O`zbekiston davlatchiligi tarixi” fani bo`yicha O`quv – uslubiy majmuasi tuzuvchi: B. Ismailov

Adabiyotlar:
1. Азамат Зиё. Ўзбек давлатчилиги тарихи: (Энг қадимги даврдан Россия босқинига қадар). T.: Шарқ. 2000.
2. Сагдуллаев ва бошқалар. Ўзбекистон тарихи: давлат ва жамият тараққиёти. T., 2000.
3. Сагдуллаев А.С., Мавлонов Ў. Ўзбекистонда давлат бошқаруви тарихи. -Т., 2006.
4. Ртвеладзе Э.В. История государственности Узбекистана. – Т.: Узбекистан. 2009.
5. Эшов Б.Ж. Ўзбекистонда давлат ва маҳаллий бошқарув тарихи. – Т.: Янги аср авлоди, 2012.
G’aznaviylar va Saljuqiylarning boshqaruv tizimi va davlatchilik
Reja:
1.G‘aznaviylar davlatining tashkil topishi.
2. G‘aznaviylar davlat boshqaruvi
3. Saljuqiylar davlatining tashkil topishi.
4. Saljuqiylarning boshqaruv tizimi.
Tayanch so‘z va iboralar. G‘aznaviylar, tuxsi qabilasi, Sayf ud-davla, qiniq urug‘i, Saljuqiylar.


1.G‘aznaviylar davlatining tashkil topishi.
G‘aznaviylar davlati Movarounnahrdagi bosib olingan hududlarning cheklanganligi va nisbatan tarixan qisqa davr – Movarounnahrda bor-yo‘g‘i 40 yilga yaqin hukmronlik qilgan bo‘lsa-da, O‘zbekiston davlatchiligi tarixidagi muhim bosqichlardan biri hisoblanadi. CHunki, G‘aznaviylar paydo bo‘lishi davri – X asr oxiri – XI asr boshlarida paydo bo‘lgan boshqa davlatlar - Saljuqiylar va Qoraxoniylar kabi o‘ta muhim tarixiy ahamiyat kasb etgan voqea – nafaqat Movarounnahr, balki butun O‘rta Osiyoda turkiy davlatchilikning o‘zil-kesil qaror topganligini ko‘rsatadi. SHu bois, ushbu paragrafda G‘aznaviylar davlatchiligi tarixi haqida qichqacha ma’lumot berib o‘tishni lozim topdik.
Demak, G‘aznaning siyosiy markaz sifatida yuksalishi X asrning ikkinchi yarmidan boshlanadi. G‘aznaviylar sulolasining asoschisi Amir Nasiriddin ud-davla Sabuqtegin G‘oziy kelib chiqishiga ko‘ra turkiy qavmga mansub edi. Ayrim o‘rta asrlar manbalarida, xususan, XIV asrda yashab o‘tgan Muhammad SHabangaroyning «Majma al-ansab» nomli asarida berilishicha, Sabuqtegin Issiqko‘l bo‘yidagi hukmdori qarluq bo‘lgan Barsxon degan joyda tug‘ilgan. YOshligida Sabuqtegin asir olinadi va to‘rt yil tuxsi qabilasida tutqunda bo‘lgach, uni Movarounnahrlik savdogarlarga sotib yuboradilar. V.V. Bartoldning fikriga ko‘ra, Sabuqteginni Somoniylar davlatining mansablar pog‘onasida ko‘zga ko‘ringan vakillaridan biri Alptegin sotib oladi. Alptegin 963 yilda vafot etgan paytda u sotib olgan qo‘l Sabuqtegin katta nufuzga ega edi. Uning vafotidan so‘ng G‘aznada navbati bilan Amir Ishoq ibn Alptegin, Amir Bilgategin, Amir Piriy, Amir Sabuqteginlar hukmronlik qiladilar. 997 yilning boshida Sabuqtegin Somoniylar tomonidan G‘azna va uning atroflariga hokim etib tayinlanadi. Tarixiy manbalar Sabuqteginni G‘aznaviylar davlatining asoschisi sifatida ta’riflaydilar. 997 yilning oxirida Amir Sabuqtegin vafot etadi va uning kichik o‘g‘li Ismol taxtga o‘tirib bor yo‘g‘i 7 oy hukmronlik qiladi. 998 yilda o‘zining harbiy jasoratlari uchun Sayf ud-davla – «saltanat qilichi» degan faholi nomga sazovor bo‘lgan, Sabuqteginning ikkinchi o‘g‘li Mahmud G‘aznaviylar taxtiga o‘tiradi.
