§ 4. MĠLLĠ ĠSTĠQLAL HƏRƏKATININ BAġLANMASI VƏ ĠNKĠġAFI.
ĠNQĠLABĠ BÖHRANIN DƏRĠNLƏġMƏSĠ
Milli istiqlal hərəkatının baĢlanması və inkiĢafı: Rusiyada 1917-ci ilin
fevral inqilabı nəticəsində çarizm devrildi, müvəqqəti burjua höküməti təşkil
edildi. İnsan hüquqlarının qorunması, bütün xalqların və millətlərin bərabərliyi
üçün təminatlar elan olundu.
Keçmiş Rusiya imperiyasının bütövlüyünü saxlamağa çalışan Müvəqqəti
hökumət müstəmləkələrdə öz hakimiyyət orqanlarını yaratdı. Martın 9-da Qafqaz
canişinliyi Xüsusi Zaqafqaziya komitəsi ilə, qubernatorlar quberniya komissarları
ilə əvəz olundu. Bakıda, Yelizavetpolda İctimai təşkilatların icraiyyə komitələri
meydana gəldi.
Rusiyanın başqa yerlərində olduğu kimi, Azərbaycanda da gizli fəaliyyət
göstərən siyasi partiyalar, təşkilatlar açıq işə keçdilər və yeniləri yaradıldı.
1917-ci ilin martında «Müsavat» partiyası açıq fəaliyyətə başladı.
Yelizavetpolda Nəsib bəy Yusifbəylinin başçılığı ilə yeni «Türk ədəmi-
mərkəziyyət partiyası» təsis edildi.
Martın 29-da, milli hərəkata vahid rəhbərlik etmək məqsədi ilə siyasi
xadimlər tərəfindən Bakıda demokratik əsaslarda «Müsəlman Milli Şurası»
yaradıldı. Bu təşkilatda Azərbaycanın müsəlman əhalisinin bütün təbəqələri, siyasi
partiya və təşkilatları təmsil olunurdu. Milli hərəkatla əlaqədar bütün tədbirlər,
101
demək olar ki, bu Şura tərəfindən hazırlanıb həyata keçirilirdi. «Müsəlman Milli
Şurası»-nın demokratik ziyalılardan ibarət müvəqqəti icraiyyə komitəsi yaradıldı.
Məmmədhəsən Hacınski komitənin sədri, M. Ə. Rəsulzadə isə sədr müavini təyin
olundu. «Müsəlman Milli Şurası»nın Azərbaycanın bütün şəhər və qəzalarında
şöbələri vardı.
Bu zaman Bakıda, Yelizavetpolda və Azərbaycanın bir sıra şəhərlərində
daşnaklar özlərinin «erməni milli şuraları»nı, kadetlər isə «rus milli şuraları»nı
yaratdılar.
1917-ci il aprelin 15-dən 20-dək Bakıda Qafqaz müsəlmanlarının
qurultayı keçirildi. Qurultayda ilk dəfə olaraq milli ərazi muxtariyyəti ideyası irəli
sürüldü. «Müsavat» partiyasının lideri M. Ə. Rəsulzadənin məruzəsi üzrə qəbul
edilmiş qərarda deyilirdi ki, «...Rusiyanın müsəlman xalqlarının mənafeyini ən
yaxşı təmin edən dövlət quruluşu forması ərazi-federasiya prinsiplərinə əsaslanan
demokratik respublikadır».
Bu zaman Rusiyanın müsəlman xalqlarının milli-azadlıq hərəkatında iki
əsas cərəyan vardı. Tatar ticarət burjuaziyasının çoxluq təşkil etdiyi cərəyan—
unitaristlər müsəlmanlara yalnız milli-mədəni muxtariyyət vermək şərti ilə onların
vahid Rusiya dövlətinin tərkibində qalmasına tərəfdar idilər. Unitaristlər geniş
Rusiya bazarının əllərindən alınmasından ehtiyat edirdilər. Başlıca olaraq
Azərbaycan milli ziyalılarının, yeni yaranmış sənaye burjuaziyasının daxil olduğu
ikinci cərəyan-federalistlər Rusiyada federativ burjua respublikası daxilində
müsəlmanlara ərazi muxtariyyəti verilməsini tələb edirdilər.
1917-ci il mayın 1-dən 11-dək Moskvada keçirilən Ümumrusiya
müsəlmanları qurultayında M. Ə. Rəsulzadə Rusiyanı federativ şəkildə qurmaq
haqqında məruzə ilə çıxış etdi. Qurultay unitaristlərin təklifini rədd edərək, M. Ə.
Rəsulzadənin «...Türküstan, Qazaxıstan, Başqırdıstan və Azərbaycan—Dağıstan
kimi bir neçə muxtariyyətlərdən ibarət olan gələcək Rusiyanı federativ şəkildə
qurmaq» haqqında irəli sürdüyü qətnaməni 271 səsə qarşı 446 səs çoxluğu ilə
qəbul etdi.
Həmin il iyunun ikinci yarısında «Müsəlman demokratik «Müsavat»
partiyası» ilə «Türk ədəmi-mərkəziyyət partiyası» birləşib, «Türk ədəmi-
mərkəziyyət partiyası «Müsavat» adını aldı. Partiyanın başçısı Məmməd Əmin
Rəsulzadə, onun Yelizavetpol şöbəsinin rəhbəri Nəsib bəy Yusifbəyli oldu.
