2.2.3 İmicin turistlərin destinasiya seçiminə təsiri
Səyahətə çıxmaq qərarı və müxtəlif destinasiyalar arasında seçim mürəkkəb bir
prosesdir: destinasiyanın imici seçimlərində müştərilərə təsir göstərə bilər. Turist
səfər etmək istədiyi xüsusi destinasiya ilə bağlı məlumat əldə etmək istədikdə onun
fikrindəki destinasiya imici onun qərar vermə prosesinə təsir göstərəcək önəmli bir
faktor olacaqdır [36, səh. 7].
Bir destinasiyaya səyahət etmədən əvvəl turistlərə çatan məlumat əsasən onların
destinasiya barədə zehni imici ilə dəstəklənir. Çox zaman bu turistin hara səyahət
edəcəyi ilə bağlı qərarını formalaşdıran həqiqi məlumatdan çox perspektiv (fikir və
düşüncələr) imicdir [25, səh. 94].
Əgər bir destinasiya turistin zehnində mənfi bir imicə sahibdirsə, turistin bu
destinasiyaya səyahət etmə ehtimalı yox dərəcəsindədir. Turistlər ümumən müsbət
imicə malik olan destinasiyalara səyahət etmək istəyirlər. Əgər hər hansı bir
destinasiya potensial turistlərin zehnində güclü, pozitiv, tanış və fərqləndirilə bilən
39
bir imicə sahibdirsə, seçim müddətində rəqib destinasiyalara görə üstünlük verilmə
şansı bir o qədər də yüksək olacaqdır. Digər tərəfdən hər hansı bir destinasiyaya
səyahətdən sonra yaranan imic turistlərin məmnuniyyəti və gələcəkdə təkrarən həmin
destinasiyaya səyahət etmə meylinə təsir göstərir. Turistlərin destinasiya istiqamətli
davranışlarını destinasiyanın həqiqi özəlliklərindən çox destinasiya ilə bağlı imic
müəyyən edir [29, səh. 9].
Məhz bu səbəbdən imic insanları spesifik bir destinasiya istiqamətində
həvəsləndirən ən önəmli təkan və meyil faktorlarından biri kimi qiymətləndirilə bilər.
İmic insanlara destinasiyada tətilə çıxmağı arzulamaqla bağlı təkan verə bilər, strateji
menecment vasitəsi kimi imic insanları destinasiyanı seçməyə yönləndirə bilər [36,
səh. 7].
2.3 Destinasiya marketinqinin ünsürü kimi mövqeləndirmə
Turizmdə mövqeləndirmə destinasiya məhsulunun turistlərə ifadə etdiyi
dəyərlərin cəmidir. Bir destinasiya necə bilinmək, tanınmaq və xatırlanmaq istəyirsə,
mövqeləndirmənin də o istiqamətdə olması və ya xidmətlərin o istiqamətdə
formalaşdırılması lazımdır. Destinasiya mövqeləndirməsi barədə ediləcək ilk iş
destinasiya üçün arzu edilən və mümkün olan ən müvafiq mövqeyə qərar vermək və
bu destinasiyanın nəyi ifadə etməsini müəyyənləşdirmək istiqamətində cəhdlər
göstərməkdir [29, səh. 124].
2.3.1 SHM və mövqeləndirmə
Marketinq strategiyası üç əhəmiyyətli tərkib hissəsindən ibarətdir –
seqmentasiya, hədəfləmə və mövqeləndirmə (SHM). Şirkətlər bazarda özləri üçün yer
yaratmağa çalışarkən inqilabi məhsul və ya xidmətlər hazırlaya bilərlər. Lakin bu
kifayət deyil. Onlar həm də əhali arasında kimlərin bu məhsul və ya xidməti satın ala
biləcəyini və onların belə bir alış-verişdən nə gözlədiklərini dəqiqliklə müəyyən
40
etməlidirlər. Yaxşı icra və tətbiq edilmiş SHM proqramı şirkətə doğru marketinqi
miksini hazırlamaqda – doğru məhsulun doğru yerdə doğru qiymətə və doğru şəkildə
satılmasında köməklik göstərəcəkir [13].