Ko‘pchilik tarixiy-ilmiy adabiyotlarda Mahmud G‘aznaviy deb yuritilgan Abulqosim Mahmud hukmronligi davrida (998-1030 yy) G‘aznaviylarning qudrati va shuhrati ortib Buyuk G‘aznaviylar davlati barpo etildi. Mahmud hukmronligi davrida Xorazm, Xuroson, Seyiston, Qobul, G‘azna, SHimoliy Hindiston kabi viloyatlar G‘aznaviylar qo‘li ostida edi. Abulqosim Mahmud taxtga o‘tirgan yili xalifa Muqaddirdan Xurosonni boshqarish uchun yorliq hamda «YAmin ad-davla va amin al-milla» – «Saltanat tayanchi va musulmonlar jamiyatining ishonchli vakili» faxriy unvoni bilan taqdirlanadi.
Mahmud taxtga o‘tirgan paytidan boshlab o‘z davlati chegaralarini kengaytirish siyosatini olib bordi. U o‘sha yiliyoq Janubiy Toxariston (hozirgi SHimoliy Afg‘oniston)ni bosib olgan bo‘lsa, 999 yilda Marv yaqinidagi bo‘lgan jangdan so‘ng butun Xuroson Mahmud G‘aznaviy izmiga bo‘ysunadi. Manbalarning ma’lumot berishicha, Amudaryo vohasi, strategik jihatdan juda muhim ahamiyatga ega bo‘lgan Termiz shahri ham Mahmud qo‘l ostida bo‘lgan. Abul Fazl Bayhaqiy «Tarixi Ma’sud» asarida ma’lumot berishicha, Termizda noib va qal’a qutvoli bevosita G‘aznaviylar tomonidan tayinlangan. Bu G‘aznaviylarga Amudaryo orqali Markaziy Osiyodan Hindistonga olib boradigan muhim savdo yo‘lini nazorat qilish imkonini bergan.
1002 yilda Bag‘dod xalifasi Mahmud G‘aznaviy hokimiyatini tan olib unga yorliq yuborgach, Mahmud siyosiy jihatdan ancha mustahkamlanib oldi va o‘sha yili Seyistonni bosib oldi. G‘aznaviylar va Qoraxoniylar o‘rtasida dastavval Amudaryo chegara qilib belgilanadi. Ammo, Qoraxoniylar bu chegarani tez-tez bo‘zib turardilar. 1008 yilda Balx atroflarida G‘aznaviylar va Qoraxoniylar o‘rtasida jang bo‘lib o‘tadi. Bu jangda Mahmudning to‘la g‘alaba qozonishi Xurosonda uning ahvolini yanada yaxshiladi. O‘sha yili Mahmud CHag‘aniyon va Xuttalyonni ham bosib olib, o‘zining noiblari sifatida mahalliy hukmdorlarni hokimiyatda qoldiradi.
Manbalarning ma’lumot berishicha, 1024 yilda Mahmud G‘aznaviy markaziy Movarounnahr aholisini Alptegin zulmidan ozod qilish bahonasi bilan Amudaryoni kechib o‘tdi va Temir darvoza orqali Samarqandgacha borib Sug‘dga hujum qildi. Tadqiqotchilarning fikricha, bu yurishdan so‘ng CHag‘aniyon, Xuttalyon va Qobadiyonda Mahmudning hokimiyati yanada mustahkamlandi. Ammo, numizmatik manbalar ma’lumotlariga asoslangan E. V. Rtveladzining fikricha, Xuttalyon, Qobadiyon va Vaxshning Mahmud G‘aznaviy davlatiga nisbatan tutgan siyosiy mavqei haqida esa fanda hali unchalik ishonchli ma’lumotlar mavjud emas. Yana shu olimning fikricha, qat’iy dalillar asosida Omul (CHorjo‘y) gacha bo‘lgan butun Amudaryo vohasi Mahmud G‘aznaviyga bo‘ysungan deb hisoblash mumkin. Xorazm yurishi oldidan Mahmud G‘aznaviy vaziri tomonidan Termiz, Qobadiyon va Xuttalyonda kemalarni jangga tayyorlash, Omulda esa qo‘shin uchun oziq-ovqat to‘plashga buyruq berilganligi ma’lum.