Müxtəlif sosial təbəqələrin təmsil olunduğu «Müsavat» partiyası
dövlətçilikdə milli ərazi muxtariyyəti formasını, iqtisadiyyatda isə kapitalizmin
Qərb inkişaf modelini müdafiə edirdi. M. Ə. Rəsulzadə deyirdi ki, «Müsavat»
sinnfi deyil, milli partiyadır. «Müsavat»ın fəaliyyəti xeyli genişləndi. Onun nəinki
Azərbaycanın bütün qəzalarında, hətta Tiflis, İrəvan, Həştərxan, Daşkənd, Kiyev,
Təbriz, Rəşt, İstanbul və digər yerlərdə də şöbələri yaradıldı.
1917-ci ilin sentyabrında Azərbaycanda panislamistlər tərəfindən
yaradılıb, əvvəlcə «Rusiyada müsəlmanlıq», sonralarsa, «İttihad» adlandırılan
102
partiya meydana gəldi. Qara bəy Qarabəyovun sədr olduğu bu partiya millətlər
arasında fərqi yalnız onların dini mənsubiyyətində görür, ona görə də milli azadlığa
müsəlman xalqlarının ümumi qurtuluşu çərçivəsində baxırdı. İttihadçıların fikrincə,
Azərbaycan xalqının müstəqil dövlət yaratması İslam birliyinn parçalamaq demək
idi. Onlar Azərbaycana Rusiya daxilində yalnız milli-mədəni muxtariyyət
verilməsinə tərəfdar idilər.
Bu dövrdə Azərbaycan milli hərəkətında, eləcə də Müsəlman Milli
Şurasının fəaliyyətində milli-demokratların «Müsavat» partiyasından sosialistlərin
«Hümmət» və «Ədalət» təşkilatlarından və İslam radikalistlərinin «İttihad»
partiyasından ibarət üç əsas ictimai-siyasi qüvvə vardı.
«Müsavat» partiyasının rəhbərlik etdiyi milli-demokratik qüvvələr
Azərbaycan dövləti yaratmaq uğrunda mübarizə aparırdılar. Məhz buna görə də
xalqın böyük əksəriyyəti «Müsavat»ın arxasınca gedirdi. «Müsavat»ın nüfuzu
durmadan artırdı. Müəssislər məclisinə seçkilər zamanı Azərbaycan qəzalarında
səslərin 90 faizi bu partiyaya verilmişdi.
«Hümmət» və «Ədalət» təşkilatları RSDF(b)P-nin mövqeyindən çıxış
edərək, xalqı yalnız sinfi mübarizəyə çağırırdılar. Lakin müstəmləkə əsarətində
olan, milli ayrı-seçkiliyin ağır məngənəsində boğulan xalq sinfi mübarizədən daha
çox milli-azadlıq mübarizəsinə qoşulur, müstəqil Azərbaycan dövləti yaratmağa
can atırdı. Millətlərin öz müqəddəratını təyin etmək hüququnu bolşeviklər
Azərbaycanda Rusiyasız təsəvvür etmirdilər. Ona görə də sosial-demokratlar
azərbaycanlı əhalinin az qismini, başlıca olaraq, beynəlmiləl tərkibli Bakı
fəhlələrinin müəyyən hissəsini öz tərəflərinə çəkə bilmişdilər.
İttihadçıların Azərbaycanın müstəqilliyi, hətta ona ərazi muxtariyyəti
hüququ verilməsi əleyhinə çıxmaları onları xalq arasında nüfuzdan salmışdı. Buna
baxmayaraq, onlar müəyyən klerikal dairələrə arxalanaraq, Müsavatçı
demokratlara qarşı inadla mübarizə aparırdılar. Təsadüfi deyil ki, Yelizavetpolda
Müəssislər məclisinə seçkilər zamanı «Müsavat»ın liderlərindən olan N. Yusifbəyli
üzünü azərbaycanlılara tutaraq demişdi: «Kimə istəyirsiniz səs verin, hətta
daşnaklara və cuhudlara da, ancaq «İttihad»a səs verməyin».
Azərbaycan milli-azadlıq hərəkatında başlıca olaraq üç istiqamətdə
mübarizə aparılırdı.
1. Milli partiyalar, xüsusən «Müsavat», ilk növbədə, Müvəqqəti
hökumətin müsəlman xalqlarının əleyhinə çevirilmiş siyasətinə qarşı çıxırdı. Çünki
Müvəqqəti hökumət çarizmin müstəmləkəçilik siyasətini daha incə və üstüörtülü
şəkildə davam etdirir, azərbaycanlıları separatçılıqda təqsirləndirərək, milli-azadlıq
hərəkatını boğmağa çalışır, Zaqafqaziya xalqları arasında dini ayrı-seçkilik salaraq,
erməni və gürcülərə bir sıra üstünlüklər, o cümlədən milli qoşun yaratmağa icazə
verir, Rusiya üçün uğursuz imperialist müharibəsini inadla davam etdirirdi və s.
