Vİlayət bağçası beşİncİ cİld

İslam dünyasının başucalığı⁴

Bismillahir-Rəhmanir-Rəhim.

Sözün həqiqi mənasında bu xalqın yaxşı övladları olan siz gənclərlə görüşə çox sevinirəm. Xoşbəxtlikdən, bu gün bizim böyük xalqımızın arasında mömin, savadlı, dərrakəli və inamlı gənclərdən ibarət böyük bir toplum var. Allah-Taaladan istəyirəm ki, bu dindar və məsuliyyətli tələbə təşkilatında çalışan siz əzizlərə, həmçinin digər universitetlərdə və müxtəlif yerlərdə işləyən, dəyərli fəaliyyətlər göstərən digər gənclərə kömək etsin, müvəffəqiyyət bəxş etsin, sizi hidayət, çəkdiyiniz zəhmətləri qəbul etsin!
Gənc qüvvəsi

Siz heç zaman öz qüvvənizə əhəmiyyətsiz yanaşmayın. Gənc tələbə toplumu potensial və aktual bir qüvvədir. Sizin istəyiniz, işiniz, iman və etiqadınız ölkənin indiki və gələcək vəziyyətində təsirlidir. Heç şübhəsiz, pis niyyətləri olan çoxlu insanlar var; istər bu xalqın açıq düşmənləri, istərsə çox da açıq olmayan, lakin düşmən olan şəxslər. Onlar tələbənin passivləşməsini, təsir altına düşməsini, həyat yolunda bir saman çöpü kimi haraya aparsalar, getməsini istəyirlər. Başqa bir işləri budur ki, tələbədə iş, fəaliyyət və hərəkət marağı olsa, ondan bu gün kölgəsi təkcə İrana yox, bütün İslam dünyasına düşən əsl İslam müqavimətinin mübarizə gücünə qarşı istifadə etsinlər. Yəni tələbənin gənc, dərrakəli və ayıq qüvvəsindən ağlın, dinin və siyasi mövqeyi dərkin tələb etdiyi istiqamətin tam əksinə istifadə etsinlər. Əgər düşmənlər tələbəni özləri istədikləri yola çəkə bilməsələr, mütləq işləyib təbliğat aparacaqlar ki, onu hərəkətsziliyə və fəaliyyətsziliyə sala bilsinlər. Siz hər iki plan qarşısında möhkəm dayanmalısınız.

Müqavimət

Əgər səsləri düşmənlərimizin onlarla radio və televiziya kanalından və digər informasiya vasitələrindən gələn beynəlxalq təbliğatı izləsəniz, qeyd etdiyim məqamı tam şəkildə müşahidə edərsiniz. Əlbəttə, mənim daxili qruplarla işim yoxdur. Daxildə də düşmənlərin məqsədlərini izləyənlər mövcuddur, lakin əhəmiyyətsizdirlər. Onların əhəmiyyətsiz olmasına dəlil budur ki, bəlli və aşkar olan xarici düşmənlərin təbliğatının himayə çətrinə söykəniblər. Buna görə də, onlara diqqət yetirmir və diqqətinizi tələbələr arasında və ölkənin ictimai mühitində kimin düşmən, kimin dost olması ilə maraqlanmağa yönəltmək istəmirəm.

Qələbənin iki şərti

Düzgün işi və yolu tapıb hərəkətə başladıqda istədiyiniz iş baş tutacaq. Əvvəla, bilməlisiniz ki, Allahın lütfü ilə bizim tələbə gənclərimizin böyük bir qisminin malik olduğu dindarlıq və mənəvi paklıq çox böyük bir dəyərdir. Bunu əldən verməyin. Siyasi problem və yanlışlıqların əsas hissəsi bu dəyərin sıradan çıxdığı andan başlayır; bütün problemləri demirəm, əsas hissəsi belədir. Özünüzdə olan dindarlığın, Allaha və mənəviyyata təmayülün qədrini bilin, onu qoruyun, Allah və Allah övliyaları ilə mənəvi əlaqənizi bacardığınız qədər artırın. Bu iş üçün ən mühüm vasitə haram və günahlardan çəkinməkdir. Haramlardan çəkinməyin özü insanı nurlu edir, bilmədiklərinin çoxunu ona öyrədir. Siz gənc, ürəklərinizin pak və nurlu olduğundan, sizdə bu imkan çoxdur. Bunun qədrini bilin. Biz də gənc olanda qocalar və bizim indiki yaşımızda olanlar həmişə bizə deyirdilər ki, bu fürsətin qədrini bilin. Biz onların nə dediklərini yaxşı anlamırdıq, amma insan sonra anlayır. Sizin kimi mömin, ibadətçi və dindar olan qız və oğlanda çox dəyərli amil var. Dəyəri dünyadan və dünyada olanlardan artıq olan bu amil qəlbin sağlamlığı, nəfsin, ruhun paklığı və təmizliyidir. Əlbəttə, demirəm ki, tamamilə təmiz olsun. Hər halda, hamının bir səhvi ola bilər. İnsanın bəzi günahları səhv və xəta üzündən baş verir. Bunlar mümkündür, lakin Allahın lütfü ilə ölkənin dini mühitində inkişaf etmiş o nuraniliyi, səmimiyyəti, fitri paklığı qoruyun. Nə zamansa bir xəta baş versə də, dərhal Allah-Taalaya üz tutun. Peşmanlıq, tövbə və günahı təkrarlamamaq qərarı bu xətaların əlacıdır. Bu, çox böyük dəyərdir.

