BiRİNCİ HİSSƏ
Ekspert qiymətləndirməsi metodunun əsas funksiyaları
Yüklə 454,05 Kb.
|
|
14.2. Ekspert qiymətləndirməsi metodunun əsas funksiyaları
Sosiologiyada ekspert qiymətləndirməsi metodunun ən ümumi halda üç əsas funksiyasını göstərmək olar: sosial gerçəkliyin müxtəlif hadisə və proseslərinin inkişaf təmayüllərinin proqnozu; kütləvi sorğu nəticələrinin səhihlik dərəcəsinin qiymətləndİrilməsi; qrup və kollektivlərin attestasiyası. Sosial gerçəkliyi müxtəlif hadisə və proseslərin proqnozlaşdırılması funksiyasında ekspert qiymətləndirilməsinin kütləvi sorğu nəticəsində alınan informasiyadan olan fərqi özünü daha əyani surətdə göstərir. Bu fərq ekspertlərin söylədiyi fikirlərin, rəylərin uzlaşma və uyğunlaşma meyllərinin olmasından ibarətdir. Həqiqətən, əgər 30 ekspertin rəyləri arasında 5-7 bir-birini istisna edən proqnoz qiymət olarsa, bu rəyləri praktik məqsədlər üçün istifadə etmək mümkündürmü? Bundan başqa kütləvi sorğunun müəyyən qədər orta statistik göstərici kimi çıxış edən nəticələrinin səhihliyi, rəyi soruşulanların ümumi sayı artdıqca daha yüksək olur. Ekspert sorğusuna gəldikdə isə, qeyd etmək lazımdır ki, onda iştirak edən şəxslərin yüksək səriştəliliyi ilə əlaqədar olaraq hətta bir ekspertin belə xüsusən ekspertlər qrupunun rəyi kifayət qədər əsaslandırılmış və səhih ola bilər. Ümumiyyətlə, proqnoz ekspert qiymətləndirməsi hər bir sosial hadisə və proseslərə tətbiq edilərək yerinə yetirilə bilər. Məsələn, ekspertlərdən əhalinin müxtəlif qruplarının mənəvi tələbatlarının hansı istiqamətdə inkişaf edəcəyini qiymətləndirməyi, ölkənin müstəqilliyi möhkəmləndikcə dövlət idarəsində xalqın hansı iştirak formalarının ön plana çıxmağı barəsində rəy söyləməyi, elmi-texniki tərəqqinin şəxsiyyətin sosial-psixoloji keyfiyyətlərinə təsiri və s. haqda fikir irəli sürməyi xahiş etmək olar. Lakin elə düşünmək olmaz ki, proqnoz ekspert qiymətləndirməsi yalnız sırf ictimai, qlobal problemlərə tətbiq edilməlidir. Hər gün əmək kollektivində öz işini bilən, həmin sahədə təcrübəli olan və məsələn, əmək məhsuldarlığındakı dəyişkənliklərin əsaslandırılmış proqnozunu vermək; kadr heyətinin sabitliyini və ya kollektiv üzvlərinin gündəlik praktikaya daxil edilməsi nəzərdə tutulan yeni bazar münasibətləri formalarına yönəlmiş maraqlarını hərtərəfli qiymətləndirmək iqtidarına malik olan adamlar vardır. Tətbiqi sosiologiyada proqnoz qiymətlərin alınması üçün istifadə edilən bir sıra ekspert sorğusu üsulları işlənib hazırlanmışdır. Onu da qeyd etmək yerinə düşər ki, kütləvi sorğularda geniş istifadə olunan bəzi texniki və metodik üsullar, ekspertlər kimi spesifik auditoriyanın sorğusu zamanı öz əhəmiyyətini itirir. Adətən, kütləvi sorğular anonim xarakter daşıyır. Bu, ekspert sorğusunda mənasını itirir, çünki ekspertlər tədqiqatın gedişində onların köməyi ilə həll edilən məsələlərdən xəbərdar olmalıdırlar. Buna görə