təmin 
edilməsində, təhsilin növbəti pillədə davam etdirilməsində, ixtisasın artırılmasında və 
təhsil sahəsində digər məsələlərdə kişilər və qadınlar üçün bərabər imkanlar 
yaradılmasını təmin edir.
5.4. Dövlət hər bir vətəndaşın icbari ümumi orta təhsil almaq hüququnu təmin 
edir. Dövlət təhsil müəssisələrində hər bir təhsilalan pulsuz ümumi təhsil almaq 
hüququna malikdir. Dövlət orta ixtisas təhsilində və ali təhsilin hər bir səviyyəsində 
qanunvericiliyə uyğun olaraq təhsilalanların yalnız bir dəfə pulsuz təhsil almaq 
hüququnu təmin edir.
5.5. Dövlət əmək bazarının tələblərinə uyğun olaraq təhsil müəssisələrinə ixtisaslı 
kadr hazırlığı üçün dövlət sifarişləri verir və məzunların müvafiq işlə təmin 
olunmasına şərait yaradır.
5.6. Dövlət maddi vəziyyətindən asılı olmayaraq, istedadlı şəxslərin təhsilini 
davam etdirməsinə təminat verir, sosial müdafiəyə ehtiyacı olanların təhsil almasına 
şərait yaradır.
5.7. Dövlət milli təhsil ənənələrinin qorunmasına, inkişafına və innovasiyaların 
tətbiqinə təminat verir.
5.8. Dövlət xaricdə yaşayan azərbaycanlıların təhsili ilə bağlı xüsusi layihələr və 
proqramlar həyata keçirir.