İslam İnqilabının Böyük Rəhbəri həzrət Ayətullah Seyid Əli Xameneinin elm və elm istehsalı barədə çıxışlarından seçmələr Birinci cild

Düşüncə istehsalında daha çox səy və iş

Daha çox səy və iş tələb edən mühüm məsələlərdən biri də düşüncə istehsalı məsələsidir; kitab oxumaq və müxtəlif sahələrdə ümumi məlumatı artırmaq. Bizim universitet və hövzələrdə yaradılmasını dediyimiz və təklif etdiyimiz azad diskussiyalar cəmiyyətdə çox dəyərli bir düşüncə cərəyanının əsasını qoya bilər.⁷¹⁶

Sənaye sahəsində tədqiqatın zəruriliyi

Əhəmiyyətli olan başqa bir məsələ də tədqiqat məsələsidir; tədqiqat və texnologiyanın inkişafı. Bu gün dünyanın bütün sənayeləri, o cümlədən maşınqayırma sənayesi elmə əsaslanır; daim düşünür, işləyir, tədqiqat aparır, araşdırırlar ki, məhsullarını daha yaxşı, nöqsansız, daha gözəl, daha qənaətcil və daha ucuz çıxarsınlar. Bu, elmi inkişaf olmadan, diqqət və tədqiqat olmadan imkansızdır. Tədqiqat qapısını açıq qoymaq lazımdır. Müxtəlif qurumlar, sənaye zavodları, sənaye müdirləri və sənaye işinə nəzarət edən dövlət məmurları tədqiqat üzərində çox çalışmalıdırlar. Bu, çətin rəqabət şəraitində sənayenin özünü qorumasına və inkişaf etmiş rəqiblərlə rəqabətdə yıxılmamasına kömək edər. Bu, tədqiqatla mümkündür.⁷¹⁷