ekspert anketində vasitəli və ya yoxlama suallarını, testləri və ya respondentin "gizli" mövqeyini aşkar etmək məqsədini güdən digər hər hansı üsulları tətbiq etməyə ehtiyac yoxdur. Bundan başqa, bu cür üsulların tətbiqi ekspert qiymətləndirməsinin keyfiyyətinə gözə çarpan dərəcədə zərər vura bilər. Ekspert, sözün tam mənasında, elmi tədqiqatın fəal iştirakçısıdır. Tədqiqatın məqsədini ondan gizlətmək cəhdi eksperti passiv informasiya mənbəyinə çevirərək onun tədqiqatın təşkilatçılarına olan etimadının itirilməsi təhlükəsini yarada bilər. Ekspert sorğusunun əsas vasitələri xüsusi proqram üzrə işlənib hazırlanmış anket və ya blank müsahibəsidir. Buna müvafiq olaraq sorğu prosedurası ekspertlərlə ya anket, ya da müsahibə ilə işlərin aparılmasından ibarət ola bilər Kütləvi sorğudan fərqli olaraq, ekspertlərin proqnozlu sorğu proqramı bir o qədər də detallaşdırılmamışdır, əsasən konseptual xarakter daşıyır. Burada hər şeydən əvvəl proqnoz ediləcək hadisə birmənalı şəkildə ifadə olunur, onun sonunun mümkün variantları hipoteza şəkilində nəzərdə tutulur. Hipotezaların nə dərəcədə işlənib hazırlanmasından, proqnozun istiqamətlərinin bəlli olmasından asılı olaraq tədqiqat vasitələrinə bu və ya digər sorğu növləri daxil edilir. Əgər tədqiqatçının sərəncamında yalnız proqnozlaşdırılan hadisənin sonunun mümkün variantları haqqında məlumat varsa və o, onların səbəbini birmənalı şəkildə ifadə etməkdə çətinlik çəkirsə onda ekspertə cavab seçməkdə tam sərbəstlik verməklə açıq suallardan istifadə etmək daha yaxşıdır. Tutaq ki, tədqiqatçını televiziya verilişlərinə baxmağa sərf olunan vaxtın gələcək 10 ildə necə dəyişə biləcəyi maraqlandırır, lakin o, bu verilişlərə marağın artması və ya azalması səbəbləri haqqında hipotezaları ayırmaqda çətinlik çəkir. Onda ekspertə sərbəst şəkildə verilən sualların ardıcıllığı bu cür ola bilər: "Siz necə hesab edirsiniz, gələcək 10 ildə insanın televiziya verilişlərinə baxmaq üçün sərf etdiyi vaxt artacaq, azalacaq, yoxsa dəyişməz qalacaqdır?" Cavabın variantından asılı olmayaraq sonrakı sual bu cür qoyulur: "Sizin çıxardığınız nəticə hansı fakt və ya fərziyyələrə əsaslanır?" Lakin əgər tədqiqatçının sərəncamında proqnozun nəticələrinin səbəbləri haqqında münasib fərziyyələr vardırsa, proqnoz hipotezalarını onun özü ifadə edə bilər. Bu hipotezalar müddəalar şəklində ekspert anketinin formalaşdırılmasının əsasını təşkil edir. Əvvəlki misala müraciət edərək ekspertə ünvanlanmış qapalı proqnoz sualının necə ola biləcəyini göstərək: Sizin yaxın 10 il ərzində televiziya verilişlərinə baxmağa sərf olunan vaxtın ehtimal edilən dəyişməsi haqda təsəvvürünüz: Cədvəl
