74.Təlimdə müəllimin davranış strategiyalarını qarşılaşdırın. Müəllimin özünəinamı, resurs, vəsaitlər, qaydaları tətbiqetmə bacarığı şagirdlərə
böyük təsir göstərir. Birinci dərs uyğunlaşma dövrüdür, şagirdlər müəllimi
tanımağa çalışır, uyğunlaşmağa başlayırlar, məhz belə məqamda sinif otağında
baş verənlərə görə özlərinin məsuliyyət daşıdıqlarını anlamalıdırlar. Ədalətli və
məntiqli davranış nəticəsində müəllim öyrənənlərin böyük əksəriyyəti tərəfindən
qəbul olunur. Təlimdə müəllimin davranış strategiyalarına bunlar aiddir.
Vəziyyəti yumşaltmaq Təcrübəsiz müəllimlər peşəkar müəllimlərlə müqayisədə şagirdləri daha çox
danlayırlar. Çox güman ki, bunun səbəbi onların düzgün jest və mimikalardan
istifadə etmək bacarığının nisbətən az inkişaf etməsidir. Unutmaq olmaz ki,
istənilən halda müəllim səs tonunu yüksəltməməlidir.
Vəziyyəti tənzimləmək İlk dərsiniz uğursuz keçə bilər, lakin bu, müəllimi həvəsdən salmalı deyil, adətən,
belə hallar baş verir. Nəticə çıxararaq, növbəti dərslərin daha yaxşı təşkili üçün
strategiyalar qurmaq ən optimal həll yoludur. Təcrübəli yoldaşlarınızdan da
məsləhət alıb dərslərini müşahidə edə bilərsiniz. Müşahidələr nəticəsində fikir və
məsləhətlər almaq mümkündür. Gördüklərinizlə bağlı müəllimlə müzakirələr
aparın, digər həmkarlarınızdan da dərs prosesində sizi izləmələrini xahiş edin,
təkliflər vermələrini istəyin.
Özünəinamın əskikliyi Müəllim digər peşə sahiblərindən daha həssas insandır, çünki canlı obyektlə
qarşı-qarşıya fəaliyyət göstərir. Sinifdəki müəllimlik bacarığınız daha çox şəxsi
keyfiyyətlərinizdən, müxtəlif fikir və düşüncə sahibi olan şagirdlərlə yaxşı
münasibət yaratmaq bacarığınızdan asılıdır. Müəllimlik fəaliyyətiniz sizi
izləyənlər tərəfindən təhlil və şərh edilir. Elə təhlillər nəticəsində güclü və zəif
cəhətlərinizlə qarşılaşmaq məcburiyyətində qalırsınız. Ziddiyyətli müşahidəçilər
tərəfindən qərəzli məsləhətlər almaq isə əlavə stress yaşamağınıza səbəb ola
bilər. Təcrübəniz çoxaldıqca, fəaliyyətiniz genişləndikcə özünəinam hissiniz də
artacaq.
