Ўзбекистон республикаси олий ва ўрта махсус таълими вазирлиги

v) Xo`jalik shirkati 
Xo`jalik shirkatining xo`jalik jamiyatlaridan farqi shundaki, shirkat 
shaxslarning birlashuvini hamda ularni shirkat faoliyatida faol ishtirokini 
talab qilsa, xo`jalik jamiyatlarida mablag` (kapital) birlashtiriladi va unda 
ishtirokchilarning jamiyat faoliyatida shaxsan ishtiroki talab qilinmaydi. 
Ularning huquqiy mavqelarini belgilab berishda qonun chiqaruvchi aynan 
mana shu tamoyilga asoslangan. Xo`jalik shirkatining ustav kapitali 
xo`jalik jamiyatining ustav kapitalidan iqtisodiy hamda huquqiy jihatlari 
bilan farqlanadi. Xo`jalik shirkatida ustav kapitali uning ish faoliyatini 
boshlash uchun zarur bo`lsa, xo`jalik jamiyatida ustav kapitali uning 
kreditorlari oldidagi javobgarligining kafolatidir. Xo`jalik shirkatining 
ustav kapitali uning tasis hujjatlari ro`yxatga olish uchun berilgan vaqtda 
eng kam oylik ish haqining ellik baravaridan kam bo`lmasligi zarur.
Qonun xo`jalik shirkatining ustav fondini uning asosiy aktivlari bilan 
bevosita bog`lab qo`ygan. Agar shirkatning zarar ko`rishi natijasida uning 
asosiy aktivlari qiymati ustav kapitali miqdoridan kamayib ketsa, shirkat 
tomonidan olingan daromad uning azolari o`rtasida taqsimlanmaydi. 
Asosiy aktivlarning qiymati ustav kapitali miqdoridan oshgandagina 
daromadlar uning ishtirokchilari o`rtasida taqsimlanishi mumkin. Shirkat 
kreditorlari manfaatlarining asosiy kafolati uning ishtirokchilarining 
o`zlariga tegishli bo`lgan butun mol-mulklari bilan bo`lgan javobgarligidir. 
Fuqarolik kodeksining 58-moddasida xo`jalik shirkati quyidagi ikki 
xil shaklda mavjud bo`lishi mumkinligi mustahkamlangan, bular to`liq 
shirkat va kommandit shirkatdir. Shirkat ishtirokchilari uning faoliyatida 
bevosita ishtirok etishlari shart, natijada mazkur faoliyat shirkat 
ishtirokchilari harakatlarining birlashmasidan iborat bo`ladi, yani 
ishtirokchilar shirkat nomidan tadbirkorlik faoliyati bilan shug`ullanishadi.