Ekspertlərin sorğusu əyani və ya qiyabi (poçt vasitəsilə sorğu, telefon müsahibəsi) üsullarla aparıla bilər. Ekspert sorğusunun ən sadə formalarından biri fikir, "rəy mübadiləsidir. Bu üsul bütün ekspertlərin eyni zamanda tədqiqatçı tərəfindən ifadə edilmiş müzakirə olunan məsələ üzrə əsas mövqeyinin aydınlaşdırıldığı "dəyirmi masa" ətrafında olmasını nəzərdə tutur. Ümumi qiymət və ya rəy yaradılmasının bu cür forması heç də xaotik deyil. Müzakirəyə qoşulmuş ekspert qrupu müəyyən qayda üzrə təşkil edilir. Bu qrupa proqnozlaşdırılan sosial hadisə və ya proses haqqında fəal surətdə müxtəlif fərziyyələr irəli sürən "ideyalar hasil edən" yarımqrup, mübahisənin xaotik səciyyə kəsb etməsinə, obyektiv müzakirə çərçivəsində keçməsinə və tərəflərin bir-birinin səriştəliliyinin qarşılıqlı qiymətləndirilməsi məcrasına düşməməyinə nəzarət edən "tənzimləyicilər" yarımqrupu, "ideyalar hasil edənlərin irəli sürdüyü ən əhəmiyyətli ideyaları qiymətləndirən və seçən "seleksiyaçı" yarımqrup, yeni-yeni fərziyyələri ifadə etmək yolu ilə "ideyalar hasil edənləri" müxtəlif rəylərin hazırlanmasına həvəsləndirən "stimullaşdırıcı yarımqrup və nəhayət, "dəyirmi masanın" ekspertləri diqqətini diskussiyanın əsas mövzusu üzərində saxlayan prezidenti daxil olmalıdır. "Dəyirmi Masanın" prezidenti kimi tədqiqatın təşkilatçısının özü də çıxış edə bilər. "Masa" arxasına dəvət olunmuş ekspertlərin ən optimal sayı isə 20-25 nəfər olmalıdır. Problemlərin müzakirəsi bir neçə turdan ibarət olub, müəyyən dərəcəyə qədər razılaşdırılmış rəy hazırlanana qədər davam edə bilər. Tətbiqi sosiologiyada çox vaxt ekspert proqnozunun “delfa” texnikası adlanan metodundan da istifadə olunur. Bu metod birgə rəyin eyni ekspertlərin dəfələrlə təkrar olunan sorğusu vasitəsilə hazırlanmasından ibarətdir. Birinci sorğunun və nəticələrin ümumiləşdirilməsindən sonra onun yekunları ekspert qrupu iştirakçılarına çatdırılır. Bundan sonra keçirilən ikinci sorğunun gedişində ekspertlər ya özlərinin əvvəlki mərhələdə ifadə etdikləri fikirlərini təsdiq edir, ya da rəylərini əksəriyyətin fikrinə müvafiq olaraq dəyişirlər. Bu 3-4 dəfə təkrar edilir. Bu cür proseduranın gedişində birgə rəy hazırlanır, lakin bu zaman tədqiqatçı çoxsaylı sorğudan sonra da öz mövqeyində qalanların fikrinə etinasızlıq göstərməməlidir. Artıq qeyd edildiyi kimi, ekspert qiymətləndirməsi metodunun əsas funksiyalarından biri kütləvi sorğu nəticələrinin səhihlik dərəcəsini qiymətləndirməkdən ibarətdir. İdarəetmə sahəsində sosioloji tədqiqatlar vasitəsilə müəyyən məsələlərin həlli prosesində çox vaxt kütləvi sorğu nəticələrinin səhihliyi və müvafiq olaraq onların əsasında çıxarılmış nəticələrin qanunauyğunluğu məsələsi ortaya çıxır. Bir sözlə, söhbət respondentlərin bildirdikləri rəylərin səriştəlilik dərəcəsinin qiymətləndirilməsindən gedir. Bu proqnoz texnikasının adı qədim Yunanıstanda yerləşən və hələ bizim eradan əvvəl hadisələr haqqında qabaqcadan xəbər verən mərkəz kimi məşhurlaşmış Delfa şəhərinin adından alınmışdır. Bunun üçün ekspert anketi tərtib edilir və bu anketə əsasan qapalı, öz strukturuna görə respondentin