Çox mühüm olan başqa bir dəyər də var. Tələbələr arasında bu dəyəri məhv etməyə çalışırlar. Bu dəyər ümiddən və gələcəyə inamdan ibarətdir. Bilmədiyimiz bir gələcəyə necə etimad edə bilərik? Gələcəyə etimad özünüzə etimada görədir. Gələcək yaxşı olmalıdır. Düşünməklə, qərar verməklə, əməl etməklə və müntəzəm işlərlə siz gələcəyə ümidvar ola bilərsiniz. Ümidvar olmaq istədiyimiz gələcəyin ümumi görüntüsü belədir ki, İslam quruluşu işləməməyin və pis işləməyin təsirindən yaranan bütün zəif cəhətləri, təsiri xalqın məişətində, mədəniyyətində və əxlaqında görünən nöqsanları aradan qaldırsın. Bu işi kim görməlidir? Sizlər görməlisiniz. Zaman da çox çəkməyəcək. İndi iş başında olanlar 10-15 il bundan əvvəl sizin kimi tələbə idilər.
Həmrəylik və ümid

Siz gələcəyi qurmaq üçün indidən özünüzdə dini və siyasi baxımdan həqiqi bünövrə, təhlil və qərar qabiliyyəti, məlumatı, düşmənin müxtəlif təzyiqləri qarşısında müqavimət - düşmən bacardığı qədər təzyiq göstərir, insan onun qarşısında qaya kimi möhkəm dayanmalıdır - yaratmalısınız. Bilin ki, bu ölkədə sizin kimilər, sizinlə həmrəy, yekdil və eyni arzuda olanlar çoxdur. Siz öz işinizi görün, başqaları da öz işlərini görməkdədirlər. Və mən sizə deyirəm ki, bu gün bu həmrəylik və yekdillik təkcə buraya aid deyil, bütün İslam dünyasında var. İslam dünyasının hər bir cəmiyyətində, hətta hökumətləri bizimlə çox pis olanların da universitet və ziyalıları arasında və gənc mühitində İslam Respublikasına sevgi və tərəfdaşlıq duyğuları dərin formada mövcuddur. Mən bunları məlumat əsasında deyirəm. Bəzən görürsünüz ki, burada bir məmur, yaxud məmurabənzər və ya qeyri-məmur şəxs bir qəzetdə, yaxud başqa yerdə hər bir şeyin pozulduğunu, dağıldığını, bizim əldən getdiyimizi, öldüymüzü və kimlərinsə gəlib bizi nizama salmalı olduğunu göstərən sözlər deyir. Bəzən ölkədən xaricdə olanlara bu xəbərlər çatdıqda nigaran olurlar, elə bilirlər ki, İslam inqilabı və İslam quruluşu daxildə ciddi bir təhlükə qarşısındadır. Buna görə vahiməyə düşürlər.

