Zülallar. Hüceyrə tərkibindəki suyu çıxardıqdan
sonra onun quru qalığında miqdar və əhəmiyyətinə görə
zülallar birinci yer tutur. Zülal hüceyrənin yaş çəkisinin
10-20 faizini, quru çəkisinin 50-80 faizini təşkil edir.
Elə zülalların proteinlər (əsas, ilk) adlandırılması da
onların hüceyrə həyatında birinci dərəcəli əhəmiyyətə
malik olmasını göstərir.
Zülallar digər kimyəvi birləşmələrdən bir sıra
fərqli xüsusiyyətlərə malikdir. Hər şeydən əvvəl onlar
yüksək molekul çəkisinə malikdir. Məsələn, yumurta
zülalı albuminin molekul çəkisi 36000 Da, əzələ zülalı
aktomiozinki 1500000 Da, məməlilərin əzələ zülalı
titininki (buna bəzən konnektin də deyilir) isə 3400000
Da-dan çoxdur. Üzvi maddələrdən spirt, sirkə turşusu
və s. ilə müqayisədə zülallar nəhəng molekullardır.
Onun qurulmasında minlərlə atomlar iştirak edir.
Cədvəl 4