anketində ifadə edilmiş suallara tam oxşar, suallar daxil olur. Ekspertin qarşısında duran məsələ — obyektiv şəraiti, tədqiqatçını maraqlandıran amilləri nəzərə alaraq, qoyulmuş suallar üzrə qərəzsiz, hərtərəfli surətdə ölçülüb-biçilmiş rəy söyləməkdən ibarətdir. Tutaq ki, hər hansı bir müəssisədə kadrların "axıcılığı" problemi öyrənilir. Müəssisənin işçilərinə ünvanlanmış anketdə belə bir sual ifadə olunmuşdur: "Yerinə yetirdiyiniz işin məzmunu sizin əsas peşənizə nə dərəcədə uyğundur?" Cavabların variantları bunlardır: "tamamilə uyğundur", "qismən uyğundur", "uyğun deyil". Növbəti sual: "Siz yaxın bir il ərzində müəssisədən (işdən) çıxmağa hazırlaşmırsınız ki?" Cavabların variantları: "Bəli, hazırlaşıram", "xeyr, hazırlaşmıram", "cavab verməyə çətinlik çəkirəm". Fərz edək ki, ikinci suala cavab verərkən rəyi soruşulanların 33 % "cavab verməyə çətinlik çəkirəm" mövqeyini qeyd etmişdir. Rəyi soruşulanların ikinci sual üzrə birmənalı mövqeyini izhar etmiş (yəni işdə qalmaq və ya işdən çıxmaq fikrində olduğunu bildirmiş) üçdə ikisinə əsaslanaraq işçilərin mümkün hərəkətinin miqyası haqqında səhih nəticə çıxartmaq olduqca riskli işdir. Müvafiq nəticənin səhihlik və əsaslılıq dərəcəsini yüksəltmək üçün ekspert, sorğusu keçirmək münasibdir. Ekspertin anketində yoxlama sualı bu cür ola bilər: "Zəhmət olmasa, aşağıdakı işçilər qrupu arasında "axıcılıq" səviyyəsini qiymətləndirin": Cədvəl
Əgər, ekspertlərin verdiyi qiymətlərə əsasən, "axıcılıq" işlərinin məzmunu əsas peşələrinə uyğun olmayan işçilər arasında daha yüksəkdirsə və bu kütləvi sorğu nəticəsində aşkar edilmiş təmayüllə düz gəlirsə, onda ekspertlərin çıxardığı nəticə bütün yoxlanılan işçilər toplusu üçün qanunauyğun olacaqdır. Ekspertlərin rəyinin kütləvi sorğuda aşkar edilmiş məlumatlarla düz gəlmədiyi təqdirdə səhihliyin yoxlanılmasının başqa meyarlarını axtarmaq zərurəti yaranır. Əlbəttə, ekspert rəyi də mütləq həqiqət deyil. Axı, ekspertlər də, necə deyərlər, insandır və onlar da bir şeyi qiymətləndirərkən səhvə yol verə bilərlər. Lakin bu, idarəetmə sahəsində müəyyən məsələlərin həlli üçün aparılan kütləvi sorğu nəticələrinin səhihlik dərəcəsinin qiymətləndirilməsində ekspertlərin iştirakının vacibliyini şübhə altına almır. Sosioloji tədqiqatlar təcrübəsində ekspert qiymətləndirməsi metodunun növlərindən biri olan attestasiya geniş tətbiq edilir. Bu zaman ekspert rolunda kollektivlərin, ictimai təşkilatların rəhbərləri, müdiriyyətin və ictimaiyyətin nümayəndələri daxil olan xüsusi attestasiya komissiyası çıxış edir. Ekspertlər tərəfindən doldurulan attestasiya vərəqinin strukturu kollektiv üzvü və ya bütövlükdə kollektiv qiymətləndirilərkən istifadə edilən göstəricilər sistemi ilə qabaqcadan müəyyən olunmuşdur, Attestasiya vərəqəsinin, məsələn, aşağıdakı strukturu ola bilər: attestasiyadan keçənin sosial demoqrafik göstəriciləri (cinsi, yaşı, təhsili, ixtisası); müxtəlif fəallıq növlərinin göstəriciləri, onların dərəcəsinin təsviri və hər göstərici üzrə qiymətləndirmə kodları. Belə bir metodika sənədlərin təhlili əsasında (məsələn, yazılı xarakteristikalar) və ya müşahidə metodunu tətbiq etmək yolu ilə, xüsusən tədqiqat obyekti bütöv bir kollektivdən ibarət olduqda (məsələn, kollektivin iclasında)" ekspert qiymətləndirməsini həyata keçirməyə imkan verir. Tədqiqat planında attestasiyanın məqsədi obyektiv meyarlara əsasən müxtəlif qrup respondentləri ayırmaq və tədqiqat olunan problemi respondentlərin özlərinə verdikləri qiymətlərin ekspert qiymətləri ilə müqayisə əsasında təhlil etməkdən ibarətdir. Ekspert qiymətləndirməsi metodundan axtarış və sınaq tədqiqatlarında təhlilin obyekti, predmeti haqqında ilkin məlumatları almaq, əsas tədqiqatın hipoteza və məsələlərini dəqiqləşdirmək, eksperiment keçirilməsi şərtlərinin müəyyənləşdirilməsi üçün və eksperimentin səmərəliliyi qiymətləndirildikdə geniş istifadə edilir. 14.3. Ekspert qiymətlərinin validlik amilləri Ekspertlərin cavab verməli olduqları tələblər tədqiqatın məqsəd və vəzifələrindən əhəmiyyətli dərəcədə asılıdır. Lakin onun hansı səciyyə daşıdığından asılı olmayaraq səriştəliliyin (ekspertizada iştirak etmək üçün yararlılığın aşağıdakı cəhətlərini göstərmək olar: peşə səriştəliliyi — ekspertin həmin sahədə məlumatlılıq dərəcəsi, ekspertiza obyekti haqqında kifayət qədər aydın anlayış yaratmaq bacarığı; qiymətlərin məzmununu açmaq, onu başqa mütəxəssislərin başa düşə biləcəyi şəklə sala bilmək bacarığı; öz mülahizələrini əsaslandıra bilmək, başqalarının rəyini dinləməyi və lazım gələrsə öz fikrinə düzəliş verməyi bacarmaq. Validlik, yəni ekspertlərin mülahizələrinin qazandığı etimad, təbii şəkildə ekspertlərin səriştəliliyindən və həll edilən məsələnin çətinliyindən asılıdır. Bir çox səbəblər üzündən ekspert öz yaradıcı və intellektual potensialını həyata keçirmək iqtidarında olmaya bilər. Bu səbəblərdən bəzilərini və onları aradan qaldırmaq yollarını göstərək: Mülahizəni onun mənbəyi ilə eyniləşdirmək insanın insan tərəfindən qavranılmasının təbii komponentidir. Ekspertlər arasında bilavasitə əlaqələr olmadıqda, o, əhəmiyyətli dərəcədə aradan qaldırılır. Lakin, əgər qrup əyani, bilavasitə qarşılıqlı təsir rejimində işləyirsə, onda qrupu elə tərtib etmək lazımdır ki, ona bir-birini yaxşı tanıyanlar, müdir və onun tabeliyində olanlar daxil olmasın. "Tanınmış" adamları qrupa daxil etmək yalnız onun bütünlükdə yüksək dərəcəli mütəxəssislərdən ibarət olduğu halda məqsədəuyğundur. Mərkəzə qaçan təzyiq adamların əksəriyyətinə xas olan öz mülahizələrini bitərəf mövqe istiqamətində dəyişdirmək xüsusiyyətindən irəli gəlir. Müəyyən edilmişdir ki, ekspertin öz səriştəliliyinə verdiyi qiymət nə qədər yüksək olarsa, söylənilən fikirlərin sabitliyi bir o qət dər çox olur. Ekspertlərin qiyabi, vasitəli