1017 yilda Mahmud G‘aznaviyning ittifoqchisi bo‘lgan xorazmshoh Abulabbos Ma’munning o‘ldirilishi va isyonchilar tomonidan taxtga Ma’munning jiyani Abulhoris Muhammad Aminning o‘tqazilishi Mahmudning Xorazmga yurishiga sabab bo‘lagan edi. 1017 yilning yoz oyida Mahmud G‘aznaviy qo‘shinlari Xorazmni egallab, g‘alayonni bostiradilar. Mahmud Xorazm taxtiga o‘zining noibi etib bosh hojib Mahmud Oltintoshni tayinlaydi. Mahmud Oltintosh ko‘p jihatdan mustaqil siyosat yurg‘izishga harakat qilgan bo‘lsada o‘zining butun hukmronligi davrida G‘aznaviy sultonlar, avval Mahmud, keyin esa Ma’sudning vassali hisoblangan hamda harbiy yurishlar davrida G‘aznaviylar qo‘shinini Xorazm qo‘shinlari bilan to‘ldirib turgan. Xorazmning qo‘lga kiritilishi Mahmud G‘aznaviyning Movarounnahrdagi mavqeini yanada mustahkamlanishiga olib keldi.
Abulqosim Mahmud davrida G‘aznaviylar davlati musulmon olamining eng kuchli davlatiga aylandi. Bu davlatning hududi Mahmud G‘aznaviyning harbiy yurishlari tufayli shimoliy va shimoli-g‘arbiy Hindistondan CHag‘aniyon va Xorazmgacha cho‘zilgan bo‘lib, unga Eronning katta qismi ham kirgan edi. O‘z davrining iqtidorli sarkardasi va qattiqqo‘l hukmdori bo‘lgan Sulton Mahmud G‘aznaviy 1030 yilda vafot etadi. SHundan so‘ng Mahmudning vasiyati bilan ulug‘ xojib Ali Qarib boshchiligidagi bir guruh amaldorlar hukmdorning kichik o‘g‘li Muhammadni taxtga o‘tqazadilar. Ammo, o‘sha yilning o‘zidayoq Mahmudning katta o‘g‘li Ma’sud taxtni ukasidan tortib olishga muvaffaq bo‘ldi.
Ma’sud G‘aznaviy otasi to‘zgan davlatni butunligicha saqlab qololmadi. Uning hukmronligi davrida (1030-1041) G‘aznaviylar davlati o‘z qo‘l ostidagi hududlarni birin-ketin qo‘ldan chiqara borib, inqirozga yuz tuta boshladi. G‘aznaviylardan birinchi bo‘lib Xorazm ajralib chiqdi. Uning hukmdori Mahmud Oltintosh rasman mustaqil ichki va tashqi siyosat yurgizgan bo‘lsa-da, amalda Mahmud G‘aznaviyga tobe bo‘lib, unga ochiqdan-ochiq qarshi chiqishga jur’at qilolmagan edi. 1032 yilda Xorazm hukmdori Mahmud Oltintosh vafot etadi. SHundan so‘ng Ma’sud G‘aznaviy Oltintosh vorislarining hokimiyatini cheklash choralarini ko‘radi. YA’ni, Xorazmshoh unvoni Ma’sud G‘aznaviyning o‘g‘li Sulton Saidga berilib, Mahmud Oltintoshning o‘g‘li Horun esa Sulton Saidning Xorazmdagi vakili bo‘lib qoldi. Bunday siyosat albatta, Horunning jiddiy noroziligiga sabab bo‘lgan edi.
1034 yilda Horun ibn Oltintosh G‘aznaviylarga qarshi isyon ko‘tardi. U Saljuqiylar va Qoraxoniylar bilan do‘stona munosabat o‘rnatib, Xorazmni G‘aznaviylardan mustaqil deb e’lon qildi va Sulton Ma’sud nomiga xutba o‘qishni bekor qilish to‘g‘risida farmon berdi. Xorun ibn Oltintosh o‘sha yili katta qo‘shin bilan Xurosonga yurish qildi. Lekin Sulton Ma’sud tomonidan sotib olingan kishilar Xorun ibn Oltintoshni o‘ldiradilar. Uni qo‘llab-quvvatlagan Qoraxoniylar yana Samarqandga qaytib ketadi. SHundan so‘ng Sulton Ma’sud G‘aznaviy Qoraxoniylar bilan mo‘zokaralar olib boradi va shu yo‘l bilan G‘aznaviylar hokimiyatiga bo‘lgan xavfni biroz kamaytiradi.