SHM-i tətbiq etmək üçün ilk öncə müştəri, sonra hansı müştəriyə xidmət
göstəriləcəyi və ən sonda isə məhsulun daha yaxşı təqdim edilməsi və onun
yaddaşlarda qalması üçün kommunikasiyada istifadə ediləcək mövqeləndirmə
müəyyən edilir [14].
Bazarın seqmentasiyası bazarı formalaşdıran istehlakçıların nisbətən bənzər
xüsusiyyətlərə sahib olan, dolayısı ilə bənzər mal və xidmətlərə ehtiyac duyan
müəyyən qruplara ayrılmasıdır. Seqmentasiya demoqrafik, iqtisadi və davranışla
bağlı xüsusiyyətləri olan çoxlu sayda dəyişənə əsasən həyata keçirilir.
Bazarı hədəfləmə istehlakçı qruplarının təşkil etdiyi hər seqmentin ticarət
baxımından dəyərləndirilərək əlverişli hesab edilən bir və ya birdən çox seqmentin
hədəf bazar kimi seçilməsidir [15].
Hədəfləmə strategiyaları aşağıdakılardır [15]:
Fərqliləşdirilməmiş marketinq: Müəssisənin bazar seqmentləri arasındakı
fərqləri nəzərə almadan bütün bazar seqmentlərinə tək, standart bir bazar
tərkibi ilə giriş etmək.
Fərqliləşdirilmiş marketinq: Müəssisənin hədəf aldığı bazarların hər birində
fərqli bir marketinq tərkibinin tətbiq edilməsi.
İntensiv (niş) marketinq: müəssisə böyük bir bazarın kiçik bir hissəsini
hədəfləyir.
Mikro marketinq: fərdlər və məkanlara uyğun olan fərdiləşdirilmiş məhsul və
marketinq miksinin yaradılmasıdır.
Bazar mövqeləndirilməsi “şirkət və/və ya onun fərdi məhsul təklifləri üçün
bazarda fərqli mövqenin yaradılması və saxlanılması” kimi izah edilir və
seqmentləşdirmə-hədəfləmə-mövqeləndirmə (SHM) prosesinin sonuncu mərhələsidir.
Bazarı seqmentləşdirdikdən sonra bir və ya daha çox bazar seqmentləri hədəflənir və
daha sonra mövqeləndirmə strategiyası inkişaf etdirilir. Destinasiya müxtəlif turizm
41
məhsullarını özündə birləşdirdiyindən onun mövqeləndirməsi tək bir məhsulun
mövqeləndirilməsindən daha çətindir. O, destinasiya imici və brendləşməsi ilə sıx
bağlıdır. Yaxşı mövqeləndirilmiş destinasiya bura səfər edənlərin axtardıqları
faydalara uyğun olmalıdır. Bu turizm destinasiyasında təcrübə dəyərinin yaradılması
üçün çox vacib bir amildir [38, səh. 662].
Turizm sənayesi biznes yarışının daima artdığı qlobal rəqabətlə üzləşir. Yalnız
milli səviyyədə deyil, daha kiçik destinasiyalar belə beynəlxalq miqyasda daha çox
və daha çox rəqabət aparmalıdırlar.
Bazarda açıq şəkildə müəyyən edilmiş və güclü mövqeləndirmə şirkət və
destinasiyaların turizm sənayesində davamlı uğur və rəqabət üstünlüklərinə nail
olmaq üçün ən önəmli vasitələrdəndir [16].
