Proqramlaşdırılmış təlim təlim prosesi üzərində daimi nəzarət qoymağa və onu düzgün tənzim etməyə imkan verir. Proqramlaşdırılmış təlim həm maşınla, həm də maşınsız təşkil edilə bilər. Proqramlaşdırılmış təlimin əsas mahiyyəti ondan ibarətdir ki, təlim alan –öyrənən proqramın əvvəlki cəhətlərini öyrənmədən sonrakı mərhələyə keçə bilməz. Bu təlim proqramın bütün tərkib hissələrinə ardıcıllıqla yiyələnməyi tələb edir. Proqramlaşdırılmış təlim proqramın tam mənası ilə öyrənilməsinə yönəlmiş olur.Bu təlimin köməyi ilə müəllim materialı daha çox şagirdə mənimsədə bilir.
Problemli təlim belə aparılır: şagirdlərə ya müəllimin iştirakı ilə, ya da müəllim olmadan fikri məsələni həll etmək tapşırılır. Şagirdlər fikri məsələnin həlli yollarını axtarırlar, fərziyyəni əsaslandırırlar və onun doğruluğunun yoxlama yollarını müəyyənləşdirirlər, müşahidə və eksperiment aparırlar, onların nəticələrini təhlil edirlər, fikirlərini sübuta yetirməyə çalışırlar. Problematik təlim məntiqi, elmi, yaradıcı mühakimə yürütməyi öyrədir, təlimi daha inandırıcı, emosional edir, intellektual hissləri inkişaf etdirir.