2. Milli partiyalar Fevral inqilabından sonra Azərbaycanda, xüsusən
Bakıda inqilabi orqan kimi meydana gəlmiş fəhlə deputatları Sovetinə qarşı daim
103
mübarizə aparırdılar. Sovetin tərkibində azərbaycanlılar yox dərəcəsində idi. Eser-
menşevik-daşnak blokunun rəhbərlik etdiyi bu Sovet Müvəqqəti hökumətin
müstəmləkəçilik siyasətinə tərəfdar çıxır, «vahid və bölünməz» Rusiya ideyasını
təbliğ edirdi. Azərbaycanlıları geridə qalmış, inqilab üçün yetişməmiş xalq elan
edən Sovet onları inqilabi orqanlara yaxın buraxmırdı. Hətta, Bakı fəhlələrinin
böyük hissəsini təşkil edən Cənubi Azərbaycandan gəlmiş azərbaycanlılar
seçkilərdə iştirak etmək hüququndan məhrum edilmişdilər.
3. Azərbaycan milli qüvvələri durmadan güclənən erməni-daşnak
təhlükəsinə qarşı ciddi müqavimət göstərirdilər. Rusiyanın köməyi ilə «Böyük
Ermənistan» dövləti yaratmağa böyük ümidlər bəsləyən erməni millətçiləri rus
müstəmləkəçiləri ilə dil tapmağa çalışır, hətta birinci dünya müharibəsi zamanı
ayrıca silahlı dəstələr təşkil edib Türkiyə cəbhəcinə Rusiyanın köməyinə
göndərirdilər.
Erməni Milli Şurası öz silahlı qüvvələrini sürətlə artırırdı. Bu məqsədlə,
başlıca olaraq, cəbhələrdən gətirilib yenidən komplektləşdirmək üçün Bakıda
cəmləşdirilən minlərlə erməni əsgər və zabitindən istifadə edilirdi.
Azərbaycan iqtisadiyyatında üstün mövqe tutan, hərbi cəhətdən hazırlıqlı
və ruslar tərəfindən müdafiə olunan erməni millətçilərinə qarşı mübarizədə, adətən,
bütün müsəlman partiyaları öz qüvvələrini birləşdirirdilər.
Oktyabrın 22-də Bakı Sovetinə seçkilərdə «Müsavat» bütün partiyaları
geridə qoyaraq, səslərin 40 faizə qədərini - 9617 səs qazandı. Halbuki
zəhmətkeşlərin əsas müdafiəçisi kimi çıxış edən bolşeviklər cəmi 15 faiz - 3823 səs
aldı. Əhalinin yarıdan çoxunu qeyri-azərbaycanlılar təşkil etdiyi Bakıda
«Müsavat»ın qələbəsinin əsas səbəbi ondan ibarət idi ki, bu partiya bir sıra
problemlərin həllində inqilabi-demokratik mövqelərdə dururdu. Belə ki,
«Müsavat» müharibənın dərhal dayandırılaraq, təzminatsız və ilhaqsız sülh
bağlanmasına, bütün torpaqların müsadirə edilib, heç bir şərt qoymadan, pulsuz
kəndlilərə verilməsinə, zəhmətkeşlərin ən ümdə tələblərinin ödənilməsinə və digər
radikal tədbirlərə tərəfdar çıxırdı.
Lakin, seçkilərdə parlaq qələbə çalmasına baxmayaraq, «Müsavat» Bakı
Sovetinə seçkilərin demokratik əsaslarda aparılmamasını, burada kəndlilərin təmsil
olunmamasını tənqid edərək, hakimiyyətin belə bir Sovetə verilməsinə qarşı çıxdı
və Sovetin İcraiyyə Komitəsinə daxil olmadı. Bununla da, «Müsavat» böyük bir
səhvə yol verdi. Belə ki, Sovetin İcraiyyə Komitəsindən milli mübarizə məqsədilə
istifadə olunmalı idi. Bakı Sovetinə başçılıq edən S. Şaumyan sonralar
«Müsavat»ın bu səhvindən istifadə etdi.
1917-ci il oktyabrın 26-dan 31-dək Bakıda «Türk ədəmi-mərkəziyyət
partiyası «Müsavat»ın I qurultayı keçirildi. Qurultayda 500 nümayəndə iştirak
edirdi. «Müsavat»ın qəbul etdiyi yeni proqramda deyilirdi: «...hər millət öz
hüdudları olan əraziyə malikdir, yəni həmin regionda əksəriyyəti təşkil edir ki, ona
ərazi muxtariyyəti hüququ verilməlidir. Bizim partiyanın fəaliyyət işığında bu
104
prinsip Azərbaycan, Türküstan, Qırğızıstan, Başqırdıstan və s. kimi türk ölkələrinə
tətbiq edilməlidir. Məhdud bir ərazisi olmayan millətlərə isə mədəni muxtariyyət
hüququ verilməlidir». O zamankı ictimai-siyasi şəraitdə, bolşeviklərin dünya
inqilabı ideyasını rəhbər tutaraq unitar dövlət quruluşunu saxlamağa çalışdığı bir
vaxtda, «Müsavat»ın federalizmə tərəfdar çıxması seçilmiş ən düzgün yol idi.