Turizm destinasiyanın mövqeləndirilməsi destinasiyanın regional, milli və
beynəlxalq miqyasdakı oxşar destinasiyalarla müqayisə edildikdə hansı mövqedə
olduğunu izah edən bir ifadədir. Bu prosesin məqsədi potensial müştərilər üçün
bənzərsiz bir imic yaratmaqdır. Bundan əlavə mövqeləndirmə destinasiya
brendləşdirməsinin mərhələlərindən biri kimi izah edilir. Pikeyə (2011) görə
müştərinin düşüncəsində effktiv bir mövqeləndirmə destinasiya üçün üstünlük təmin
edir, çünki o, turistlərin qərar vermə prosesini asanlaşdırır və müştərilərə əsas
atributları destinasiya ilə əlaqələndirməyə kömək edir [41, səh. 10].
Mövqeləndirmədə məhsula nə etdiyiniz deyil, müştəri üçün nə etdiyiniz və
müştərinin sizi necə dəyərləndirdiyi önəmlidir. Mövqeləndirmə həm də rəqabət
xarakterlidir, çünki müştərilər öz beyinlərində brendin rəqabət aparan brendlərlə
oxşar və ya fərqli olmasını müqayisə edir. Buna görə də destinasiya yalnız özünün
güclü və zəif tərəflərini deyil, həm də rəqiblərin güclü və zəif tərəflərini nəzərə alan
mövqeləndirmə yaratmalıdır. Mövqeləndirmə yalnız təsvirlərə əsaslanmamalı,
destinasiya və potensial ziyarətçilər arasında emosional əlaqə qura bilməlidir.
Mövqeləndirmə prosesi məhsul və xidmətləri və onların hədəf bazarla necə
əlaqələndirilməsini əhatə edir [41, səh. 37].
42
Mövqeləndirmədə üç əsas yanaşma mövcuddur. Bunlar ilk olma, tək olma və
hisslərə xitab edə bilmədir. İlk olma dedikdə müəyyən bir mövqeni ilk olaraq ələ
keçirmək və onu samballı bir şəkildə davam etdirmək nəzərdə tutulur. Tək olma
istehlakçıların məhsulu bənzərsiz özəllikləri ilə qəbul etməsidir. Hisslərə xitab edə
bilmə isə müəssisənin məhsulu, brendi və xidmətləri ilə istehlakçıların hisslərinə
xitab edəcək şəkildə mövqeləndirilməsidir [18, səh. 34].
2.3.2 Mövqeləndirmə vasitələri və müddəti
Mövqeləndirməni həyata keçirə bilmək üçün istifadə edilən ən əsas marketinq
vasitələri məhsulun keyfiyyətləri, brend, qablaşdırma, qiymət, istehlakçı özəllikləri,
məhsulun istifadə sahələri, imic, rəqib məhsullar, bölüşdürmə üsulu, qəbul edilən
dəyər, məhsulu istehlakçıların zehnində yerləşdirmək üçün istifadə olunan
vasitələrdir [30, səh. 230].
Məhsulun spesifik keyfiyyətləri və faydaları dedikdə onun dadı, keyfiyyəti,
sağlam olması, dayanıqlılığı, etibarlılığı, prestiji, lüks olması və s. nəzərdə tutulur
[17].
Bölüşdürmə üsulu ilə mövqeləndirmə müəssisələrin sadəcə keyfiyyət və qiymət
baxımından brendi necə mövqeləndirməsi deyil, brendin bazarda hansı mövqedə
olmasıdır. Məsələn, hal-hazırda dünyanın ən öndə gedən brendlərindən biri olan
Coca-Cola II Dünya Müharibəsi zamanı qoşunları təchiz etmək üçün dünyada 64
şüşələmə zavodu qurdu. Nəticədə isə bu zavodlar bu brendə çox böyük faydalar
verdi, Coca-Cola-nın beynəlxalq səviyyədə böyüməsini və satışlarının əhəmiyyətli
dərəcədə artmasını sürətləndirdi [18].
İstifadə olunan mövqeləndirmə vasitəsi nə olursa olsun, bu vasitə istifadəsi ilə
digər məhsullardan fərqliliyini vurğulayacaq şəkildə ayırd edici olmalıdır. İstifadə
olunan mövqeləndirmə vasitəsinin təqlid edilə bilməsi halı ortaya çıxırsa, deməli,
mövqeləndirmə fəaliyyətləri uğursuz olmuşdur və ya başqasının işinə yarayır. İstifadə
43
olunan vasitə üstünlüyü təmin etməlidir. Bundan əlavə mövqeləndirmə qazanca
çevrilə bilməlidir [30, səh. 230].
