III. Interfaol metodlarning qo‘llanilishi. Bugungi kunda ta’lim jarayonida 500 dan ortiq interfaol metodlar faol qo‘llanilmoqda. Quyida ular orasida eng ko‘p qo‘llanilayotgan interfaol metodlar hamda ularni qo‘llash tartibi to‘g‘risida so‘z yuritiladi.
1. “Bilaman. Bilishni xohlayman. Bilib oldim” (BBB) grafik organayzeri mavzu, matn, bo‘lim bo‘yicha izlanuvchilikni olib borish imkonini beradi. U talabalarga muayyan mavzular bo‘yicha bilimlari darajasini baholay olish imkonini beradi. Uni qo‘llashda talabalar guruh yoki jamoada ishlashlari mumkin. Guruhda ishlashda mashg‘ulot yakunida guruhlar tomonidan bajarilgan ishlar tahlil qilinadi.
Grafik organayzerdan foydalanish uch bosqich asosida amalga oshiriladi:
1. Talabalarning o‘rganilishi rejalashtirilayotgan mavzu bo‘yicha tushunchalarga egalik darajalari aniqlanadi.
2. Talabalarning mavzu bo‘yicha mavjud bilimlarini boyitishga bo‘lgan ehtiyojlari o‘rganiladi.
3. Talabalar mavzuga oid ma’lumotlar bilan batafsil tanishtiriladi.
O‘quv faoliyati bevosita yozuv taxtasi yoki ish qog‘ozida o‘z aksini topgan quyidagi sxema asosida tashkil etiladi:
Bilaman
Bilishni xohlayman
Bilib oldim
Bosqichlar bo‘yicha amalga oshirilgan harakatlarning tafsiloti qo‘yidagicha:
1) talabalar kichik guruhlarga biriktiriladi;
2) talabalarning yangi mavzu bo‘yicha tushunchalarga egalik darajasi o‘rganiladi;
3) o‘quvchilar qayd etgan tushunchalar loyihaning 1-bandiga yozib boriladi;
4) talabalarning yangi mavzu bo‘yicha mavjud bilimlarini boyitishga bo‘lgan ehtiyojlari o‘rganiladi;
5) talabalarning ehtiyojlari sifatida bayon etilgan tushunchalar loyihaning 2-bandiga yozib qo‘yiladi;
6) o‘qituvchi talabalarga yangi mavzu bo‘yicha ma’lumotlarni beradi;
7) talabalar tomonidan o‘zlashtirilgan yangi tushunchalar aniqlanadi;
8) bayon etilgan yangi tushunchalar loyihaning 3-bandiga yozib qo‘yiladi;
9) mashg‘ulot yakunida yagona loyiha yaratiladi.
“Shaxsning rivojlanishi, tarbiyasi va ijtimoiylashuvi” moduli bo‘yicha “Bilaman. Bilishni xohlayman. Bilib oldim” (BBB) grafik organayzerining qo‘llanilishi
