Andijon davlat chet tillari instituti roman-german va slavyan tillari fakulteti umumiy va qiyosiy tilshunoslik kafedrasi

3.MAVZU: ILMIY ADABIYOTLAR BILAN ISHLASH MASALALARI
REJA:
1. Ilmiy-metodik adabiyotlar tushunchasi to‘g‘risida.
2. Ilmiy-metodik adabiyotlarni guruhlash.
3. Ilmiy-metodik adabiyotlarni o‘rganish va konspektlash jarayoni.
4. Ilmiy-metodik adabiyotlardan ilmiy tadqiqotda foydalanish me'yori.

Adabiyotlardagi fikrlardan istifoda etish – buning uchun talaba ilmiy ish mavzusiga oid ilmiy-nazariy, ilmiy-amaliy, ilmiy-metodik adabiyotlarni boshqa adabiyotlardan farqlab, ilmiy adabiyotlarni o‘qib konspekt qilishni bilishi va unga amal qilishi shart.Shundagina BMIda adabiyotdagi fikrlarni o‘zining BMI ishiga mos kelgan o‘rinlarini asoslab bera oladi.

Havola berish tartibi - BMIda o‘z fikrlarini misollar tahlili vositasida berish mas'uliyatli ishlardan biridir.Buning uchun fikrlarini dalillaydigan adabiyotlar bilan tanish bo‘lishi shart, shundagina kerakli o‘rinlarda havolalar berishi maqsadga muvofiq bo‘ladi.
Ilmiy asar turlari (bmi, md, nd, dd, monografiya, risola, avtoreferat, ilmiy maqolalar to‘plami, ilmiy anjuman materiallari va h.k.).
Metodik qo‘llanmalar (darsliklar, uslubiy qo‘llanmalar va b.) - BMIni yozishda darsliklar, risolalar, monografiyalar, uslubiy qo‘llanmalardan unumli va o‘rinli foydalanishi zarur bo‘lgan. Chunki ular fan, sohaga oid masalalar ma'lum darajada yoritilgan ilmiy asarlar sanaladi.
Ilmiy-metodik adabiyotni ishlab chiqish usullari va talabalarini uni o‘rganishga ko‘niktirish uchun talabalarga ma'lum bir adabiyotlarni ma'lum vaqt birligida o‘rganish talabi qo‘yilishi lozim bo‘ladi.
Ilmiy-metodik adabiyotlar tushunchasi to‘g‘risida gapirganda tanlangan adabiyotlar beqosita ilmiy ish mavzusiga dahldor bo’lish kerak. SHundagina ilmiy-metodik adabiyot to’g’ri tanlangan bo’ladi.
Ilmiy-metodik adabiyotlarni guruhlash deganda ularni kitob, maqola, risola, monografiya, o’quv metodik adabiyot, dissertatsiyalar, avtoreferatlar, ilmiy-metodik adabiyot, o’quv uslubiy adabiyot degan turlarga ajratish o’rinlidir.
Ilmiy-metodik adabiyotlarni o‘rganish va konspektlash jarayoni mavzu tanlash jarayonida olib boriladi va ilmiy metodik adabiyotlarni tanlash asosida ilmiy ish mavzusi ham mukammallashib boradi..
Ilmiy-metodik adabiyotlardan ilmiy tadqiqotda foydalanish me'yori bo’lishi maqsadga muvofiq. Aks holda yozilgan ish boshqa adabiyotlardan ko’chirilgan konspektning o’zi bo’lib qoladi, ya’ni me’yoriylik buziladi. Bunday adabiyotlar tadqiqotchining fikrini asoslash maqsadida keltirilishi, unga havolalar berilishi maqsadga muvofiqdir. Bir sahifada ikkita-uchtadan ortiq havola berish me’yoriylikni buzish hisoblanadi. Shu o’rinda bir necha sahifada qatorlashtirib misollarni berish ham me’yoriylikning qo’pol buzilishi sanaladi. Chunki har bir misol yoki dalillar berildimi, albatta, uni tahlilga tortish lozim bo’ladi. Ya’ni ilmiy ishdagi fikrlar bu adabiyotlar vositasida kuchaytiriladi, yangidan tahlil etiladi, yangidan asoslanib beriladi.Shunda ilmiy-metodik adabiyotlarning ishda berilishi o’rinli bo’ladi.