Brendin mövqeləndirilməsi müddəti məhsul və ya xidmətlərin istehlakçıların
istək və ehtiyaclarını qarşılaya biləcək, keyfiyyəti yüksək, brend adı, simvolu,
qablaşdırması ilə istehlakçıların düşüncələrinə xitab edərək güclü brend imici yarada
biləcək şəkildə fərqliləşdirmə cəhdləri ilə yaradılmasını əhatə edir. Brendin bazarda
mövqeləndirilməsi üçün dörd önəmli suala cavab verilməlidir [27, səh. 48]:
1. Niyə və nə üçün? İstehlakçının brendi mənimsəməsini təmin edəcək özəlliklər
nələr olmalıdır? Brend istehlakçılara hansı fayda və özəllikləri təqdim
edəcəkdir? Bu onların hansı ehtiyaclarını qarşılayacaqdır?
2. Kim üçün? Bu brendin hədəf kütləsini göstərir. Seqmentlərə ayırma müxtəlif
kriteriyalara əsasən həyata keçirilir.
3. Nə zaman? Bu məhsulun istifadə yeri və zamanının müəyyən edilməsini ifadə
edir.
4. Kimə qarşı? Bu sual isə rəqiblərin müəyyən edilməsini nəzərdə tutur. Brend
hansı brend və ya brendin müştərilərini hədəfləyir? Bu rəqabətin ölçüsü nədir?
Mövqeləndirmə müddətində hədəf alınan bazar strukturu, istehlakçıların
profilləri gözdən keçirilməli və fərqli istək və ehtiyacları olan istehlakçıların
seqmentlərə bölünərək brenddən ən yaxşı şəkildə fayda və məmnuniyyət əldə
etmələri təmin edilməlidir. Mövqeləndirmə müddətində brendə sahib olan şirkətin
rəqiblərini tanıması, rəqiblərin hansı istehlakçılar tərəfindən necə qəbul edilərək
tanındıqlarını bilinməsi, rəqiblərin brend mövqeləndirmə işləri ilə birgə istehlakçı
istək və ehtiyaclarının müəyyən edilməsi lazımdır [27, səh. 49].
2.3.3 Mövqeləndirmə strategiyaları
Əsasən yeddi mövqeləndirmə strategiyasından istifadə edilir [19]:
Məhsulun özəlliyinə görə mövqeləndirmə
44
Əsasən məhsulun özəlliklərinə və ya istehlakçıya fayda verməsinə fokuslanır.
Müxtəlif özəlliklər ola bilər: dayanıqlılıq, təhlükəsizlik və s. Məsələn, bəzi
motosikl brendləri yanacaq sərfiyyatına fokuslandığı halda, bəziləri görünüşə,
bəziləri isə dayanıqlılığa fokuslanır [19].
Qiymətə görə mövqeləndirmə
Huleyə (1998) görə qiymət-keyfiyyət miqyasında mövqeləndirmə bir məhsul
və ya xidmətin qiymət və keyfiyyət ölçüləri nəzərə alınaraq absis və ordinat
sistemində yüksək qiymət-yüksək keyfiyyət, yüksək qiymət-aşağı keyfiyyət,
aşağı qiymət-aşağı keyfiyyət və aşağı qiymət-yüksək keyfiyyət ölçülərindən
birində həyata keçirilmişdir. Yüksək qiymət strategiyasını tətbiq edən
müəssisələr yüksək keyfiyyətə sahib olan və brendləşmə müddətini
tamamlamış, böyük imic və etibar əldə etmiş müəssiələrdir. Bu müəssisələrə
görə istehlakçılar hər bir əlavə dəyər üçün əlavə qarşılıq ödəməyə razıdırlar və
ona görə də bu müəssisələr brendlərinə böyük investisiya qoyurlar.