Proqramın ideyalarına əsasən, dini etiqadından, millətindən, cinsindən və
siyasi əqidəsindəi asılı olmayaraq, bütün vətəndaşlar qanun qarşısında bərabər elan
edilir; söz, vicdan, mətbuat, ittifaq və cəmiyyətlər yaratmaq, tətil azadlıqları verilir;
pasport sistemi aradan götürülməklə, vətəndaşlara nəinki öz ölkələri daxilində azad
hərəkət etmək, həmçinin ölkədən sərbəst surətdə çıxıb getmək hüququ verilir;
bütün fəhlə və qulluqçular üçün 8 saatlıq iş günü müəyyən edilir; bütün dövlət və
mülkədar torpaqları alınıb, pulsuz və əvəzi ödənilmədən, kəndlilər arasında
bölüşdürülür; ümumi, pulsuz və icbari təhsil sistemi qoyulur və s.
Qurultayda M. Ə. Rəsulzadə «Müsavat»ın Mərkəzi Komitəsinin sədri
seçildi.
Bu qurultaydan sonra Azərbaycanın bütün qəzalarında «Azərbaycana
muxtariyyət!» şüarı altında hərəkat genişləndi.
Noyabrın əvvəllərində bolşevik Bakı Sovetinin hakimiyyəti altında olan
Bakı rayonu istisna edilməklə, Azərbaycanın bütün qəzaları «Müsavat»
partiyasının təsiri dairəsində idi. Bakının özündə də Sovetlərin mövqeyi möhkəm
deyildi. Şəhərin təsərrüfat və ərzaqla təminat işlərinə, maliyyə, məktəb və səhiyyə
idarələrinin fəaliyyətinə milli qüvvələrin əlində olan Bakı şəhər duması və
Müsəlman Milli Şurası rəhbərlik edirdi.
«Müsavat»ın I qurultayı getdiyi dövrdə Rusiyada dövlət çevrilişi baş
verdi, bolşeviklər hakimiyyətə gəldilər. Bu hadisə Azərbaycan azadlıq hərəkatı
tərəfindən xeyirxahlıqla qarşılandı. Çünki, o zaman bolşeviklər yeganə siyasi
qüvvə idi ki, millətlərə öz müqəddəratını hətta ayrılmağa qədər təyin etmək
prinsipini elan etmişdilər.
Sovet dövləti milli məsələnin həlli yolunda ilk addımlar atdı.
1917-ci il oktyabrın 26-da II Sovetlər qurultayı «Fəhlələrə, əsgərlərə və
kəndlilərə!» müraciətini qəbul etdi. Sovet Rusiyasının yaradıldığını elan edən bu
sənəddə bütün millətlərin öz müqəddəratını təyin etmək hüququna təminat
verilirdi.
Noyabrın 2-də
Sovet
hökuməti «Rusiya
xalqlarının hüquq
Bəyannaməsi»ni qəbul etdi. Həmin bəyannamə ilə bütün xalqların bərabərliyi və
müstəqilliyi, onların öz müqəddəratını təyin etmək, hətta ayrılmaq və müstəqil
dövlət təşkil etmək hüququ elan edilirdi.
Noyabrın 22-də Sovet hökuməti «Rusiya və Şərqin bütün müsəlmanlarına
müraciət»lə çıxış etdi. Müraciətdə deyilirdi ki, indən belə müsəlmanların dini,
adət-ənənələri, milli və mədəni təsisatları sərbəst və toxunulmazdır, onlar milli
həyatlarını azad və maneəsiz qura bilərlər.
105
Lakin hadisələrin sonrakı inkişafı göstərdi ki, Sovet dövləti keçmiş Rusiya
imperiyasının ərazi bütövlüyünü qoruyub saxlamaq niyyətindədir. RSDF(b)P-nin
mövqeyindən çıxış edən və Sovet Rusiyası tərəfindən müdafiə olunan bolşevik
Bakı Soveti şəhərdə və Bakı rayonunda Sovet hakimiyyəti qurulduğunu elan etdi.
Bakı, əslində, Sovet hakimiyyətinin Zaqafqaziyada genişlənməsi və
möhkəmlənməsi üçün dayaq nöqtəsinə çevrildi.
«Bəyannamə» və «Müraciət»lərdə elan edilənlərin, faktik olaraq, yalnız
quru vədlərdən ibarət olduğu tezliklə aşkara çıxdı. «Müsavat»la bolşevik Bakı
Soveti arasında münasibətlər daha da pisləşdi.
Noyabrın 9-dan 12-dək Zaqafqaziya milli komitəsinin Bakıda
«Müsavat»ın rəhbərliyi altında keçən konfransı Azərbaycanın öz müqəddəratını
təyin etmək və muxtariyyət yaratmaq hüququnu həyata keçirmək üçün təcili olaraq
milli müəssisələr məclisi çağırılmasını qərara aldı. Konfransda qəbul edilmiş
qərarla deyilirdi ki, hazırkı «şəraitin xarakteri millətin taleyi üçün cavabdeh
rəhbərlərdən... Rusiya federasiyası daxilində yeni muxtariyyot vahidini yaratmaq
işində millətin bütün canlı qüvvələrini birləşdirmək bacarığı tələb edir». Ayrılmaq
barədə öz niyyətini açıq bildirən «Müsavat»a zərbə endirmək üçün Bakı Soveti
əlverişli fürsətin ələ düşməsini gözlədi.
Belə şəraitdə, Müsəlman Milli Şurası özünün silahlı qüvvələrini
möhkəmləndirməyə başladı. Bakıda, Yelizavetpolda və Azərbaycanın başqa
şəhərlərində yeni milli qoşun hissələri yaradıldı. Bu hissələrin əsasını «Vəhşi
diviziya»nın tərkibində olmuş və bu diviziya ləğv edildikdən sonra vətənə qayıtmış
«Tatar (Azərbaycan-T. Ə.) süvari alayı» təşkil edirdi. Noyabrın ortalarında Bakıda
milli praporşiklər məktəbi açıldı.
