Yerdan yaroqsiz foydalanish va

O‘zbekiston Respublikasi yer resurslari va yer toifalarining

taqsimlanishi

№	Yer fondining toifalari	Umumiy maydoni		Jumladan sug‘oriladigan yerlar
jami	% hiso- bida	jami	% hisobida
1.	Qishloq xo‘jaligiga mo‘ljallangan yerlar	20473,5	46,10	4212,2	9,48
2.	Aholi punktlarining yerlari	216,3	0,50	49,4	0,11
3.	Sanoat, transport, aloqa, mudofaa va boshqa maqsadlarga mo‘ljallangan yerlar	911,0	2,05	11,8	0,02
4.	Tabiatni muhofaza qilish, sog‘lomlashtirish, rekreatsiya maqsadlariga mo‘ljallangan yerlar	75,9	0,17	0,9	0,002
5.	Tarixiy-madaniy ahamiyatga molik yerlar	4,7	0,01
6.	O‘rmon fondi yerlari	9635,9	21,69	31,3	0,07
7.	Suv fondi yerlari	830,3	1,86	4,6	0,01
8.	Zahira yerlar	12262,7	27,62	2,1	0,004
	Jami yerlar:	44410,3	100,0	4312,4	9,71

Manba: O‘zbekiston Respublikasi Yer resurslarining holati to‘g‘risida
Milliy hisobot.

Aholi punktlarining yerlari. Aholi punktlarining yerlari ma’muriy-hududiy birlik bo‘lib, davlat yer fondining barcha
toifalaridan o‘ziga xos xususiyatlari, huquqiy holati, foydalanishning asosiy maqsadiga ko‘ra ajralib turadi, ularga shu maqsadlar uchun qonun hujjatlarida belgilab qo‘yilgan shahar (posyolka) va qishloq aholi punktlari kiritilgan.
Sanoat, transport, aloqa, mudofaa va boshqa maqsadlarga mo‘ljallangan yerlar. Bunday yerlar jumlasiga sanoat tarmoqlari obyektlari, ishlab chiqarish korxonalari, shu jumladan tog‘-kon sanoati, energetika korxonalariga ishlab chiqarish va yordamchi binolar hamda inshootlar qurish uchun doimiy foydalanishga berilgan, temiryo‘l, ichki suv transporti, aloqa-kommunikatsiya liniyalari hamda ularga tegishli inshootlar, radioeshittirish, televideniye, axborot muassasalari va tashkilotlari joylashgan hamda ichki ishlar va mudofaa ehtiyojlari uchun mo‘ljallangan yerlar, shuningdek, boshqa maqsadlarda foydalanish uchun yuridik shaxslarga berilgan yerlar kiradi.
Tabiatni muhofaza qilish, sog‘lomlashtirish, rekreatsiya maqsadlariga mo‘ljallangan yerlar. Davlat qo‘riqxonalari, milliy tarixiy-tabiiy va yodgorlik bog‘lari, davlat buyrtmaxonalar, tabiat yodgorliklari, dendrologiya bog‘lari, botanika bog‘lari, alohida muhofaza etiladigan tabiiy hududlar egallagan, tabiiy davolanish omillariga ega bo‘lgan yerlar, shuningdek, ommaviy dam olish va turizm uchun foydalanishga berilgan yer uchastkalari kiradi.
Bu yerlarning asosiy maqsadi tabiiy jarayon va hodisalarni, o‘simlik va hayvonot dunyosini muhofaza qilish, ularning nodir va noyob turlarini tabiiy holatda saqlab qolish, sonini ko‘paytirish va o‘rganish, tabiiy shifobaxsh omillarga ega bo‘lgan yerlarda kasalliklarning oldini olish va davolashni tashkil etish, turizm va aholining ommaviy dam olishini tashkil etishdan iboratdir.
Tarixiy-madaniy ahamiyatga molik yerlar. Respublikamiz tarixiy-madaniy ahamiyatga molik yerlarga boy bo‘lib, ular jumlasiga, asosan, tarixiy-madaniy qo‘riqxonalar, tarixiy insonlarning haykal va byustlari qo‘yilgan memorial bog‘lar, ziyoratgohlar va mozorlar, arxeologiya, tarixiy va madaniy yodgorliklar, tegishli muassasalar hamda tashkilotlarga doimiy foydalanishga berilgan yerlar kiradi. Ushbu yerlar alohida
muhofazaga muhtoj bo‘lib, unda jahon ahamiyatiga ega bo‘lgan tarixiy, arxeologik, me’morlik va badiiy hamda madaniy yodgorliklar saqlanadi.
O‘rmon fondi yerlari. O‘rmon fondi yerlariga o‘rmon bilan qoplangan, shuningdek, o‘rmon bilan qoplanmagan bo‘lsa ham, o‘rmon xo‘jaligi ehtiyojlari uchun berilgan yerlar kiradi. 2016-yil 1-yanvar holatiga ko‘ra, o‘rmon fondi yerlarining umumiy yer maydoni 9635,9 ming gektarni yoki jami yer maydonining 21,69 foizini tashkil qiladi.
Suv fondi yerlari. O‘zbekistonda suv havzalari, transchegaraviy daryolar, ko‘llar, suv omborlari, gidrotexnik va boshqa suv xo‘jaligi inshootlari egallab turgan, shuningdek, suv havzalari va boshqa suv obyektlarining qirg‘oqlari bo‘ylab ajratilgan mintaqadagi suv xo‘jaligi ehtiyojlari uchun korxonalar, muassasalar va tashkilotlarga belgilangan tartibda berilgan yerlar suv fondi yerlari toifasiga kiradi.
Zahira yerlar. Zahira yerlarga egalik qilish, foydalanish hamda ijara maqsadida yuridik va jismoniy shaxslarga berilmagan hamda boshqa yer toifalarida hisobga olinmagan barcha yerlar kiradi. Ushbu yerlar, asosan, qishloq xo‘jaligi maqsadlari uchun egalik qilishga, foydalanishga va ijaraga berishga mo‘ljallanadi. 2016-yil 1-yanvar holatiga ko‘ra, zahira yerlarining umumiy yer maydoni 12262,7 ming gektar yoki umumiy yer maydonining 27,6 foizini tashkil etadi.