Məhsulun istifadəsini vurğulayan mövqeləndirmə
Bir məhsul və ya xidmətin harada, necə və hansı şəkildə istifadə edilə bilməsi
ilə bağlı həyata keçirilən mövqeləndirmə növüdür. Bu mövqeləndirmə
strategiyasında məhsul və ya xidmətin fərqləndirici və ya özünəməxsus
özəllikləri vurğulanır [20].
Məhsulun istifadəçilərini vurğulayan mövqeləndirmə
Bir brendin fərqli istifadəçi qruplarını hədəf alan növləri vardır. Bu növlər
fərqli özəlliklər və ya fərqli qiymət aralıqları ilə ortaya qoyulur. İstehlakçılar
özlərinə yaxın gördükləri, öz xarakterləri ilə üst-üstə düşən brendlərə üstünlük
verirlər [27, səh. 53].
Məhsul sinfinə görə mövqeləndirmə
Bir məhsul və ya xidmətin eyni məhsul kateqoriyasındakı məhsullarla eyni
özəlliklərə sahib olmasının, lakin bir cəhəti ilə digərlərindən fərqli olmasının
vurğulanmasıdır. Məsələn, isti bir içki kimi tanınan Nescafe yayda məhsulun
45
soyuq şəkildə içilə biləcək bir növünü bazara çıxararaq soyuq içki bazarına
daxil olmuşdur [20].
Mədəni simvollara görə mövqeləndirmə
Müasir zamanda reklamçıların bir çoxu məhsul mövqeləndirməsi üçün
cəmiyyətdəki mədəniyyət simvollarından istifadə edir. Kritik nöqtə isə bu
simvolun insanların zehinlərində yerləşmiş olması və rəqiblərin bu simvoldan
istifadə edə bilməməsi. Air India loqosunda maharajadan (böyük kral) istifadə
edir. Bu simvolla da qonaqlarımızı hörmətlə və yaxşı şəkildə qarşılayırıq
mesajını verir.
Rəqiblərə görə mövqeləndirmə
Bu növ mövqeləndirmədə rəqiblər gözdən keçirilir və rəy hazırlanır. Bəzi
hallarda rəqib dominant ola bilər. Bəzən rəqiblərlə eyni mövqeləndirmə
istifadə edilir, bəzən də reklamçılar rəqibi örnək götürməklə başqa bir
mövqeləndirmə tətbiq edir. Məsələn, Colgate və Pepsodent. Colgate bazara ilk
daxil olan zaman ailə sağlamlığına, Pepsodent isə uşaqlar üçün 24 saat
müdafiəyə fokuslanmışdı. Colgate rəqabət səbəbindən mövqeləndirməsini ailə
müdafiəsindən uşaq dişi sağlamlığına çevirdi [19].
2.3.4 Yenidən mövqeləndirmə
Bir brendin bazardakı mövqeyi zəif olarsa, onu yenidən mövqeləndirməyə
ehtiyac vardır. Bəs nə üçün yenidən mövqeləndirməyə ehtiyac duyulur? Aaker bu
suala belə cavab verir [20]:
Mövqeləndirmə tam şəkildə anlaşılmamışdır.
Mövqeləndirmənin dövrü keçmişdir.
Mövqeləndirmə məhdud bir bazara xitab edir.
Mövqeləndirmə çağdaş olmaya bilər.
Mövqeləndirmə yorulmuşdur.
46
Yenidən mövqeləndirmə strategiyaları aşağıdakı şəkildə qruplaşdırıla bilər [5,
səh. 47]:
Həqiqi yenidən mövqeləndirmə - brendin funksiyalarını və dizaynını yeniləmə,
keyfiyyətini artırma prosesidir.
Brendi zənginləşdirmə - brend dəyərinin əlavə xidmət və məhsullarla
artırılması. Məsələn, otellər ana məhsullarına boş zamanlar üçün məkanlar,
barlar və əyləncələri əlavə etmişdir.