Ilmiy-metodik adabiyotlarni o‘rganish va konspektlash jarayoni ancha murakkab jarayonlardan biri bo’lib, agar shu jarayon ilmiy ish mavzusiga mo’ljallab to’g’ri tashkil qilinsa, bunday tadqiqotchilarning ilmiy ishi har tomonlama mukammal bo’lgan tadqiqotlar jumlasiga kiradi.
Iqtibos (arab. – ziyo olmoq), sitata – biror asardan so’zma-so’z olingan parcha, ko’chirma. Iqtibos adabiyotlarda sitata, havola, ko’chirma kabi nomlar bilan yuritiladi.
Iqtibos bayon qilinayotgan fikrni ishonchli fikr bilan quvvatlash, muayyan fikrni tanqid qilish uchun hamda muhim faktik material – misol sifatida qo’llanadi. Iqtibos, asosan, ilmiy (ko’pincha gumanitar) va rasmiy nutqda ishlatiladi hamda qo’shtirnoq bilan belgilanadi yoki alohida harf bilan yoziladi; shuningdek, manbaga havola qilinadi. Bunday ko’chirmalar foydalanuvchining fikri bilan qiyoslaganda uning mohiyatini to’g’ri tushunish imkonini beradi. Masalan, badiiy adabiyotning, so’zning g’oyaviy-estetik ta’sir kuchi, ahamiyatini quroldan ham kuchliroq ekanligi to’g’risidagi fikrni mustahkamlash masalasida P.Tursunning “Adabiyot zambarakdan zo’r” yoki A.Qahhorning “Adabiyot atomdan kuchli” degan so’zlarini yoki bo’lmasa, “tig’ yarasi bitar, ammo til yarasi bitmas” maqolini iqtibos sifatida qo’llash mumkin. Iqtibosdan ko’p hollarda epigraf va shior o’rnida ham qo’llaniladi. Agar muallif fikriga zarar yetmasa, iqtibosda orfografiya va punktuatsiyani o’zlashtirish, so’z (so’zlar)ni tushirib qoldirish mumkin (bunda ko’p nuqta bilan belgi qo’yiladi).
Ilmiy tadqiqotning muhim tarkibiy qismlaridan biri ilmiy havolalardir. Ilmiy havolalar tadqiqotchining qanday manbalarga tayanib tadqiqot olib borganligini ko‘rsatib turadi. Tadqiqotda havolalar, asosan, ikki turlidir. Bular:
a) material, tadqiq hodisalariga, tajriba-sinov ishlariga havolalar;
b) ilmiy tadqiqotlarga, tadqiqotchilarning fikrlariga havolalar.
Istalgan ilmiy tadqiqot hamisha faktlarga (faktik materialga) tayanadi. Bu faktik material tilshunoslik tadqiqotlarida tilning voqelanish ko‘rinishlari – nutqdan (jonli so‘zlashuv, sheva, yozuvchilarning asarlari v.h.dan), o‘tkaziladigan tajriba-sinov natijalaridan, zarur holatda ilmiy tadqiqotlardan olinadi. Bularning barchasi tadqiqotchi va tadiqiqot uchun material manbayidir. Ilmiy ishda keltirilgan har bir faktik materialning qaysi manbadan olinganligi aniq (tadqiqotni o‘qiyotgan boshqa shaxs osonlikcha topa oladigan shaklda) ko‘rsatilgan bo‘lishi kerak. Material manbayi, odatda, faktik material keltirilgach, qavslarda - juda ko‘p hollarda shartli qisqartmalar bilan beriladi. Chunonchi,Qodiriy asarlarida moziy so‘zi "o‘tmish", "o‘tgan zamon" ma’nosida qo‘llaniladi: Moziyg‘a qaytib ish ko‘rish xayrlik (O‘K-10).
Faktik materialning tur va xususiyatiga ko‘ra havolada uning manbaini ko‘rsatish ham xilma-xil bo‘lishi mumkin. Faktik material manbayi tadqiqot matni ichida (chunonchi: "bir tilli" shevada r ma’lum pozitsiyalarda .... tushib qoladi. ....⁸) berilishi mumkin.