qarşılıqlı əlaqələrə keçməsi öz-özlüyündə mərkəzəqaçma təzyiqinin yaranmasını istisna etmir. Lakin bəzi informasiya toplama üsulları (keyfiyyətli əks əlaqəli, fərdi əks əlaqəli üsullar) bu çətinliyin öhdəsindən gəlməyə imkan verir. Ekspertlər qrupunun tanınmış lider olmayan üzvlərində hakim mövqe tutmaq cəhdləri yarana bilər ki, bu da potensial münaqişə mənbəyidir. Liderliyə çox böyük meyli olan ekspertləri bilavasitə qarşılıqlı əlaqə rejimli sorğulara cəlb etməkdən çəkinmək lazımdır. Ekspertlərin əksəriyyətinə obyektlə tanışlıq və qiymətləri müəyyənləşdirməyin ilkin mərhələlərində formalaşan rəylərin səbatsızlığı səciyyəvidir. Bu an söylənilən yetkinləşməmiş fikirlər başqaları tərəfindən gözlənilən bir təlqin kimi qavranıla bilər. Birinci mərhələdə ekspertlərin informasiya mənbələrindən təcrid olunması təmin edilməlidir. Ekspert sorğusunun tətbiqində aşağıdakı səhvlər və çətinliklər ortaya çıxa bilər: ekspertizanın məqsədlərinin müəyyənləşdirilməsində aydınlığın olmamağı. Bu məqsədlərin ekspertlərin imkanlarına, istifadə edilən ekspertiza keçirmək texnikasına uyğun olmamağı. Ekspertlərin sorğusu xüsusi olaraq hazırlanmış proqramsız aparılır; ekspertlərdən səmərəsiz istifadə etmək. Ekspertiza başqa, daha sadə yolla əldə edilə bilən məlumatı almaq üçün nəzərdə tutulmuşdur; ekspertlərin seçilməsinin kifayət qədər əsaslı olmamağı. Ekspertliyə namizəd olanların səriştəliliyinin qiymətləndirilməsi birtərəfli xarakter daşıyır (və ya ümumiyyətlə yoxdur), bu isə ekspertlər qrupuna təsadüfi adamların daxil olmasına gətirib çıxarır: sorğuya cəlb edilmiş ekspertlər ekspertizaya maraq göstərmirlər. Ekspertlərin bir hissəsi məlumatların təhrif edilməsində maraqlıdır; ekspertiza vasitələri əvvəlcədən aprobasiyadan keçməyib. Suallar kifayət qədər dəqiq ifadə olunmayıb, onların əsas mahiyyəti aydın deyil. Cavabsız qalmış sualların sayı çoxdur; ekspertlər ekspertiza texnikasını tətbiq etməkdə çətinlik çəkirlər; məlumatlar xeyli fərqləndiyinə, yekcins olmadığına görə onların təfsirində və müxtəlif ekspert qruplarından alınan məlumatların müqayisəsində çətinliklər meydana gəlir; ekspertizanın gedişində xeyli kəmiyyət qiymətləri alınır, lakin onların əsaslandırılmasına diqqət yetirilmir. Alınmış məlumatların izah edilməsində çətinliklər yaranır, orta qiymətli cavablar düz olanlardan çox fərqlənir; sorğunu sürətləndirməyə yönəlmiş səylər problemlərin ekspertlər tərəfindən səthi təhlil etməsinə gətirib çıxarır; sorğu nəticələrinin qiymətləndirilməsində həddən artıq nikbinlik vardır. Ekspertizanın nəticələri digər obyektiv məlumatlarla təsdiq edilmir. Sosioloqun yuxarıda göstərilmiş mümkün səhv və çətinliklərdən xəbərdar olması ekspert sorğusunu elə planlaşdırmağa və tətbiq etməyə imkan verir ki, sosioloji məlumatları toplamağın bu üsulunun ən yüksək səmərəliliyi əldə edilə bilsin. Yüklə 454,05 Kb. Dostları ilə paylaş:
|