Noyabrın 2-də Sovet hökuməti tərəfindən «Rusiya xalqlarının hüquq
Bəyannaməsi» elan edildikdən sonra, keçmiş imperiyanın ərazisində bir sıra milli
dövlətlər meydana gəldi.
Noyabrın 15-də gürcü menşevikləri, Müsavat və daşnak nümayəndələri
tərəfindən Xüsusi Zaqafqaziya Komitəsi əvəzinə müstəqil Zaqafqaziya
Komissarlığı yaradıldı. Bu hökumətin tərkibinə Azərbaycandan Məmməd Yusif
Cəfərov, Fətəli xan Xoyski, Xəlil bəy Xasməmmədov və başqaları daxil oldular.
Zaqafqaziya komissarlığının yaradılması Zaqafqaziyanın Rusiyadan
ayrılması yolunda ilk addım idi. Lakin yeni meydana gəlmiş Sovet dövləti
Zaqafqaziyaya keçmiş imperiyanın ayrılmaz hissəsi kimi baxırdı. 1917-ci il
dekabrın 16-da RSFSR Xalq Komissarları Sovetinin V. İ. Leninin sədrliyi ilə
keçən iclasının qərarı ilə S. Şaumyan Qafqaz işləri üzrə müvəqqəti Fövqəladə
komissar təyin edildi və bolşeviklərin hakimiyyəti altında olan Bakıya kömək
məqsədilə 500 min manat miqdarında vəsait ayrıldı.
Sovet hökumətinin bu qərarı milli qüvvələr tərəfindən dövlət
unitarizminin təzahürü kimi qiymətləndirildi və Zaqafqaziyada ictimai-siyasi
106
vəziyyət xeyli gərginləşdi. Zaqafqaziya komissarlığı milli — gürcü, Azərbaycan,
erməni hərbi hissələrinin təşkilini gücləndirdi.
Beləliklə, Sovet Rusiyası Azərbaycan xalqına nəinki milli-ərazi
muxtariyyəti hüququ vermədi, hələ üstəlik onun ərazisinin bir hissəsini—neftlə
zəngin Bakı rayonunu faktik olaraq, ondan qoparıb aldı. Bundan sonra, Müstəqil
Azərbaycan dövləti yaratmaq ideyası milli-demokratik hərəkatda ön plana keçdi.
Ġnqilabi fəhlə hərəkatının inkiĢafı: Fevral inqilabından sonra bolşeviklər
açıq işə keçdilər. Mart ayında «Hümmət» qəzeti yenidən fəaliyyətə başladı. Cənubi
Azərbaycandan gələn fəhlələr, həmçinin İrandakı fəhlələr arasında inqilabi iş
aparmaq üçün, sosial-demokrat «Ədalət» təşkilatını yaratdılar.
Martın 6-da Bakı fəhlə deputatları Soveti, az sonra soldat və matrosların
hərbi deputatlar Soveti təşkil edildi. Azərbaycanın başqa şəhərlərində də Sovetlər
meydana gəldi.
Bakı Sovetinin qərarları ilə şəhərdə çar inzibati, polis və xəfiyyə idarələri
ləğv edildi, qubernator və şəhər qarnizonunun rəisi işdən götürüldü, bir sıra
məmur, o cümlədən xəfiyyə idarəsinin rəisi həbs olundu. Şəhərin mərkəzi və
mədən-zavod rayonlarında, həmçinin iri müəssisələrdə qanun-qaydanı qorumaq
üçün fəhlə milisi təşkil edildi və s.
Beləliklə, Rusiyada olduğu kimi, Azərbaycanın bir sıra şəhərlərində də
ikihakimiyyətlik meydana gəldi. Məsələn, Bakıda Müvəqqəti hökumətə tabe olan
İctimai təşkilatların icraiyyə komitəsi ilə yanaşı, Bakı Soveti də dövlət funksiyaları
yerinə yetirirdi.
Martın axırında Bakı Sovetinin orqanı «İzvestiya» qəzetinin ilk nömrəsi
çıxdı. Apreldə RSDFP Bakı komitəsinin orqanı «Bakinski raboçi» qəzeti yenidən
nəşrə başladı. İyunda «Ədalət» təşkilatının Azərbaycan və fars dillərində «Ədalətin
səsi» qəzetinin ilk nömrəsi buraxıldı.
Həmkarlar hərəkatı genişləndi. May ayında təkcə Bakıda 28 sahə
həmkarlar ittifaqı vardı ki, onların üzvlərinin sayı 20 min nəfərdən çox idi.
1917-ci ilin avqustunda Azərbaycanda olan həmkarlar ittifaqı 50 mindən
artıq fəhləni birləşdirirdi.
Lakin mütləqiyyətin devrilməsi zəhmətkeş kütlələrin həyatında əsaslı
dəyişikliyə səbəb olmadı. Çarizm dövrünün qanunları, müstəmləkə əsarəti, milli
ayrı-seçkilik və s. olduğu kimi qalırdı. Müvəqqəti hökumət hələlik bir sıra vədlər
verməklə öz hakimiyyətini möhkəmləndirmək üçün vaxt qazanmağa çalışırdı.
