16.1. Farmatsevtika tashkilotining mehnat jamoasi: umumiy tushuncha va tavsiflar „Mehnat jamoasi“ tushunchasi murakkab va ko‘p qirrali hisoblanadi. U quyidagi: rivojlanish alomatlari va bosqichlari, rivojlanish pog‘onalari, funksiyalar, tuzulmalar, ko‘lam (o‘lcham), ijtimoiy-psixologik jarayonlar, ishlash uslubi kabi tavsiflarga asoslanadi.
Farmatsevtika tashkilotining mehnat jamoasi — bu aholiga farmatsevtika yordamini ko‘rsatish bo‘yicha birgalikda mehnat faoliyatini amalga oshiruvchi xodimlarning birlashmasi.
Birgalikdagi mehnat faoliyati — mehnat jamoasining eng muhim alomatlaridan biri bo‘lib hisoblanadi, lekin u mehnat jamoasining yagona alomati emas. Ular jumlasiga, shuningdek, maqsadlar birligi, jamoa manfaatlari, jamoa a’zolarining iqtisodiy va ijtimoiy-psixologik birdamligi, hamkorlik va o‘zaro yordam, demokratiya va intizom asosidagi boshqaruv, rivojlanishning taraqqiy etishi alomatlari ham kiritiladi.
Mehnat jamoalarining shakllanishi — murakkab jarayon bo‘lib, u, odatda, jamoa rivojining uch: quyi, o‘rta va yuqori (sifatli holat) pog‘onasiga muvofiq bo‘lgan bosqichni o‘z ichiga oladi. Jamoaning rivojlanish pog‘onalari ma’lum ko‘rsatkichlar bilan tasniflanadi, bular: jamoa va shaxsiy manfaatlari hamda harakatlarining birligi; faollik va maqsadlarning amalga oshirilishi; mehnatdan qoniqish; birdamlik; barqarorlik; ijtimoiy-psixologik muhit.
I bosqich — bu shakllanish bosqichidir, u yangi tashkil etilayotgan jamoalarga xosdir. Uning eng muhim elementlari jamoa tuzulmasini butlash va xodimlarni tanlab olish hisoblanadi. Bunday guruh a’zolarining faoliyati asosan rahbarning farmoyishlari va talablarini bajarishdan iborat bo‘lib, bunda xodimlar turli manfaatlarga, o‘z funksiyalarini bajarishga tayyorgarlikning turli darajalariga ega bo‘ladilar. Ular o‘zlariga qo‘yiladigan talablarni ishlash tartibi hamda ketma-ketligini turlicha tushunadilar va idrok qiladilar. Guruhning tayyorgarligi yuqoriroq bo‘lgan bir qismi, ularni ongli ravishda qabul qiladilar va faol qo‘llab-quvvatlaydilar. Guruhning qolgan a’zolari ularni shunchaki ixtiyoriy ravishda bajaradilar. Sifatli o‘zgarishlar natijasida jamoa o‘z rivojining keyingi bosqichiga o‘tadi.