Dünyanın nifrət bəslədiyi ABŞ

Siz dünyada İran kimi başqa heç bir ölkə tapa bilməzsiniz ki, ölkənin gəncləri və xalqı məsul şəxslərinin şəkillərini otaqlarına vursunlar, universitetlərdə və toplandıqları yerlərdə əllərində tutub qaldırsınlar. Dünyanın harasında toplantı zamanı ABŞ prezidentinin şəklini qaldırırlar?! Bəli, qaldırırlar desinlər ki, itil, uzaq ol, ya da yandırmaq üçün qaldırırlar. Lakin dünyanın bir çox ölkələrində - təkcə Livanda deyil, siz televiziyada Livan və Suriyanı görürsünüz - tələbə yataqxanalarında, elmi mühitlərdə və digər toplantılarda İranın dövlət başçılarının şəkillərini vururlar. Onların adını təbərrük üçün və sevimli bir şəxs kimi çəkirlər. İslam quruluşu əleyhinə aparılan güclü təbliğatlar bu həqiqətləri bizim gənc nəslin beynindən uzaqlaşdırmaq üçündür. Bizim gənc nəslimiz elə bilsin ki, hər şeyi əldən vermiş, uduzmuş və sərvəti əldən çıxmışdır. O eləcə özünü hadisələrin içinə atmalıdır. Xeyr, əsla belə deyil. Bu gün beynəlxaq məsələlərdə və xüsusən də bizim həssas regionumuzun məsələlərində elə bir vəziyyət yaranıb ki, böyük düşmənlərimiz günbəgün daha da mənfur olurlar. Bu gün dünyada ABŞ-a nifrət hər gün artır. 10-15 il əvvələ qədər az eşitmişdik ki, dünyada hansısa bir xalq ABŞ əleyhinə şüar versin. Lakin bu gün dünya ölkələrinin çoxunda ABŞ əleyhinə şüar verirlər, ABŞ-ı təcavüzkar, işğalçı, pis və şeytan hesab edirlər.

İranın böyük sərvəti

Belə hadisələrdə İslam inqilabının və İslam quruluşunun enerji mərkəzli rolunu həmişə diqqətdə saxlayın. Bizim ixtiyarımızda böyük bir sərvət vardır və o, İslam bilgisi, İslam baxışı, İslamın təklifidir. Bir quruluş və cəmiyyət qurmaq üçün İslamın təklifi insanların həqiqi, qanuni və məntiqli istəklərinə tam uyğundur. Hər bir xalq başucalığının qorunmasını istəyir. İslam müsəlman ölkələrinə və cəmiyyətlərinə bunu ciddi şəkildə tövsiyə edir: başucalığınızı əldən verməyin.

İslamın dünyaya hədiyyəsi

Özündə olan və düzgün düşünən hər bir ölkə və xalqın ürəyi istəyir ki, öz müstəqilliyini qorusun, heç kim onun işlərinə müdaxilə etməsin. İslamın müsəlman dövlət və xalqlara ciddi və təkidli əmri budur ki, digərlərinin müdaxiləsinin qarşısını qətiyyətlə alsınlar. “Allah heç vaxt kafirlərə möminlərin əleyhinə olan bir yol göstərməz!”⁵ və “Zülm edənlərə meyl etməyin”⁶ ayələri bunu təsdiq edir. Bunlar İslam həqiqətləridir, lakin çoxları bunlara diqqət yetirmirlər. Bir hədisdə göstərilir ki, mömin öz işləri barədə istədiyini edə bilər, lakin özünü rəzil edə bilməz. Hətta şəxsi əlaqələrdə də sizin haqqınız yoxdur ki, özünüzü xar edəsiniz. Buna görə, möminin şərəfi elə bir sərvət deyil ki, nə zamansa lazım olsa, onu hər kəsin ayağı altına atmağa haqqı olsun. Bu, mömin fərd barədədir, İslam ümmətinin şərəfi isə öz yerində. Hər bir xalq istəyir ki, yaşayışı yaxşı və ali səviyyədə olsun, başqalarına əl uzatmasın. İslam da bunu tövsiyə edir: “Zülm edənlərə meyl etməyin”. Yəni əsla söykənməyin. Mübadilə belə deyil. Mübadilə və alış-veriş qüdrət, əl açmaq isə rəzalət mövqeyindəndir. İslam quruluşu belə bir təməllər üzərində qurulur və bunu təmin etmək istəyir. Elə bu gün İslam quruluşunun ən inadkar düşmənləri də bu istiqlaliyyət və başucalığı istəyinə qarşı çıxırlar, hakim olub istədiklərini etməyi, hər bir ölkədə öz maraqlarını istədikləri formada təmin etməyi arzulayırlar. Hansı xalq onlara qarşı çıxsa, düşmən olurlar. Hansı bir dövlət onların qarşısında dayansa, hansı bir quruluş müqavimət göstərsə, düşmənliyə başlayırlar. Bu gün düşmənlərimizlə mübarizəmizdə və düşmənlərimizin bizimlə mübarizəsində əsas məsələ budur.