1917-ci ilin yaz və yayında Bakının bir sıra mədən və zavodlarında
tətillər, mitinq və yığıncaqlar keçirildi. Fəhlələr 8 saatlıq iş günü, əmək haqqının
artırılmasını, onların nifrətini qazanmış sərəncamçıların işdən qovulmasını, mədən-
zavod komissiyalarının sahibkarlar tərəfindən tanınmasını, məhsulun istehsalı və
bölüşdürülməsi üzərində fəhlə nəzarəti qoyulmasını, müştərək müqavilə
bağlanmasını və s. tələb edirdilər.
107
Bu tələblər qəbul olunmasa da, Bakının bəzi müəssisələrində, Zaqafqaziya
dəmir yolunda fəhlələr özbaşına 8 saatlıq iş günü qoydular. Bakıda fəhlələrin tələbi
ilə bir sıra şirkətləri idarə edən müdirlər, sahə və sex rəisləri işdən kənar edildilər,
bəzi sənaye müəssisələrində fəhlə nəzarəti qoyuldu.
Peterburqda 3 iyul hadisələrindən sonra əksinqilab güclü hücuma keçdi.
Belə şəraitdə fəhlələrin mənafeyini müdafiə edə biləcək nüfuzlu və mübariz
təşkilatlar lazım idi. Mədən-zavod komissiyaları bu cür təşkilatlardan idi. Ona görə
fəhlələr-mədən-zavod
komissiyalarının
iyulun 16-da keçirilən növbəti
konfransında bu konfransı daimi fəaliyyət göstərən orqana çevirməyi qərara
aldılar.
Konfrans fəhlələrin mənafeləri uğrunda inadla mübarizə aparırdı. İyulun
27-də Konfransın iclasında müştərək müqavilə bağlanılmasını sahibkarlardan tələb
edən qərar qəbul olundu. Əks təqdirdə ümumi tətilə başlamaqla hədələdilər.
Müştərək müqavilə bağlanılmasının kapitalistlər tərəfindən uzadılmasına
etiraz əlaməti olaraq, avqustda Bakının çox mədən və müəssisələrinin fəhlələri
tətil etdilər.
Sentyabrın 17-də mədən-zavod komissiyaları konfransının növbəti
iclasında Müvəqqəti hökumətin siyasəti pisləndi və sahibkarlara mədən-zavod
komissiyalarının danışıqsız tanınmasını, fəhlələrin işə götürülməsi və işdən
çıxarılmasında bu komissiyaların iştirakını, müştərək müqavilənin bağlanılmasını
tələb edən ultimatum verildi. Fəhlələrin ultimatumu rədd edildi.
Sentyabrın 27-də Bakının bütün mədənlərində, sənaye müəssisələrində,
Xəzər ticarət donanmasında ümumi tətil başladı. Tətilə rəhbərlik etmək üçün P.
Çaparidze, M. Əzizbəyov, M. Basin, İ. Fioletov və başqalarından ibarət Mərkəzi
tətil komitəsi yaradıldı. Mərkəzi tətil komitəsinin icazəsi ilə yalnız dəmiryolçular,
xəstəxanaların işçiləri, neft və su kəmərlərinin fəhlələri işləyirdilər.
Sentyabr ümumbakı tətilində 65 mindən çox fəhlə və qulluqçu iştirak
edirdi. Tətilçiləri şəhərin bütün əməkçiləri, Bakı qarnizonunun inqilabçı soldatları,
Xəzər hərbi donanmasının matrosları müdafiə edirdilər.
Mərkəzi tətil komitəsi əslində şəhərin iqtisadi həyatına rəhbərliyi ələ
almışdı. O, əhalinin ərzaqla təmin edilməsinə, nəqliyyat vasitələrinın
bölüşdürülməsinə, mədənlərin və başqa obyektlərin qorunmasına nəzarət edirdi.
Oktyabrın 2-də müştərək müqavilənin qəbul olunması haqqında protokol
imzalandıqdan sonra tətil dayandırıldı. Sentyabr ümumi tətili proletariatın
kapitalistlər və müvəqqəti hökumət üzərində böyük qələbəsi idi.
Sentyabr hadisələrindən sonra bolşeviklərin nüfuzu xeyli artdı. Oktyabrın
13-də Bakı Sovetinin eser-menşevik İcraiyyə Komitəsi istefa verməyə məcbur
oldu. S. Şaumyan başda olmaqla Bakı Sovetinin Müvəqqəti İcraiyyə Komitəsi
seçildi.
1917-ci ilin oktyabrında bolşeviklər Rusiyada hakimiyyəti ələ aldıqdan
sonra, noyabrın 2-də Bakı fəhlə deputatları Sovetinin Bakı hərbi deputatları Soveti
108
ilə birgə iclasında Sovetin İcraiyyə Komitəsi Bakı şəhərində və Bakı rayonunda ali
hakimiyyət orqanı elan edildi. Bakı Soveti İcraiyyə Komitəsinin yeni tərkibi
seçildi. Buraya S. Şaumyan, M. Basin, P. Caparidze, İ. Fioletov, M. H. Vəzirov
(sol eser) və başqaları daxil oldular. S. Şaumyan yenidən İcraiyyə Komitəsinin
sədri seçildi. Bu iclasda, həmçinin, Bakı fəhlə deputatları Soveti ilə Bakı hərbi
deputatları Sovetini birləşdirərək, onu Bakı fəhlə və əsgər deputatları Soveti
adlandırmaq qərara alındı.
