Xoruzgülü preparatları. Xoruzgülü çoxillik ot bitkisi olub,tərkibində simarin və adonitoksin qlikozidləri vardır.
Təsir xarakterinə görə xoruzgülü qlikozidləri üskükotu qlikozidləri ilə oxşardır, lakin, ürəyə göstərdikləri təsirə görə onlardan zəifdir və kumulyasiya törətmirlər.
Tibbi təcrübədə xoruzgülü otunun özündən və Yeni Qalen preparatı olan adoniziddən istifadə olunur. Xoruzgülü preparatları sedativ təsirə malikdir və bu səbəbdən nevrozlarda geniş istifadə edilir.
Xoruzgülü otu (Herba Adonidis vernalis)dəmləmə şəklində(6,0-180 ml) daxilə (gündə 3-4 dəfə, 1 xörək qaşığı) təyin edilir.
Adonizid (Adonisid; lat.: Adonisidum). Xoruzgülü otunun Yeni Qalen preparatıdır. 15 ml-lik flakonlarda və 1 ml-lik ampullarda buraxılır.
Daxilə (gündə 2-3 dəfə, 20-40 damcı), dəri altına, yaxud venaya (1 ml) təyin edilir. Venaya 1 ml preparat 10-20 ml 20-40 %-li qlükoza məhlulu ilə durulaşdırıldıqdan sonra tədricən yeridilir.
