Uyushmasi rustаm musurmon

BOBILQАND
Bolaligim – yashin xotiram,
Ko‘zim olov, nigohim chaqnoq.
Tuyg‘ularim beg‘ubor osmon,
Mangulik ongimda bir chaqmoq –
Bobilqand.
Qandga tarix nomini bergan
Mening ona xalqim donishmand.
Labimda bir shirin so‘z bo‘lgan –
Tilimda eriydi Bobilqand.
Bobildan ham ko‘hna diyorim,
Yechilmoqda tarixdan tugun.
Bobilqandning shirin taʼmini
Shuurimda shimiyman bugun.
Аsli savdogarlar Kitobdan
Holva eltgan Bobil ahliga.
Qaytishida bolalariga
Qand keltirgan Bobil shahridan.
www.ziyouz.com kutubxonasi

---

Rustаm MUSURMON
18
BOZORTEPА
Poda. Bozortepa mol boqar,
Dashtni kesib yugurar Sho‘rob.
Yakkatut keng dalaga chopar,
Charxarixni beliga o‘rab.
Yassi yayloq. Issiq, jingirtob,
Zorillaydi jizillovuqlar.
Chanqab qolgan govmish – Sangirtog‘
Sho‘rob suvlariga yovuqlar.
Bo‘rttiradi qomatin tarang
Shamol pirpiroqqa o‘ralib.
To‘zon – raqsga tushadi satang
Buralib, buralib, buralib...
Bozortepa o‘ngirin qoqib,
Podani haydaydi qishloqqa.
Tun osmonda chiroqlar yoqib,
Qorovullik qilar yayloqqa.
www.ziyouz.com kutubxonasi

---

BOZBАRАK
19
YOZ
Qaldirg‘och inidek mukammal supa,
Shoxida bo‘zto‘rg‘ay yayragan og‘och.
Boshiga chambarak toj kiygan tepa,
Davlati ziyoda kumush qayrag‘och.
Bag‘rini tillarang bug‘doyzor etib,
Oltin o‘roq bilan don o‘rgan osmon.
Ko‘ksiga shamolning barmog‘i tegib,
Qiz kabi entikib titragan rayhon.
Momiq shu'lalarga g‘arq bo‘lgan ochun,
Shivirlab yelkamga engashadi oy.
Bir kecha yonimda tunamoq uchun
Mening to‘shagimdan oy so‘raydi joy... 
www.ziyouz.com kutubxonasi

---

Rustаm MUSURMON
20
* * *
Havodan olacha to‘qiydi quyosh, 
Tomchilardan marjon yasaydi yomg‘ir. 
Yuragini lola etar tog‘-u tosh, 
Ko‘pkari chopadi yer – qora bag‘ir. 
Bandidan uzilar uzum – oltin bosh, 
Ho‘kizning shoxiga quyilar chog‘ir. 
Bodomni abadiy sevar xarsang tosh, 
Ko‘pkari chopadi yer – qora bag‘ir. 
Bog‘lardan ketadi yashil tarovat, 
Sarg‘ayib qoladi daraxtlar faqir. 
Cho‘qqilar kuzatar tik, behalovat, 
Ko‘pkari chopadi yer – qora bag‘ir. 
Sag‘rinida hovur, ot kishnaydi. Qor… 
Yer yag‘ir, yuk bilan yugurish og‘ir. 
Tog‘lar muzlab qolar kelguncha bahor, 
Ko‘pkari chopadi yer – qora bag‘ir. 
www.ziyouz.com kutubxonasi

---

BOZBАRАK
21