Psixoloji mövqeləndirmə - alıcıların məhsulla bağlı özəllik, status, fəlsəfə kimi
dəyərləri ilə bağlı inanclarının dəyişdirilməsi prosesidir. Bu mövqeləndirmənin
tətbiq edilməsi çox çətindir.
Dəyərləri yüksəltmə - brendin önəmli özəlliklərini vurğulayaraq alıcıların
inandırılmasıdır.
Etinasız yanaşılan dəyərləri əlavə etmə - çox intensiv şəkildə olmasa da brendə
müəyyən fərqli özəlliklər əlavə edilir [20].
Seçimləri dəyişdirmə - inandırma yolu ilə alıcı seçimlərində dəyişikliklər edilə
bilər. Mediada yayımlanan qorxuducu hekayələr, maarifləndirici reklamlar ilə
genetikası dəyişdirilməmiş qidalara və qatqı maddələri əlavə edilməyən təbii
məhsullara meyillilik yaradılmışdır [35, səh. 48].
Rəqabətcil mövqeləndirmə - brendi rəqiblərdən fərqliləşdirmə və onun daha
çox fayda verməsini təmin etmə brendin uğurlu olmasının ilk şərtidir [20].
2.3.5 Mövqeləndirmə səhvləri
Turizm bazarında mövqeləndirmə ilə bağlı bir sıra səhvlərə yol verilir. Kotler və
Kellerə görə bir məhsul və ya müəssisə üç səbəbən səhv mövqeləndirilmiş ola bilər.
Birincisi, hədəflənən bazar seqmenti çox kiçik, kiçilməkdə olan, intensiv rəqabətə
sahib olan və ya mənfəətsiz seqmentdir. İkincisi, məhsulun keyfiyyət və özəllikləri
hədəflənən bazar seqmentinə xitab etməmiş ola bilər. Üçüncüsü isə məhsul xərci
47
rəqabətcil bir qiymət qoymanın tətbiq edilməsini təmin etməyəcək dərəcədə yüksək
ola bilər [30, səh. 243].
Destinasiya hədəflədiyi bazar seqmentində qısa zaman ərzində tanınmaq
istəyirsə, bu zaman ilk olaraq əksik mövqeləndirmə, həddən artıq mövqeləndirmə və
xətalı mövqeləndirmə kimi səhvlərən uzaq olmalıdır [25, səh. 87].
Əksik mövqeləndirmə - hədəf bazardakı potensial turistlərin destinasiya
barəsində kifayət qədər məlumata sahib olmaması
Həddən artıq mövqeləndirmə - məhsulun sadəcə müəyyən xüsusiyyətlərinin ön
plana çıxarılması və digər xüsusiyyətlərinin arxa plana salınması
Xətalı mövqeləndirmə - destinasiyanın hədəflədiyi bazarda turistlərdə yanlış
təəssürat yaradacaq şəkildə mövqeləndirilməsi
Bundan əlavə çaşqınlıq yaradan mövqeləndirmə və şübhəli mövqeləndirmə kimi
də səhv mövqeləndirmələr vardır. Çaşqınlıq yaradan mövqeləndirmə məhsulla bağlı
ayırd edici faydaların bir-birinə zidd olan şeylər olmasıdır. Şübhəli mövqeləndirmə
isə mövqeləndirmə müddətində məhsul və ya brendlə bağlı edilən iddiaların şübhə
yaratması və inandırıcılıqdan uzaq olması halıdır [30, səh. 243].
2.4 Düşüncə xəritələrinin mövqeləndirmədə rolu
Brendlərini uğurlu şəkildə mövqeləndirmək istəyən şirkətlər onun bazarda və
istehlakçıların zehnindəki mövqeyini bilməlidirlər. Bunun üçün bir sıra ölçü
metodlardan istifadə olunsa da, onların arasında ən geniş yayılanı düşüncə
xəritələridir. Düşüncə xəritələrinin özəlliyi ondan ibarətdir ki, onlar bazarın qərar
verənə vizual şəkildə təqdim edilməsini təmin edirlər. Düşüncə xəritələri
müəssisələrin rəqiblərini tanımaqda, bazardakı mövqelərini müəyyən etməkdə və
bazardakı boşluqları görməkdə ehtiyac duyulan bir vasitədir [17, səh. 47].