Ammo, G‘aznaviylarning kelajakdagi yirik raqibi bo‘lgan yangi sulola Saljuqiylarning siyosat maydoniga chiqishi ham aynan Ma’sud G‘aznaviy davriga to‘g‘ri keladi. Mahmud G‘aznaviyning ruxsati bilan shimoliy Xurosonga joylashib olgan Saljuqiylar bu davrga kelib G‘aznaviylar uchun katta xavf tug‘dira boshlagan edilar. 1035 yilda Saljuqiylarning Xurosonga yangi hujumi boshlanadi.
Bu o‘rinda ta’kidlash lozimki, Sulton Mahmud G‘aznaviy umrining oxirlarida u tomonidan barpo etilgan va poytaxti G‘azna bo‘lgan davlat G‘arbda Isfahon va Kaspiy dengizidan sharqda SHimoliy Hindiston, shimolda Xorazmdan, janubda Balujistongacha bo‘lkan ulkan hududni o‘z ichiga olib, o‘z davrining yirik musulmon davlatiga aylangan edi. Ammo, Sulton Ma’sud ibn Mahmud davlat boshqaruvi va harbiy harakatlarda otasi kabi qobiliyatga ega emas edi. SHuningdek, o‘sha davrdagi siyosiy vaziyat, sulolalar o‘rtasidagi hududlar uchun o‘zaro kurashlar ham Sulton Ma’sudga mamlakatni bir butunlikda saqlab qolish imkonini bermadi. SHu bois uning hukmronligi davrida (1030-1041 yy.) G‘aznaviylar davlati o‘z qo‘l ostidagi hududlarni birin-ketin qo‘ldan chiqara borib, tanazzulga yuz tuta boshladi.
G‘aznaviylarning asosiy raqiblari Saljuqiylar bo‘ldi. 1035 yilda Saljuqiylar Niso shahrini egallagan bo‘lsalar, 1037 yilda ular Mari viloyatini o‘zil-kesil egallab Bag‘dod xalifasiga hokimiyatni boshqarish uchun yorliq berishini so‘rab elchi jo‘natdilar.
Keyingi yillarda Saljuqiylar Tog‘rul boshchiligida G‘aznaviylarga bir qancha zarbalar berib Xurosonning katta qismini egallab olishga muvaffaq bo‘ldilar. SHundan so‘ng Sulton Ma’sud katta qo‘shin bilan Saljuqiylar ustiga yurish qildi. 1040 yilning may oyida Mari yaqinidagi Dandanakon degan joyda bo‘lgan jangda Sulton Ma’sud qo‘shini Saljuqiylar tomonidan o‘zil-kesil tor-mor etildi. Mag‘lubiyatga uchragan Ma’sud zo‘rg‘a qochib G‘aznaga keldi va ko‘p o‘tmay fitnachilar tomonidan o‘ldirildi. Taxtga Ma’sudning ukasi Muhammad o‘tirdi. Lekin, Ma’sudning o‘g‘li Ma’dud (1041-1048 yy.) Muhmmadga qarshi urush boshlab uning qo‘shinlarini engdi va o‘zini o‘ldirib, G‘aznaviylar davlatining hukmdori bo‘lib oldi. Ammo, Sulton Ma’sudning vorislari G‘aznaviylar davlatining ilgarigi qudratini tiklashga muvaffaq bo‘la olmadilar. Asta-sekin o‘z qudratini yo‘qota boshlagan G‘aznaviylar davlati XII asrning oxirlarida Afg‘oniston hududlarida tashkil bo‘lgan yangi davlat – G‘uriylar tomonidan butunlay tugatildi. Aniqrog‘i, 1186 yilda G‘uriylar sulolasidan bo‘lgan G‘iyosiddin Muhammad qo‘shini bu paytga kelib Panjob viloyati bilan cheklanib qolgan G‘aznaviylar hokimiyatini o‘zil-kesil tor-mor qildi.