Beləliklə, bolşevik Bakı Soveti Bakı rayonunu Azərbaycandan ayıraraq,
orada Sovet hakimiyyəti elan etdi.
1917-ci il dekabrın ortalarında fəhlə və əsgər deputatları Sovetinə yeni
seçkilər keçirildi. Sovetin yeni tərkibinə 190 deputat, o cümlədən «Müsavat»
partiyasından 18 deputat seçildi. Deputatların çoxunu əksəriyyəti rus olan eserlər
və bolşeviklər təşkil edirdilər. Sovetin İcraiyyə Komitəsi sədrliyinə bolşevik P.
Çaparidze seçildi. Bu zaman S. Şaumyan Sovet Rusiyası tərəfindən Qafqaz işləri
üzrə müvəqqəti fövqəladə komissar təyin edilmişdi.
Kəndli hərəkatı: Çarizmin devrilməsi və Müvəqqəti hökumətin
yaradılması kəndlilərin torpaq sarıdan korluğuna, onların hüquqsuzluğuna son
qoymadı. Müvəqqəti hökumətin Xüsusi Zaqafqaziya Komitəsi tərəfindən hələ
martın 18-də elan edilmiş müraciətində göstərilirdi ki, çar hökumətinin qoymuş
olduğu vergilər ödənilməlidir, torpaqları tutmaq və mülkədarın itaətindən çıxmaq
qadağan olunur, keçmiş məhkəmələr və idarələr dəyişməz qalır.
1917-ci ilin yazından başlayaraq kəndli çıxışları gücləndi. Kəndlilər vergi
verməkdən boyun qaçırır, əkin yerlərini və su mənbələrini zəbt edir, cəza
dəstələrini tərk-silah edirdilər.
Mayda Nuxa qəzasının Zəyzit kənd yoxsulları bəylərə məxsus su
mənbələrini zəbt etdi və silaha sarılaraq onların üzərinə göndərilən cəza dəstəsini
qovdular. Müvəqqəti hökumət tərəfindən yenicə yaradılmış Nuxa İcraiyyə komitəsi
zəyzitliləri baykot etdi—onlarla hər cür əlaqə saxlamaq qadağan olundu. Lakin
zəyzitlilər öz mübarizəsini dayandırmadılar.
Yayda Yelizavetpol quberniyasının bütun qəzalarını kəndli həyəcanları
bürüdü.
İyun ayında Şuşa qəzasının Hindarx kəndində yoxsulların çıxışına tezliklə
Şuşa və Cavanşir qəzalarının kəndliləri də qoşuldular. Bu qəzalarda kəndli
çıxışlarının əsas təşkilatçılarından biri müəllim Salman Əlibəyov idi.
İyul ayında Yelizavetpol qəzasının Gəlgəldi, Bolçalı və Qazax qəzasının
Çaxmaqlı kəndlərində xüsusilə kəskin çıxışlar oldu. Kəndli çıxışlarına Müseyib
Əliyev, Əmiraslan Süleyman oğlu rəhbərlik edirdilər.
Yelizavetpol qəzasının Miskinli kəndində Rüstəm Əliyev kəndli
deputatları Soveti yaratdı. Onun təşkil etdiyi silahlı kəndli dəstəsi yoxsulları
cəsarətlə müdafiə edirdi.
109
Yelizavetpol quberniyasının komissarı Xüsusi Zaqafqaziya Komitəsinə
məlumatında Yelizavetpol, Ərəş, Nuxa, Qazax və Zəngəzur qəzalarında kəndlilərin
mübarizəsinin gücləndiyini qeyd edərək göstərirdi ki, qəza milisi onların
öhdəsindən gələ bilmir və kəndli çıxışlarını yatırmaq üçün təcili kazak hissələri
göndərilməlidir.
Kəndli hərəkatının getdikcə qorxunc forma almasından təşfişə düşən
Xüsusi Zaqafqaziya Komitəsi kəndliləri bir qədər sakitləşdirmək üçün, 1912—
1913-cü illərin aqrar qanunlarına əsasən onların məcburi şəkildə verməli olduqları
ödənc pulunun ödənilməsini iyunun 7-dən müvəqqəti olaraq dayandırdı.
Avqustun 20-də Qazax qəzasının Çaylı kəndində kəndlilər üsyan etdilər.
Onlar dörd gün Yelizavetpoldan göndərilən cəza dəstəsinə qarşı mətanətlə
vuruşdular və hökumət qoşunlarını dəfələrlə məğlub edib qaçmağa məcbur etdilər.
Payızda kəndli çıxışları daha da kəskinləşdi.
Xüsusi Zaqafqaziya Komitəsinın məlumatında deyilirdi ki, Naxçıvan və
Şərur-Dərələyəz qəzalarında üsyan etmiş kəndlilərin qarşısını yerli hakimiyyət
orqanları heç cür ala bilmirlər.
Dekabrda Yelizavetpol qəzasında Alabaşlı kəndinin kəndliləri üsyan
edərək, knyaz Qolitsının mülkünü dağıtdılar.