Tajriba-sinov ishlari natijalari faktik material sifatida keltirilganda, natijalar e’lon qilingan bo‘lsa, nashr manbayini, e’lon qilinmagan bo‘lsa, o‘tkazilgan o‘rni va vaqti, uni qayd etgan muassasa ko‘rsatilishi zarur.
Faktik material arxiv yoki muzey materiallaridan olinganda, arxiv (muzey), uning joyi, fond raqami (nomi), qayd raqami ko‘rsatiladi. Faktik material havolasidan maqsad kitobxonning - zarur bo‘lganda - shu ma’lumotni oson topishi va tekshira olishi ekanligini unutmaslik lozim.
Ilmiy ishda havolalarning ikkinchi turi tadqiqotchilarning ishlariga, fikrlariga ishoradir. Bunday havolalar ilmiy tadqiqlotarda, asosan, uch usul bilan keltiriladi:
1. Sahifaosti izohlar;
2. Matn ichida ajratilgan izohlar;
3. Bob (bo‘lim, tadqiqot) oxirida keltirilgan izohlar.
Ilmiy ishlar, fikrlar manbayini ham (monografiya, maqola, ma’ruza v.h.) ilmiy tadqiqotlarda 4 turda berish mumkin.
1) muallif, asari, nashriyoti, yili, zarur betlarini to‘liq ko‘rsatgan holda;
2) raqamlash usuli bilan;
3) muallif va bosilgan yilini ko‘rsatuvchi qisqartma holida;
4) tadqiqotchi lozim ko‘rgan qisqartma shakllaridan birida beriladi.
Birinchi turdan, asosan sahifaosti izohlarda foydalaniladi. Bu usul fikrlar manbayini kitobxonga yetkazishning eng qulay usuli, lekin, birinchidan, juda ko‘p joyni egallaydi. Ikkinchidan, havolalarni bunday berish kitobxon diqqatini chalg‘itib turadi.
Ba’zan bu turdan bob yoki asar oxirida beriladigan izohlarda ham foydalanadilar. Bu holda tadqiqot matni ichida boshqa tadqiqotlarga, fikr manbalariga havola o‘rinlari arab raqamlari bilan batartib belgilab boriladi va bob oxirida har bir tartib raqamlariga mos manba aniq va to‘liq ko‘rsatiladi. Bunda bir muallifning ayni bir tadqiqoti takror-takror keltirilganda, birinchi keltirilishda to‘liq berilib, qolgan o‘rinlarda faqat muallif ko‘rsatiladi va "Ko’rsatilgan asar" havolasi beriladi va shu o‘ringa aloqador betlarga ishora qilinadi.
Havolalarni raqamlash usuli bilan berish eng tejamli usuldir. Bunda bob oxirida "Foydalanilgan adabiyotlar" sarlavhasi ostida manbalar qat’iy alifbo tartibida beriladi. Matn ichida havola zarur bo‘lganda shu manbaning bu ro‘yxatidagi tartib raqami, undan keyin vergul qo‘yilib, zarur betlar ko‘rsatiladi, nuqta yoki nuqtali vergul qo‘yiladi:
Chunonchi: “Odatda kommunikativ vaziyatning uch asosiy unsuri mavjud bo‘ladi, ya’ni so‘zlovchi, tinglovchi va mavzu yoki axborot. So‘zlovchi muayyan axborotni tinglovchiga yetkazish uchun, albatta, vosita – tegishli kanalni tanlaydi. Bilamizki, asosiy kanal tilning o‘zidir. Ammo axborotni to‘la yetkazishda umumiy vaziyat va maqsadga muvofiq boshqa kanallar ham ishga tushiriladi. Bu o‘rinda paralingvistik va ekstralingvistik vositalar nazarda tutiladi. Haqiqatan ham, turli jestlar, yuz ifodasi, boshni qimirlatish, gavda harakatlari, makon yaqinligi, ovoz tabiati, kiyimlar, so‘zlovchi va tinglovchining ijtimoiy yoki boshqa maqomi kabi xilma-xil omillar kommunikatsiya jarayonida alohida qimmatga ega. Uzatilmoqchi bo‘lgan axborotning mazmuni, maqsadi va tabiatiga uyg‘un tarzda kommunikatsiya kanali tanlanadi.” [139, 40]⁹
Demak, M.Yo‘ldoshev bu fikrni shu shaklda "Foydalanilgan adabiyotlar ro‘yxati"da 139-raqam ostida keltirilgan manbaning 40-betidan olgan.
