Xəbər bülleteni №10

Azərbaycan neftinin qiyməti 54 dollara yaxınlaşdı

07.10.2015

Oktyabrın 7-də neftin yeni qiymətləri açıqlanıb. Məlumata görə, Nyu-York birjasında “Layt” markalı neftin bir barreli 3 dollar bahalaşaraq 49,34 dollar, London birjasında “Brent” markalı neftin bir barrelinin qiyməti 3,02 dollar artaraq 52,43 dollar olub.

London birjasında “AzəriLayt” markalı neftin bir barreli isə 1,97 dollar bahalaşaraq 53,99 dollara qalxıb.

Xəbəri AZƏRTAC yayıb.

Yusif Bağırzadə AMİP sədrliyindən və partiya üzvlüyündən istefa verib

07.10.2015


AMİP-in sədri Yusif Bağırzadə postundan və partiya üzvlüyündən istefa verib. Oktyabrın 7-də APA-ya danışan Yusif Bağırzadə deyib ki, istefaya səbəb səhhətindəki problemlərdir.

Transparency.az bildirir ki, Yusif Bağırzadə 1995-2000-ci illərdə Milli Məclisin deputatı, 2003-2006-cı illərdə Mərkəzi Seçki Komissiyasının üzvü olub, bir müddət Azərbaycan Demokrat Partiyasında fəaliyyət göstərib. 2010-cu il aprelin 9-da Azərbaycan Milli İstiqlal Partiyasına üzv qəbul olunub, həmin il iyulun 10-da sədr seçilib.

Azərbaycan Milli İstiqlal Partiyasının əsasını 1991-ci ildə Etibar Məmmədov qoyub. Partiya 17 iyul 1992-ci ildən dövlət qeydiyyatındadır.