Kəndli çıxışlarından bərk qorxuya düşmüş Zaqafqaziya komissarlığı
1917-ci il dekabrın 16-da «Dövlət, keçmiş xanədən, kilsə, monastır, hüquqi şəxslər
və xüsusi sahibkar torpaqlarının torpaq komitələrinə verilməsi haqqında» qanun
qəbul etdi. Qanuna görə, torpaqlar bilavasitə kəndlilərə deyil, mülkədarların
başçılıq etdikləri torpaq komitələrinə verilirdi. Kəndlilər müəyyən olunmuş
şərtlərlə torpaq komitələrindən torpaq icarəyə götürməli idilər.
Bu qanun müxtəlif yollarla böyük mülkədarların ixtiyarındakı geniş
torpaq mülklərini onların özündə saxlayırdı. Belə ki, qanunla «ölkə torpaq fondu»
adlanan fond yaradılır və buraya «məlum normadan yuxarı» xüsusi sahibkar
torpaqları daxil edilirdi. Lakin «məlum normanın» miqdarı dəqiq müəyyən
olunmamışdı. Zəhmətkeş kəndlilər 1917-ci il 16 dekabr tarixli qanunla əslində
torpaq ala bilmədilər.
Azərbaycan kəndlilərinin rus müstəmləkəçilərinə qarşı, torpaq uğrunda
mübarizəsi son dərəcə kəskinləşib, hətta silahlı üsyan dərəcəsinə çatmasına
baxmayaraq, bu mübarizə yenə də pərakəndə şəkildə aparılır və qeyri-mütəşəkkil
xarakter daşıyırdı. Kəndlilərin əsas kütləsinin siyasi şüurunun yetişməməsi də öz
mənfi təsirini göstərirdi.
***
Azarbaycanda milli hərəkatın bir sıra xüsusiyyətləri vardı.
1. Xalq azadlıq hərəkatına loyal mövqedə dayanan milli burjuaziya deyil,
demokratik əhval-ruhiyyəli ziyalılar rəhbərlik edirdilər. Milli partiyaların özəyi
müsəlman ziyalılarından ibarət idi. Azadlıq hərəkatına ziyalıların rəhbərlik etməsi
110
nəticəsində milli hərəkat daha radikal xarakter aldı və demokratik istiqamətdə
inkişaf etdi.
2. Birinci rus inqilabı illərində ilk dəfə olaraq meydana gəlmiş milli
partiyalar ümumxalq azadlıq mübarizəsinə rəhbərlik edəcək qədər güclü deyildi.
Ona görə də milli qüvvələr, başlıca olaraq, azadlıq hərəkatının görkəmli
liderlərinin və onların güclü təsiri altında olan cəmiyyətlərin və təşkilatların
ətrafında birləşirdilər.
İlk partiyalar - «Difahi» və «Müdafiə» məhəlli təşkilatlar idi. «Qeyrət»in
heç məramnaməsi belə qəbul edilməmişdi. «İttifaqi-müslimin» isə Rusiya
müsəlman-türk xalqlarının birgə siyasi təşkilatı olmuşdur. İrtica illərinin
əvvəllərində həmin partiyalar öz fəaliyyətlərini dayandırdılar.
2. Tətil hərəkatında azərbaycanlı fəhlələrin faizi çox yüksək deyildi. Bu,
əsasən, onunla əlaqədar idi ki, azərbaycanlı fəhlələrin əksər hissəsi,— hətta iri
sənaye şəhəri olan Bakının özündə belə, — ticarət, xırda istehsal və xidmət
sahələrində çalışırdılar. Əgər həmin sahələrin fəhlələri işi buraxıb günlərlə, hətta
on günlərlə tətil edərdilərsə, onların ailələri aclıq çəkərdi, həmçinin bir sıra qida
maddələri satılmamış qaldığından xarab ola bilərdi. Ən başlıcası isə, bu kateqoriya
fəhlələrin neftçilərdən, dəmiryolçulardan fərqli olaraq, sahibkarları işlənilməmiş
tətil günlərinin pulunu ödəməyə məcbur edə bilən güclü ictimai təşkilatları yox idi.
4. Tətillərdən ən çox zərər çəkən qeyri-milli kapital idi. Belə ki, uzun
sürən, mütəşəkkil və izdihamlı tətillər, başlıca olaraq, neft və dağ-mədən sənaye
sahələrində, dəmir yol nəqliyyatında baş verirdi. Bu istehsal və nəqliyyat sahələri
isə, demək olar ki, bütünlüklə rus, əcnəbi və erməni kapitalistlərinə, həmçinin
dövlətə məxsus idi.
5. Kəndlilərin torpaqsızlıqdan korluq çəkmələrinin başlıca səbəbkarı
mütləqiyyət idi. Xəzinə ən iri torpaq sahibi olub, Azərbaycanda əkinə yararlı
torpaqların 2/3 hissəsindən çoxunu öz əlində saxlayırdı. Ona görə də, Rusiyada
kəndlilər, başlıca olaraq, torpaq sahiblərinə qarşı mübarizə apardıqları halda,
Azərbaycanda kəndli hərəkatı, ilk növbədə, mütləqiyyətə və onun yerlərdəki
əlaltılarına qarşı çevrilmişdi.
111
III FƏSĠL
AZƏRBAYCAN DEMOKRATĠK RESPUBLĠKASI
Dostları ilə paylaş: |