Matn ichida bir o‘rinda bir necha manbaga havola etilganda, har bir manba raqami nuqtali vergul bilan ajratib boriladi.
Havolaning bu tejamli usuli ham o‘z noqulayliklariga ega. Birinchidan, fikr olingan manbani, tadqiqotchi kimlarning g‘oyalari va materiallariga tayanib ishlayotganligini bilish uchun kitobxon bob (ish) oxiriga qayta-qayta murojaat etishi zarur. Ikkinchidan, bunday tizimdan foydalanish muallifdan katta ehtiyotkorlikni talab qiladi. Zeroki, bitta raqamdagi xato manbani tamoman o‘zgartirib yuboradi. Ilmiy ishda esa bu nafaqat qo‘pol xato, balki salaflarga hurmatsizlik deb ham sanaladi.
Havolalarni uchinchi usulda (asar muallifi va uning bosilgan yiliga ishora etuvchi qisqartma bilan berish yo‘li) ilmiy ishlarda eng qulay va tejamkordir. Bu usuldan havola berishning to‘rtala turida ham bemalol foydalanish mumkin. Bu usuldan foydalanganda manbalarning shartli qisqartmalari yo ishning boshida - shartli qisqartmalar bo‘limida, yoki ishning oxirida "Foydalanilgan adabiyotlar va ularning qisqartmalari" qismida to‘liq ochib boriladi. Bunday qism ilmiy tadqiqotda, xususan, dissertatsiyalarda "Adabiyotlar ro‘yxati" zaruriy qismi o‘rnini ham bosadi.
Hozirda BMIlarda havola berishning birinchi usulidan – muallif, asari, nashriyoti, yili, zarur betlarini to‘liq ko‘rsatgan holda sahifaosti izohlarda berish ko’p tavsiya etiladigan hamda eng qulay, an’anaviy usullardan hisoblanadi.
Ilmiy ishda havolalar quyidagi hollarda beriladi:
1.Biror tadqiqotchi (muallif)ning asaridan, ma’ruzasidan ma’lum bir fikr, izoh yoki ma’lumot aynan keltirilganda. Bunda bu olinma ko‘chirma gap sifatida imlo qoidalariga mos ravishda berilgani ma’qul va oxirida olinma manbayi ko‘rsatilishi shart. Bunday olinma bitta atama, bir-ikki so‘z birikmasi yoki gap hajmida ham, katta (ba’zan bir-bir yarim bet) band (yoki abzaslar)dan iborat bo‘lishi ham mumkin. Bunday olinmalarda tadqiqotchi olinmaning ma’lum bir qismini tushirib qoldirsa, o‘sha o‘rin ko‘p nuqta (...) bilan belgilanadi; bir qismini alohida bo‘rttirib (kursiv, ajratilgan harflar ostiga chizish v.h. usullarda) ajratsa olinma ichidagi izohda ko‘rsatilishi lozim.
2.Tadqiqotchi o‘z fikrini bayon qilayotganda boshqa tadqiqotchilarning ismi shariflarini tilga olib, ularning materiallariga tayanib tahlil olib borayotganligini eslatganda ham manbalarga havola berishi zarur.
3.Tadqiqotchi biror hodisa (voqea) tavsifini berayotganda o‘zgalarning ishlaridan olgan (o‘zlashtirgan) ma’lumotlarni alohida ta’kid bilan ajratmay, o‘z nutqiga singdirib borgan hollarda o‘zlashtirilgan ma’lumot manbayi shu ma’lumotdan keyin ko‘rsatilishi zarur.
Shuni esda tutish lozimki, boshqa tadqiqotchilar ma’lumot va talqinlaridan foydalanib, uni ilmiy ishda ko‘rsatmaslik eng xunuk amaldir. Ilmiy ishda bunday o‘rinlar bo‘lsa, (yoki atigi bir abzaslik material birovdan olinib, manbayi ko‘rsatilmagan bo‘lsa) bu ish plagiat - ilmiy o‘g‘rilik mahsuli sanalib, xalqaro qonunchilikda o‘z aksini topgan mualliflik huquqi qoidalari asosida bekor qilinadi.