2.4.1 Düşüncə xəritələri və onların faydaları
48
Mövqeləndirmə fəaliyyətlərindən sonra müəssisələr öz məhsul və ya
brendlərinin və ya rəqiblərinin məhsullarının və ya brendlərinin istehlakçıların
zehnində necə qavranıldıqlarını və mövqeləndirildiklərini müəyyən etməli, təhlil
etməli və dəyərləndirməlidirlər. Bununla məhsul və ya brendlərini fərqliləşdirmək və
istehlakçı zehnində mövqeləndirmək üçün tətbiq etdikləri strategiyaların doğru olub-
olmadığını dəyərləndirə bilərlər. Bunun üçün də müəssisələr əsasən ən önəmli ölçü
və təhlil metodlarından biri olan düşüncə xəritələrindən istifadə edirlər [20].
Düşüncə xəritələri fərqli brendlərin fərqli ölçüdəki istehlakçı qruplarının
zehnində sahib olduqları imici qrafikləşdirən şəkillərdən təşkil olunur və
marketoloqlar düşüncə xəritələri ilə bazardakı brendlərin hansı özəlliklərinin
istehlakçı tərəfindən daha çox qavranıldığını, əhəmiyyətli olduğunu, rəqib brendlər
ilə müqayisə edildikdə hansı səbəbdən satın alındığını müəyyən edirlər. Düşüncə
xəritələri müəyyən bir bazar seqmentini təşkil edən real və potensial istehlakçıları
təmsil edə bilmə bacarığı olan bir qrup istehlakçının eyni bazar seqmentini
hədəfləyən şirkətlərin məhsul və ya xidmətlərini müqayisə etmələri ilə əldə edilən
nəticələrin mövqelərinin vizuallaşdırılmasını ifadə edir [27, səh. 98].
Düşüncə xəritələri marketinq menecerlərinə çox böyük faydalar verir və bu
faydalar aşağıdakı şəkildə təsnif edilir [17, səh. 51]:
Marketinq menecerləri düşüncə xəritələrinin köməyi ilə prioritet bazarlarını
təşkil edən seqmentləri fərqli dəyişənlər baxımından müəyyən edə bilər və hər
bir bazar seqmentində bir-biri ilə rəqabət aparan müəssisələri və bazardakı
rəqabətin dərəcəsini müəyyən edə bilərlər.
Bir müəssisənin marketinq meneceri düşüncə xəritələrinin köməyi ilə rəqabət
apardığı hər bir müəssisə tərəfindən istehsal edilən məhsul və ya xidmətləri ən
yaxşı şəkildə xarakterizə edən özəlliklərin nələr olduğunu da müəyyən edərək,
istehlakçıların satınalma qərarlarının hansı təməl faktora əsaslandığını da təsbit
edə biləcəkdir.
Düşüncə xəritələrinin strateji marketinq planlama müddəti çərçivəsində
istifadəsi ilə müəssisələrin bazarda daha güclü şəkildə rəqabət apara
49
bilmələrinə fürsət verəcək yeni mövqe alternativləri də asan şəkildə təsbit edilə
biləcəkdir.
Düşüncə xəritələrindən istifadə edən marketinq menecerləri istehlakçı
zehinlərində olan boşluqları müəyyən etmə imkanını əldə edərək o boşluğu
dəyərləndirmək üçün marketinq cəhdləri həyata keçirə bilərlər.
Mövqeləndirmə və ya yenidən mövqeləndirmə məqsədilə həyata keçirilən
marketinq cəhdlərinin istənilən nəticələri ortaya çıxarıb-çıxarmadığını da
düşüncə xəritələri müəyyən edir.
Dostları ilə paylaş: |