ABŞ-ın əlavə imtiyazlar istəyi

Bu gün ABŞ-ın bizimlə böyük problemi budur ki, niyə işlərinizə müdaxilə etməyə qoymursunuz? Nə üçün bizim silah, texnologiya və elm gücünə əldə edib bütün dünyada icra etmək istədiyimiz ağalığı qəbul etmir və ona qarşı çıxırsınız? İndi bölgədə İraqa və digər ölkələrə aid gördükləri işlərin hamısı region ölkələrinə öz hökmranlıqlarını daha da artırmaqdan ötrüdür. Bunun son həddi yoxdur. Gördüyünüz kimi, regionumuzun bəzi ölkələri qapılarını ABŞ-ın üzünə tam açmışlar. İndi burada bəzi sadəlövh adamlar elə bilirlər ki, qapıları ABŞ-ın üzünə açılsa, qapı-pəncərədən naz-nemət, xeyir-bərəkət yağacaq. Yoxsulluq, problem, kredit və iqtisadi uğursuzluq mərkəzi olan ölkələr qapılarını ABŞ-ın üzünə həmişə açıq qoyan ölkələrdir. Məgər ABŞ hansı ölkəyə kömək edir, yaxud kömək icazəsi verir? O, bacardıqca sorur və əmr verir. Lakin bu hədlə də qane deyillər, günbəgün artıq şeylər istəyirlər. Qapıları ABŞ-ın üzünə açıq olan ölkələr indi vahiməyə düşmüşlər. İsraillə əlaqədə və digər məsələlərdə 100 faiz ABŞ-ın istəyinə uyğun hərəkət edən Misir rejimi də indi ABŞ-ın daha artıq təsirindən və artıqtamahlığından çox qorxuya düşmüşdür. Təkcə ABŞ yox, rəftarına dinin və əxlaqın hakim olmadığı hər hansı bir hegemon dövlət meydana çıxsa, belə olacaq. Bir gün bu işləri İngiltərə görürdü, indi isə ABŞ görür. Ölkələrini ikiəlli amerikalılara verənlər indi nigarandırlar və qorxuya düşmüşlər. Əlbəttə, bunlardan gözləmək olmaz ki, bu məsələləri ümumi söhbətlərində desinlər.

Dövlətlərin gücü

Hər bir dövlətin ilk gücü onun xalqıdır. Bunlar öz xalqlarına etinasızlıq etdilər, onları saymadılar və xalqdan uzaq hökumətlərə çevrildilər. Bəllidir ki, hökumət xalqından ayrılsa, harasa arxalanmağa məcburdur. Ora da sözügedən güclərdir. Bunların əldən verdikləri ilk güc xalqları idi. Əldən verilən çox böyük ehtiyatlardan biri İslam təfəkkürü, İslam imanı və İslama etiqaddır. Onlar düşmənin ölkə daxilində xalqlarının imanının başına istədiyi bəlanı açmasına icazə verdilər. Xalqın imanı tədricən əridi. Bu onların günahıdır. Siz də bundan ehtiyatlı olmalısınız.

Universitetdə əsaslı işlər

Mənim əzizlərim! Universitetdə dərs oxumaq, universiteti İslama uyğun fəaliyyət üçün qorumaq, İslama uyğun saxlamaq və bacardıqca İslama daha çox uyğunlaşdırmaq üçün fəaliyyət göstərmək, aktiv tələbə ruhiyyəsini qorumaq, düşüncə, iman və elm təməllərini gücləndirmək çox əsaslı işlərdəndir. Çalışın özünüz kimi digər tələbələrlə, istər başqa birliklərdə olan, istər heç bir birlikdə olmayan, lakin yaxşı istedadları olan tələbələrlə yaxşı münasibətlər qurun. Hansısa bir birliyin bir çox məsələlər baxımından sizinlə həmfikir olması da mümkündür, olmaması da. Lakin çalışın bütün tələbələrlə bu təsirli, mənəvi əlaqələri davam etdirin. Allah-Taalaya təvəkkül edin. Allah sizinlədir, inşallah, mömin olsanız, Allah sizləri sevir. Allah Onun yolunda çalışan hər kəsə kömək vədi vermişdir: "Şübhəsiz, Allah Ona kömək edənlərə mütləq kömək edəcək!" Bundan daha təkidli bir ifadə yoxdur. Quranın aşkar ayəsidir, hədis deyil ki, sənədində problem olsun. Məzmununda qaranlıq bir şey yoxdur. Bu ayədə iki təkid əlaməti işlədilmişdir. Şübhəsiz, Allah-Taala Ona kömək edənlərə mütləq kömək edəcək. Ona kömək etmək də bu şərəfli yolla getməkdir.

Allahın salamı və rəhməti olsun sizə!